بے مثل عسکری طاقتاں

رابعہ رحمٰن

6ستمبر1965ء دا دن ہر پاکستانی لئی اہمیت دا حامل اے۔ اصطلاح وچ دفاع انج دے طریقہ جنگ نوں کہیا جاندا اے جس دے ذریعے بہتر طور اُتے اپنی حفاظت کیتی جا سکے اپنی سرزمین تے معیشت و معاشرت ، سامان جنگ تے اسلحہ دے ذخائر دی حفاظت کیتی جا سکے۔ ایسے طرح حملہ آور دشمن نوں زیادہ توں زیادہ نقصان اپڑانا، ایہنوں پسپائی اُتے مجبور کر دینا کسے وی قسم دے فتنہ فساد دا سدباب کرنا دفاع دے زمرے وچ آندا اے۔ دفاع دے لفظی معنی کسے شے نوں ہٹان تے دور کرن دے نیں۔ عام اصطلاح وچ ایس توں مراددشمناں دی چالاں نوں ناکام بنانا مختلف تدبیراں دے ذریعے ایس نوں اپنے توں دور رکھنا، آپنے آپ نوں اینا مضبوط رکھنا کہ دشمن ولوں کسے قسم دی رخنہ اندازی نہ ہو سکے تے حملے دی صورت وچ ڈٹ کے ایس دا مقابلہ کرنا تے بچائو کرنا اے۔ اللہ تعالیٰ ولوں ایمان والیاں نوں دفاعی تدبیراں اختیار کرن تے دفاع اسلام لئی کمربستہ رہن دی تاکید فرمائی گئی اے۔ قرآن کریم وچ ارشاد باری تعالیٰ اے۔ ترجمہ : تے جتھے تیکر ہو سکے ، دشمن دے مقابلے وچ طاقت جمع رکھو تے گھوڑے تیار رکھو تاکہ ایس دے ذریعے تسیں اللہ دے تے اپنے دشمناںنوں تے ایس دے علاوہ دوجے اعداء نوں خوفزدہ کرو جنہاں نوں تسیں نہیں جان دے پر اللہ ایہناں نوں جان دا اے۔ایس آیت دے ضمن وچ حضرت عقبہ بن عامر رضی اللہ تعالیٰ عنہ بیان کردے نیں کہ رسول اللہ ﷺ نے منبر اُتے فرمایا کہ خبردار قوت تیز اندازی وچ اے، تن وار انج ای فرمایا چونکہ عہد نبوی ﷺ تیرو تلوار نال جنگ ہوندی سی ایس لئی آپ ﷺ نے تیر اندازی سکھن تے مشق کرن دی ترغیب دتی تے ایس نوں قوت دی شے دسیا۔ چنانچہ دور حاضر وچ اپنے دفاع نوں مضبوط بنان لئی آلات جنگ دی جملہ اقسام دا حصول دفاعی قوت نوں مضبوط بنانا ای اے۔ ایس تناظر وچ جدوں رسول اللہ ﷺ دی مبارک زندگی دے ایس پہلو دا مطالعہ کیتا جائے تے سانوں ایہہ نظر آندا اے کہ مدینہ دے دفاع لئی راتاں نوں حضور پاک ﷺ آپ پہرہ دتا کردے تے ایس عمل لئی صحابہ کرام رضی اللہ تعالیٰ عنہم نوں مامور فرمایا تے ایہناں نوں خفیہ طریقے نال ہدایات وی دتی ۔ ابتدا وچ مدینہ دا دفاع انتہائی مشکل تے کٹھن کم سی کیوں جے سارے قبائل اسلام تے گنے چنے شیدائیاں دے خلاف صف آراء سن۔ ایس لئی آپ ﷺ ملت اسلامیہ دے ہر بندے دے اندر سپاہیانہ جوہر بھر دین تے اسلام دے پھیلائو نال رسول اللہ ﷺ دے فوجیاں وچ وادھا ہوندا گیا۔ رسول اللہ ﷺ نے ارشاد فرمایا کہ اے لوکو دشمن نال مقابلے ہون دی آرزو نہ کرو تے اللہ توں عافیت دا سوال کرو تے جدوں مقابلہ ہو جائے تے جم کے لڑو تے جان لوئو کہ جنت تلواراں دے سایاں وچ اے۔ کسے وی ملک دے دفاع لئی فوج فصیل دی حیثیت رکھدی اے۔ اسیں ایہہ حقیقت 65 تے 71 دیاں جنگاں وچ ویکھ چکے آں کہ جذبہ حب الوطنی نال سرشار عوام تے مسلح فوج نے ملک و قوم دے دفاع نوں مضبوط بنایا تے اج وی ساڈے لئی بدامنی فساد ، دہشت گردی ، چاہے اوہ خود کش حملیاں دی صورت وچ تے گولیاں تے دھماکیاں دی صورت وچ، بے گناہ لوکاں نوں قتل، ایہناں دے گھراں نوں مسمار، خانقاہواں، مسجداں، مدرسیاں تے سکولاں اُتے حملے کرن والیاں دا رستہ روکنا ایس صورت وچ ممکن ہوئے گا کہ جدوں عوام دا تعاون ملک دے دفاعی اداریاں دے نال جاری رہوے۔ اسلام دفاع دا جیہڑا تصور سانوں دیندا اے اوہ صرف بیرونی دشمن نال دفاع دا نہیں بلکہ کمزور لاچار مظلوم، بے بس تے مجبور لوکاں دی مدد کرنا تے ایہناں نوں ظالماں دے پنجہ استبداد توں نجات دلوانا وی دفاع اے ایس لئی اہل ایمان نوں ہدایت کیتی گئی اے کہ اوہ ظالم تے مظلوم دونواں دے ساتھی بن جان۔ یعنی ظالم نوں ظلم توں روک کے ایہنوں آخرت دے عذاب توں بچان وچ مدد کرو تے مظلوم نوں ظلم توں نجات دلوا کے ایس لئی امن و راحت دا سبب بن جائو۔ مجبور تے مظلوم لوکاں دی داد رستی نہ کرن ایس وچ غفلت ورتن اُتے اللہ تعالیٰ نے مسلماناں نوں جھنجھوڑدے ہوئے فرمایا۔ ترجمہ: تہانوں کیہ ہو گیا اے کہ اللہ دی راہ وچ ایہناں کمزور، مرداں، عورتاں تے بچیاں دی خاطر نہیں لڑدے جیہڑے کہندے نیں کہ اے اللہ سانوں ایس بستی توں کڈ جتھے دے لوک بڑے ظالم نیں تے ساڈے لئی اپنے ولوں اک محافظ تے مددگار مقرر فرما۔(سورۃ النساء آیت75)
اسلام، سلامتی نال اے تے سلامتی، رحمت و راحت اے جس دا ہر بندا متمنی اے۔ اسلام پوری انسانیت تے خاص طور تے اہل ایمان نوں اتحاد و اتفاق ، اخوت و مساوات تے امن و آشتی دا درس دیندا اے۔ اسلام فساد، بدامنی، حرص تے طمع، بغض و عداوت، تعصب و تنگ نظری ، کساد بازاری، حق تلفی، ناانصافی،ناپ تول وچ کمی، معاشی ومعاشرتی ناہمواریاں نوں دفن کرن دا حکم دیندا اے۔ اسلام دا تقاضا اے کہ پوری دنیا توں باطل نظاماں دا قلع قمع ہوئے تے فطرت دے تقاضیاں توں ہم آہنگ نظام دے ذریعے پوری انسانیت نوں امن و سکون دی ضمانت فراہم کیتی جائے۔