ٹک ٹاکراں دی وباء تے حکومت دی سرپرستی

لکھت:اشرف شریف

لوئس برائون دی کتاب ڈانسنگ ڈولز آف لاہور ہیرامنڈی دے جسم فروش خانداناں دے رہن سہن‘ پیشہ ورانہ انداز تے سوچ نوں اجاگر کردی اے۔ لوئس برائون برطانیہ دی محقق تے سماجیات دی استاد نیں۔ اوہ حیران رہ گئیاں جدوں اک چائے لیان والا اٹھ نو ورھے دا بچہ لوئس نوں گلے ملدے ہوئے جنسی رویے دا اظہار کردا اے۔ اوہ لکھدیاں نیں کہ مقامی مسجد دے قاری صاحب بھلے آدمی نیں کئی طوائفاں اوہناں نال تعلق رکھنا باعث برکت سمجھدیاں نیں۔ قاری صاحب وی اپنی آشنا طوائف دے بچیاں نوں شفقت تے نیک نیتی نال تعلیم دیندے نیں۔ اوہ بازار دے دلالاں دے اک ڈیرے دا ذکر کردیاں نیں۔ دلال جو طوائفاں دے آپسی جھگڑے نبیڑدے نیں کوئی طوائف نس جاوے تے نائیکہ دی مدد کردے ہوئے اوہنوں پھڑ کے واپس لیاندے نیں۔ کوئی تماشبین جھگڑا کرے تے اوہنوں سبق سکھاندے نیں۔ ڈیرے تے چرس تے دوجی منشیات دے دور چلدے رہندے نیں۔ جدوں ایہ کتاب لکھی گئی اوس ویلے بازار دی نکی تے سوہنی شکل و صورت والی کڑیاں دی عرب ملکاں وچ بڑی مانگ سی۔ وکھووکھ پروموٹر ثقافتی طائفہ دے ناں تے کڑیاں عرب ملکاں وچ لے کے جاندے۔ دستاویزات وچ اوہناں نوں گلوکارہ یاں رقاصہ لکھیا جاندا۔ منزل تے اپڑ کے جسم فروشی توں جو کمایا جاندا اوہدا حصہ پروموٹر نوں دین دے بعد اوہناں فنکاراں دے کول معقول رقم اکٹھی ہو جاندی۔ ایہوو جہ سی کہ ہر نائیکہ تے طوائف اوہناں پروموٹر ٹائپ بندیاں دی سیوا وچ لگیاں رہندیاں۔
لوئس برائون نے ماہا نام دی اک طوائف نوں اپنا معاون چنیا تے سارا دن اوہدے نال گزاردی۔ لوئس برائون پنج سال ہیرامنڈی وچ رہی۔ ایس دوران اوہنے ایتھوں دے لوکاں دے عقیدے دیاں جڑاں توہمات جادو ٹونے تے اعتقاد تے اک دوجے دے گاہک توڑن تے طوائف ثقافت وچ پلن والے دوجے طبقات دا مشاہدہ کیتا اپنی تحقیق مکمل کرکے اوہ واپس گئیاں تے کجھ ورھے بعد لوہر آئیاں تے کئی جوانیاں ڈھل چکیاں سن تے کئی بچپن شباب تے آ چکے سن۔ کتاب تے اوہدے موضوعات دا احاطہ کالم وچ ممکن نہیں صرف ایہ دسنا ضروری اے کہ سماج دی فکر تے شہر دے کجھ حصے جے کسے وجہ نال تعفن زدہ ہو جان تے اوہناں تے سائنسی بنیاداں تے کم کرن دی لوڑ ہوندی اے مسئلے نوں سمجھن لئی تحقیق کرنی پیندی اے۔ رجحانات دے پس پردہ قوتاں نوں سمجھنا پیندا اے۔ دادا جی ملن آئوندے تے اوہناں نے شکایت کیتی کہ اسیں لوک اوہناں نال گل کرن دی بجائے ٹیلی ویژن ویکھدے رہنے آں سانوں تے ساڈے والدین نوں گلا اے کہ بچے ہر ویلے موبائل فون وچ وڑے رہندے نیں۔ وزراء محکمیاں دے سیکرٹری حضرات تے ہر سطح دے منتخب نمائندیاں دے گھراں وچ وی ایہو کجھ ہو رہیا اے۔ وجہ ایہہ وے کہ اسیں گرائونڈ ختم کر دتے عمروعیار دی زنبیل ایہو موبائل فون رہ گیا اے جتھے بچہ جو چاہوے کرے۔ ہاں جس دوجی چیز نے نوجواناں نوں متوجہ کیتا اے اوہ موٹرسائیکل اے۔ ساڈے آل دوالے جو کجھ ہو رہیا اے اوہ موبائل فون تے موٹرسائیکل نال ہو رہیا اے۔
انٹرنیٹ استعمال کرن والے ایس تجربے چوں گزرے ہون گے کہ اچانک تہاڈے کمپیوٹر یاں موبائل دی سکرین تے کسے ویڈیو دا لنک آ جاندا اے کدی ایہ لنک اشتہار تے کدی کسے فلم یاں ڈرامے دے مختصر سین دی صورت وچ ہوندا اے۔ جے تسیں اوہنوں کھول لیا تے کجھ دیر ویکھیا تے فیر کمپیوٹر دی مصنوعی ذہانت پتہ لا لیندی اے کہ تہانوں ایس طرح دا مواد پسند اے۔ ایہدے بعد اجہی ویڈیوز یاں اشتہارات دی گنتی ودھن لگ پوے گی۔ تہاڈے نال جے ایہ سب ہو چکیا اے تے تسیں ویکھیا ہووے گا کہ ایہناں ویڈیوز وچ کھلے ڈلھے موضوعات تے بازاراں‘ پارکاں وچ ذومعنی سوال کردی ٹک ٹاکر کڑیاں کافی زیادہ فالوورز رکھدیاں نیں۔ ایہناں دے فالوورز دی گنتی لکھاں وچ اے۔ اسیں جس بچے دے ہتھ وچ ہر ویلے موبائل ویکھ کے مطمئن ہو جانے آں کہ اوہ آن لائن پڑھ رہیا اے اوہ ایس آن لائن جذبات فروشی دا اصل وچ تماشبین بن چکیا اے جہنوں تسیں روایتی طریقے نال روکن دی کوشش کیتی تے اوہ گھر بار چھڈن تے تیار ہو جاوے گا۔ اسیں غیر محسوس انداز وچ انٹرنیٹ تے موبائل فون نوں اپنی خاندانی روایتاں دی تھاں دے دتی اے۔ انٹرنیٹ ساڈے دماغ نوں پڑھ کے دنیا نوں دس رہیا اے کہ پاکستان دے ست ورھے دے بچے توں لے کے جوان عمر دے کروڑاں لوک جنسی فرسٹریشن دا شکار نیں۔ ایہ فرسٹریشن قدرتی ہوندی اے پر گھر دی تربیت تے سماج دی رہنمائی نال ایہنوں قابو وچ رکھنا سکھایا جاندا اے۔ مشہور قول اے کہ ماں دی گود پہلی درس گاہ اے۔ ہر ماں اگے ایہ سوال ضرور کیتا جانا چاہیدا اے کہ اوہ سماجی اقدار خواتین دے احترام تے سماجی امن دے حوالے نال اپنے پُتراں نوں کیہ سکھا رہی اے۔ دھیاں خاندان وچ سب توں ودھ پیار لیندیاں نیں اوہ باپ دی جان ہوندیاں نیں پر اوہناں دی ذرا جہی لغزش باپ دی جان وی لے سکدی اے۔
ساڈے تعلیمی ادارے‘ دینی مدرسے تے جمہوری ادارے ٹک ٹاکراں تے یوٹیوبراں نے یرغمال بنا لئے نیں۔ اُتوں ستم ایہہ وے کہ عمران خان دی حکومت نے پرنٹ میڈیا نوں کندھ نال لا کے ہر اہم معاملے وچ یوٹیوبر تے ٹک ٹاکراں نوں سدنا شروع کر دتا اے میٹنگاں وچ پچھیا جاندا اے کہ تہاڈے کنے سبسکرائبر نیں‘ کنے فالوورز نیں۔ وچارے سنجیدہ لوک چار پنج ہزار دے سبسکرائبر دسدے نیں جد کہ کوئی گمنام جہی خاتون یاں شوخا منڈا تہاڈی بغل چوں اٹھ کے دسے گا کہ اوہدے دس لکھ سبسکرائبر نیں۔ وزیر صاحب دی نظر عنایت ایس وڈے میڈیا ہائوس ول ہو جاوے گی۔ حکومت منے یاں نہ منے سوشل میڈیا تے غیر سنجیدہ لوکاں نوں ریٹنگ ملدی اے ہن اوہناں نوں اہمیت دیاں گے تے فیر مینار پاکستان ورگے واقعات تے ہون گے۔٭٭