اسرائیل ماضی اپنے موڈھے تے رکھ کے چلدا اے

اسدمفتی

اسرائیل دے نایب وزیراعظم نے آکھیا اے کہ اسرائیل دا ایران خلاف فوجی طاقت دے استعمال دا کوئی ارادہ نہیں۔ اوہناں آکھیا کہ اسرائیل ایران دے داخلی معاملیاں وچ مداخلت نہیں کرے گا۔ اوہناں نے ایہ وی کہیا اے کہ ایرانی صدر جہناںنے حال ای وچ ای تڑھی وی لائی اے ایرانی لوکاں لئی اک وڈا مسئلہ نیں کیوں جے ایہ بندہ نہ تے کوئی وعدہ نبھاندا اے تے نہ ای کوئی حل لبھدا اے۔ ایہدے نال ای اک برطانوی تھنک ٹینک نے ایہ دعویٰ وی کیتا اے کہ ایران دو توں تن ورھیاں وچ ایٹمی ہتھیار بنان دے قابل ہو جاوے گا۔ ایہ دعویٰ انٹرنیشنل انسٹیٹیوٹ فار اسٹرٹیجک سٹڈیز دے سربراہ جان چم مین نے دنیا دی مجموعی فوجی طاقت دے جائزے تے مشتمل ورھے وار رپورٹ دے اجراء دے موقعے تے لندن وچ کیتا اے۔ دعوے تے جوابی دعوے توں ہٹ کے آئو تہانوں ایران اسرائیل تنازعے دے پس منظر وچ اک دلچسپ کتاب دے اقتباسات توں واقف کروانا واں۔
ہارورڈ یونیورسٹی دے اک پروفیسر ڈاکٹر جیرم آرکورسی نے اپنی کتاب ایٹمی ایران وچ ایران تے اسرائیل دے پیشگی حملے نوں بائبل دی تعلیمات دے عین مطابق قرار دتا اے۔ ایس کتاب وچ جیرم آرکورسی نے لکھیا اے کہ ایران نوں ایٹمی ہتھیار بنان دی اجازت دین دا مطلب پوری دنیا دی تباہی تے بربادی دا بٹن اوہدے حوالے کر دینا اے۔ کتاب وچ ایس گل دا دعویٰ وی کیتا گیا اے کہ ایٹمی ایران تل ابیب تے اچانک حملہ کر سکدا اے تے جے تل ابیب تے حملہ ہویا تے پورا اسرائیل تباہ ہو جاوے گا۔ اسرائیل دی تباہی لئی اک ایٹم بمب ای کافی اے۔ ڈاکٹر جیرم آرکورسی نے ایران تے پیشگی حملے نوں بائبل دے فرمان دے عین مطابق قرار دیندے ہوئے ایہ تجویز کیتا کہ اسرائیل عراق وچ امریکی اڈے استعمال کردے ہوئے آسانی نال ایران دی ایٹمی تنصیبات نوں تباہ کر سکدا اے ایس توں علاوہ خلیج فارس وچ امریکی طیارہ بردار بحری جہاز وی حملے لئی استعمال کیتے جا سکدے نیں جیویں کہ ورھے وار رپورٹ دے جائزے وچ کہیا گیا اے کہ ایران دے کول ڈھائی سو ٹن یورینیم فلورائڈ اے جو افزدہ ہون دی صورت وچ 30 توں 50 ایٹمی ہتھیار بنان لئی کافی ہو سکدی اے۔ مصنف کورسی نے 2015ء وچ سامنے آن والی اک رپورٹ دا حوالا دتا اے جہدے وچ تل ابیب نے ایس گل دی تصدیق کیتی سی کہ اسرائیل ایران تے پیشگی حملے دی پہلے ای ریہرسل کر چکیا اے مصنف دے مطابق اسرائیل دے دو اہم شہراں جو اصل وچ مقبوضہ علاقے نیں بیت المقدس تے تل ابیب وچوں کسے وی شہر تے حملہ کیتا گیا تے اوہ اصل وچ تل ابیب تے حملہ سمجھیا جاوے گا تے تل ابیب تے نیوکلیئر حملہ اسرائیل دی معیشت دیاں نینہاں ہلا دیوے گا۔ لکھاں بندے موقعے تے ای مر جان گے۔ ایہدے کجھ گھنٹیاں یاں کجھ دیہاڑیاں بعد ای تابکاری نال ہور ہزاراں بندے لقمہ اجل بن جان گے۔ ایس لئی اسرائیل نوں چاہیدا اے کہ کمانڈو کاروائی راہیں کجھ اہم ایرانی رہنماواں نوں قتل کرکے پورے ملک وچ ہلچل مچا دیوے تے حملے توں پہلاں ایہ کاروائی بہتر ے اہم ثابت ہو سکدی اے۔
کتاب ایٹمی ایران وچ جیرم کورسی نے انتہاپسند عیسائیاں دے اسرائیل دی بقا وچ اہم کردار دا حوالا دیندے ہوئے بائبل دے اقتباسات پیش کیتے نیں اوہ لکھدا اے کہ سیمسن اینڈ ڈیلائلا دی کہانی تے غور کرو ڈیلائلا نے اپنے شوہر نال بے وفائی کیتی۔ اوہنے فلسطینی لوکاں لئی جو اسرائیلیاں دے دشمن نیں اپنے شوہر نوں دھوکھا دتا سیمسن دی طاقت اوہدے والاں وچ سی فلسطینیاں نے اوہدیاں اکھاں کڈھ لئیاں تے وال کٹ دتے۔ سیمسن اپنے گناہواں تے بڑا شرمندہ ہویا اوہدے وال فیر اگ آئے تے اوہدی طاقت وی واپس آ گئی۔ موقع ملدیاں ای اوہنے اپنی طاقت استعمال کردے ہوئے مندر دے دو وڈے تھماں نوں گرا دتا۔ ایس طرح مندر دی چھت اوہناں فلسطینیاں تے ڈگ گئی جو اوہنوں بھینٹ چڑھانا چاہندے سن سیمسن نے ایس طرح اک وڈی گنتی نوں موت دے منہ وچ سٹ دتا پر چھت ڈگن نال اوہ آپ وی ماریا گیا۔ کتاب دے لکھاری نے ایس واقعے نوں مشرق وسطیٰ دے بحران دا حل دسیا اے اوہنے ایہنو ںاسرائیل دا سیمسن آپشن قرار دتا اے۔ بائبل وچ بیان کیتے گئے ایس واقعے دا حوالا دیندے ہوئے اسرائیل دے ایران تے پیشگی حملے دی بھرویں حمایت کیتی اے کہ اسرائیل دے کول ایس توں علاوہ دوجا کوئی راہ نہیں کہ اوہ ایہدے تے پہلے حملہ کر دیوے جیویں کہ اوہنے عراق تے کیتا سی۔ اگے چل کے لکھاری نے آپ ایہ ایہ سوال اٹھایا اے کہ اسرائیل ایران تے حملہ کیوں کرے؟ تے آپ ای ایس سوال دا جواب دے دتا اے اوہ کہندا اے کہ اسرائیل نے قسم کھادی اے کہ ہٹلر دے ہتھوں یہودیاں دا قتل عام ورگا دوجا واقعہ اوہ ہن کدی نہیں ہون دیوے گا واقعہ ایس لئی ہویا سی کہ یورپ دے یہودی مزاحمت نہیں سن کردے پر اسرائیل ہن انج نہیں ہون دیوے گا 5جون 1976 نوں چھ روزہ جنگ دے شروع تے ای اسرائیل نے سرزمین مصر تے کھڑے فضائی بیڑے نوں تباہ کر دتا سی۔ ایہ ایسے قسم دے تحت کیتا گیا جون 1981ء وچ عراق دی ایٹمی تنصیبات تے حملہ وی ایسے قسم دا نتیجہ سی تے ہن جے اسرائیل لئی کوئی دوجا خطرہ موجود اے تے اوہنوں مٹان لئی وی ایہو قسم کم آوے گا۔
فرہاد کو پڑا تھا محبت سے ایک کام
مجنوں لگا ہوا تھا محبت کے کام پر