موجودہ حکومت دی گڈ گورننس تے بیورو کریسی

فیصل ادریس بٹ

حکومتی پارٹی دے اپوزیشن دی تنقید توں بچدے ہوئے اپنی عوامی مقبولیت قائم رکھن دا سب توں وڈا ذریعہ گڈ گورننس ہوندا اے۔ پاکستان وچ گڈ گورننس دی چابی بیورو کریسی دے کول ہوندی اے۔ آئین دے تحت بیورو کریسی توں کم لین دا اختیار حکمراناں دے کول اے ۔ جہڑا حکمران بیورو کریسی نوں درست ٹریک اتے چلان وچ کامیاب ہو جاوے اوہنوں کامیاب قرار دتا جاندا اے۔ پاکستان تحریک انصاف دی حکومت اتے پچھلے ساڈے تن ورھیاں دے دوران سب توں وڈا اعتراض بدانتظامی ای اے۔اسیں ویکھنے آں کہ مرکز تے پی ٹی آئی دی حکومت والے صوبیاں وچ بیورو کریسی بے لگام تے بے ہنگم چل رہی اے۔ وزیراعظم عمران خان تے اوہناں دے ساتھیاں دے چنگی حکمرانی دے سارے دعویاں دے باوجود تے تجزیہ نگار موجودہ حکومت نوں بدانتظامی دا شاہکار قرار دیندے نیں۔ کسے محکمے دی کل سدھی نظر نہیں آندی۔ تحریک انصاف والے آکھدے نیں کہ ساڈا حکمرانی دا پہلے تجربہ نہیں سی۔ اوہ ایہہ جواز وی پیش کردے نیں کہ اوہ مخلوط حکومت وچ نیں‘ لہٰذا اوہناں نوں اتحادیاں نوں مطمئن کرن لئی کمپرومائز کرنا پیندا اے مگر ساڈی رائے وچ ایہدی اک بہت وڈی وجہ اہم سرکاری عہدیاں اتے غیر موزوں افسراں دی تعیناتی وی اے۔
بہت ساری اہم پوسٹاں اتے غیر تجربہ کار تے جونیئر افسر تعینات کیتے گئے نیں۔ سینئر افسراں نوں جونیئر دے ماتحت کر کے گڈ گورننس دا ٹارگٹ حاصل کرن دی کوششاں وی کیتی گئیاں مگر ایہہ تجربہ وی کامیاب نظر نہیں آندا۔ ایہدی وجہ شاید کم لین والیاں وچ کم کرن دا جذبہ‘ ویژن تے طریقہ کار نال ناواقفیت وی اے۔ پنجاب دے پچھلے وزیراعلیٰ میاں شہباز شریف وی کم کردے رہے نیں۔ اوہناں دا آکھنا سی کہ سنیارٹی کوئی معنی نہیں رکھدی‘ بندے نوں کم آنا چاہیدا اے۔ جے پنجاب دی موجودہ حکومت وی ایہ کم کرے تے اوہدے اتے کسے نوں کیہ اعتراض ہو سکدا اے مگر کہندے نیں کہ نقل لئی عقل دی لوڑ ہوندی اے۔ جونیئر افسراں نوں وڈے عہدیاں اتے تعینات کر کے اوہناں نوں اوبلائج تے کر لیندے نیں تے ایہناں افسراں دے سراں اتے فوری کارروائی دے خوف دی تلوار وی لٹکا دیندے نیں مگر تہانوں اوہناں کولوں کم لین دا طریقہ وی آنا چاہیدا اے۔
ہن جے تسیں پنجاب دی بیورو کریسی اتے نظر پاندے او تے چیف سیکرٹری توں لے کے بہت سارے اہم عہدیاں اتے سینئر افسر جونیئرز نوں جوابدہ نظر آندے نیں۔ ایہو حال مرکز دا وی اے۔ بلحاظ عہدہ وڈا جونیئر افسر اپنے توں وڈے گریڈ دے افسر نوں حکم صادر کرن توں پہلے دس واری سوچدا اے۔ سینئرز وچ بددلی دا عنصر وی اک اٹل حقیقت اے جیویں کہ پنجاب وچ تعینات بابر حیات تارڑ دی مثال توں واضح اے جہڑے سینئر ممبر بورڈ آف ریونیو تے گریڈ22دے افسر نیں۔ چیف سیکرٹری پنجاب ڈاکٹر کامران افضل گریڈ21وچ نیںجہڑے بابر تارڑ توں جونیئر ہون پاروں کارکردگی دے حوالے نال نہ صرف اوہناں توں باز پرس نہیں کر سکدے بلکہ بورڈآف ریونیو وچ ہور بہتری لئی تجویزاں وی نہیں دے سکدے تے میٹنگاں وچ وی نہیں بلاندے۔ جے اوہ ایس ایم بی آر دے دفتر چل کے جاندے نیں تے اوہ بلحاظ عہدہ ایس اقدام نوں معیوب سمجھیا جاوے گا۔ جے اوہ بابر تارڑ نوں طلب کردے نیں تے ایہ وی مناسب نہیں سجھیا جاوے گا۔ گو کہ بابر حیات تارڑ محکمہ ریونیو وچ انقلابی اقدامات کر چکے نیں تے عوامی خدمات لئی محکمہ آئے دن اقدامات کرن وچ مصروف اے۔ ڈاکٹر کامران افضل دا آکھنا اے کہ بابر حیات تارڑ ایچی سن کالج وچ میرے سینئر سن تے میں اوہناں نوں وڈا بھرا سمجھنا واں۔ بابر تارڑ دا آکھنا وی ایہو اے کہ ڈاکٹر کامران تے میرے درمیان آئیڈیل تعلقات نیں۔
چیف سیکرٹری دے نال والے دفتر وچ ایڈیشنل چیف سیکرٹری داخلہ ظفر نصراللہ تشریف رکھدے نیں۔ ظفرنصراللہ ڈاکٹر
کامران افضل توں نہ صرف سینئر نیں بلکہ آئندہ کجھ مہینیاں وچ ریٹائرڈ وی ہو رہے نیں۔ ظفر نصراللہ بدقسمتی نال گریڈ22نہ حاصل کر سکے کیوں جے اوہناں اتے مبینہ طور تے الزام اے کہ ماضی وچ جدوں اوہ واٹر اینڈ پاور وچ ایڈیشنل سیکرٹری تعینات سن اوہدوں وزیراعظم ولوں منظور کیتی گئی سمری وچ ردوبدل کرن تے اوہناں نوں معطل کردتا گیا سی تے پروموشن بورڈ وچ اوہناں دی ترقی وی ڈیفر کردتی گئی سی۔ صوبائی سیکرٹری مواصلات کیپٹن (ر) اسداللہ جنہاں نوں ڈاکٹر کامران افضل سانحہ مری دا اصل ذمہ دار سمجھدے نیں مگر انکوائری رپورٹ وچ اوہناں نوں قصوروار ٹھہران دی اجازت نہ ملن تے وی رنجیدہ دکھائی دیندے نیں۔ سیکرٹری اری گیشن کیپٹن (ر) سیف انجم جہڑے چیف سیکرٹری پنجاب دے بیچ میٹ تے قریبی دوست نیں‘ اوہناں نوں روشن پالیسی وچ ناکام ہون دے باوجود ڈاکٹر کامران اوہناں دا تبادلہ رکوان تے کامیاب نظر آندے نیں۔ سیکرٹری ایکسائز وقاص علی محمود دا وزیراعلیٰ تبادلہ کرنا چاہندے سن مگر ڈاکٹر کامران افضل دی درخواست تے اوہناں دا تبادلہ روک دتا گیا کیوں جے وقاص علی محمود ڈاکٹر کامران افضل دے نہ صرف کلاس فیلو بلکہ قریبی دوست وی نیں۔ اوہناں دی تعیناتی وچ محکمہ ایکسائز نے نہ صرف چنگی کارکردگی وکھائی بلکہ ٹیکس ہدف مکمل کیتا جہڑا وقاص علی محمود دا کریڈٹ اے۔
ایسے طرحاں ایڈیشنل چیف سیکرٹری پنجاب جہڑی چیف سیکرٹری پنجاب مگروں دوجی اہم ترین پوسٹنگ سمجھی جاندی اے اوہدے تے علی مرتضیٰ تعینات نیں مگر اوہ اپنی ایس پوسٹنگ توں نالاں نیں۔ علی مرتضیٰ جہڑے ڈاکٹر کامران افضل دے بیچ میٹ نیں اوہناں دی شدید خواہش اے کہ اوہ اپنی تھوڑی تنزلی مگروں ایڈیشنل چیف سیکرٹری داخلہ دے منصب اتے براجمان ہو جان۔ اوہ اک واری پہلے وی ایڈیشنل چیف سیکرٹری داخلہ دے طور تے فرائض انجام دے چکے نیں۔ سیکرٹری انرجی دی اسامی عرصہ دراز توں خالی پئی اے جد کہ پنجاب دے وڈے سرکاری محکمے تے سینکڑاں سکول سولر انرجی اتے ٹرانسفر کیتے جا رہے نیں۔ انرجی ڈیپارٹمنٹ وچ ایس ویلے وڈے وڈے پراجیکٹس زیر تعمیر نیں مگر محکمے دا سیکرٹری لایا ای نہیں جا رہیا تے اوہدا اضافی چارج پرنسپل سیکرٹری ٹو سی ایم عامر جان نوں دے رکھیا اے۔سیکرٹری ٹو سی ایم نہایت مصروفیت والی سیٹ اے مگر ارباب اختیار نے اک قابل افسر نوں اینی ذمہ داریاں دے رکھیاں نیں جدکہ تعیناتی دے منتظر افسران دی اک فوج ظفر موج دستیاب وی اے۔ کجھ عرصہ تک ڈاکٹر کامران افضل دی کارکردگی اتے سوالات اٹھنے شروع ہو جان گے۔ صاحب اختیار اوہناں نوں پچھن گے کہ تسیں بطور چیف سیکرٹری نمایاں کارکردگی کیہ وکھائی تے عرض ایہ اے کہ ڈاکٹر کامران افضل ذہین‘ پڑھے لکھے تے ایماندارافسر ضرور نیں مگر اوہناں نوں دتا کیہ گیا اے جہڑا اوہناںکولوں اوہناں دی کارکردگی پچھی جاسکے؟