شہید حکیم محمد سعید دی خدمات بارے سیمینار

شہید حکیم محمد سعید نے نہ صرف پاکستان بلکہ پوری دنیا وچ طب دی اوازاُچی کیتی: رلتیاں دی گل بات

رپورٹ: آفاق بٹ

اوکاڑہ (نمائندہ خصوصی) شہید حکیم محمد سعید نے نہ صرف طب دا احیاء کیتا بلکہ تعمیرو استحکام پاکستان لئی بے مثال خدمات سرانجام دتیاں تے ملک و ملت لئی گراں قدر خدمات پاروں رول ماڈل قرار پائے۔ اطبا نوں طب دی ترقی تے فروغ لئی اوہناں دے افکار و کردار نوں مشعل راہ بنانا ہووے گا۔ ایہناں خیالاں دا اظہار جناب ریاض الحق جج ایم این اے نے پاکستان ایسوسی ایشن فار ایسٹرن میڈیسن اوکاڑہ دے پربندھ ہیٹھ سیمینار شہید حکیم محمد سعید دی طبی تے ملی خدمات تے طب و اطبا نوں درپیش چیلنجاں دے موضوع اتے میونسپل ہال وچ بحیثیت مہمان خصوصی خطاب کردے ہوئے کیتا جہدی صدارت حکیم محمد حامد نظامی صدر پائم پنجاب نے کیتی۔ ریاض الحق جج ایم این اے نے آکھیا کہ اوہ طب تے اطبا نوں درپیش مسئلیاں دے حل لئی اسمبلی وچ آواز اچی کرن گے تاں جے ساڈے اسلاف دا ورثہ فیر فروغ پاوے۔ حکیم محمد سلیم کھوکھر سیکرٹری جنرل پائم پنجاب نے کلمات استقبالیہ وچ آکھیا کہ پائم شہید حکیم محمد سعید دی یادگار اے۔ ایس جماعت اطبا نے پاکستان وچ ای نہیں دنیا بھر وچ آواز اچی کیتی اے۔ ایہدی جدوجہد پاکستان دی تریخ طب دا روشن باب اے۔ شہید حکیم سعید تعلیم تے تحقیق نوں طب دا بنیادی مسئلہ خیال کردے سن۔ اوہ پاکستان وچ ایس حوالے نال صورتحال نوں مایوس کن سمجھدے سن۔ ایہو وجہ اے کہ ا وہناں نے حکومتاں دے رویے نوں ویکھ کے اپنے وسائل توں ایہناں میداناں وچ پیش رفت کردتی تے ایہدا نتیجہ ایہ اے کہ اج دس جامعات وچ عالمی سطح دی تعلیم ہو رہی اے تے تحقیقی کم جاری اے۔ تعلیم طب دا ریگولیٹری ادارہ اپنے فرائض دی ادائیگی وچ نکام ہو چکیا اے۔ حکیم راحت نسیم سوہدروی سینئر نائب صدرپائم نے آکھیا کہ شہید حکیم محمد سعید نہ ہوندے تے اج طب دا وجود ختم ہو چکیا ہوندا۔ اوہناں نے طب دی تعلیم تے تحقیق نوں عالمی معیارات دے مطابق بنایا۔ طب دا مقدمہ ساری دنیا وچ لے گئے تے ساری دنیا نباتات توں علاج ول راغب اے۔ ایس طرح طب دا اساسی نظریہ فیر توں زندہ ہو گیا اے تے سائنسی اجتماعات دے نظم دا شعور پیدا ہویا اے۔ طب یونانی ‘شرقی دی دوائیاں ہر تھاں ملدیاںنیں تے طبی دوا سازی دے سینکڑاں ادارے معرض وجود وچ آ چکے نیں۔ طب نوں بہ نگاہ حقارت ویکھن دا دور ختم ہو چکیا اے۔ ایم فل تے پی ایچ ڈی اطبا جہڑے خدمت خلق لئی میدان وچ آچکے نیں شہید حکیم سعید دی کاوشاں دا نتیجہ اے۔ حکیم افتخار مبین عرشی پچھلے چیئرمین امتحانی کمیٹی قومی کونسل برائے طب نے اپنے خطاب وچ آکھیا کہ شہید حکیم محمد سعید نے طب نوں زبان عصر دین وچ اہم کردار ادا کیتا۔ کوئی وی علم تے فن عصری تقاضیاں توں ہم آہنگ ہوئے بغیر ترقی نہیں کر سکدا۔ سچی گل تے ایہہ ہے کہ جے اوہ نہ ہوندے تے طب دا وجود ختم ہو چکیا ہوندا۔ اوہناں دی زندگی دا ہر لمحہ طب تے پاکستان لئی وقف رہیا۔ حکیم صاحب دی خدمات دا دائرہ صرف پاکستان تک محدود نہیں اوہ دنیا بھر وچ پہچان رکھدے نیں۔ا وہ اک سچے مسلمان سن تے ہمہ جہت شخصیت سن۔ حکیم حارث نسیم سوہدروی سیکرٹری جنرل پائم لاہور نے آکھیاکہ اوہ اک دیانت دار ‘صنعت کار‘ مفکر‘ ماہر تعلیم‘ مصنف‘ دانشور تے بلندیہ پایہ طبیب سن۔ اپنی آمدنی نال شہر علم وحکمت مدینۃ الحکمہ بنایا۔ ہمدرد فائونڈیشن قائم کیتا تے طب نوں فیر توں حیات نو بخشی۔ حکیم محمد سجاد زخمی پرنسپل اسلامک یونانی میڈیکل کالج لہور نے آکھیا کہ حکیم محمد سعید نے ساری زندگی علم دے فروغ لئی وقف کیتے رکھی۔ ایس حوالے نال اوہناں دا کردار ساڈے ساریاں لئی قابل تقلید اے۔ پائم اوہناں دی فکر دے مطابق طب نوں ترقی دین دے مشن اتے کم کر رہی اے۔ اوہناں دی مساعی توں طب نوںآئوٹ آف ڈیٹ قرار دین دا دور گزر گیا اے۔ ہن ساڈی ذمہ داری اے کہ اسیں طب تے اطبا نوں درپیش چیلنجاں دا مقابلہ کریے تے طب نوں ایہدا درست مقام دوائیاں۔ ایہدے لئی طب نوں جدید خطوط تے استوار کرنا ہووے گا۔ حکیم محمد حامد نظامی صدر پائم پنجاب نے آکھیا کہ پائم شہید حکیم سعید دی قائم کردہ تنظیم اے تے اوہناں دی فکر دے مطابق محترمہ سعدیہ راشد دی سرپرستی تے حکیم عبدالحنان حکیم راحت نسیم دی قیادت وچ سرگرم اے۔ تعلیم تے تحقیق لئی راہواں نوں ہموار کیتا اے تے اطبا نوں متحدتے منظم کیتا جا رہیا اے۔ پائم نے عالمی سطح دے 5جد کہ قومی سطح اتے 20دے کول سمپوزیم کیتے نیں۔ اوہناں نے اطبا نوں آکھیاکہ اوہ پائم دے نال آن تاں جے طب تے اطبا نوں اوہناں دا جائز مقام دوایا جا سکے۔ جناب لیاقت علی شہزاد پرنسپل ووکیشنل انسٹی ٹیوٹ اوکاڑہ نے وی خطاب وچ شہید حکیم محمد سعید نوں خراج عقیدت پیش کیتا۔ ایس موقع اتے ہمدرد دوست اطبا نوں اوہناں دی پائم لئی جدوجہد نوں خراج تحسین پیش کردے ہوئے وثیقہ اعتراف خدمات پیش کیتے گئے نظامت دے فرائض حکیم عمر توصیف نے ادا کیتے۔