بال ادب دا حقیقی ترجمان

اکادمی ادبیاتِ پاکستان دا ’’ادبیات اطفال‘‘

اختر سردار چودھری

بالاں دے ادب دی خدمت دے دعوے دار تقریباً ایس نال جڑے ہر بندہ تے ادارہ اے۔ ادیب وی قاری وی تے پبلشر وی۔ سارے کسے حد تک بالاں دے ادب و ادیب دی خدمت کر وی رہے نیں۔ میں جدوں ویکھنا واں کہ اینے لوک ادب و ادیب دی ترقی تے فلاح لئی کم کر رہے نیں فیر وی ادب و ادیب پہلے توں ودھ زوال پذیر کیوں ہو رہیا اے؟ اج دے ایس کالم دا ایہ موضوع نہیں اے۔ ایہدے تے تسیں وی سوچوتے گل کرو۔ تاں جے علم ہو سکے کہ اینے دعوے دار نیں۔ اینے لوک کم کر رہے نیں۔ فیر وی نہ تے اسیں بالاں وچ ادب دا شوق پیدا کر رہے آں نہ ای کوئی اعلیٰ پائے دی تبدیلی نظر آ رہی اے۔ ایسی تبدیلی جہڑی پورے معاشرے وچ نظر آوے۔ ساڈے بال ادب توں دور ہوندے جارہے نیں۔ بالاں دے ادب و ادیب لئی کم کرن والے اداریاں وچوں اک ادارہ اکادمی ادبیات پاکستان وی اے۔ ایہدی تریخ اتے مختصر جیا چانن کیتے مگروں اگے ودھنے آں۔
اکادمی ادبیات پاکستان‘ پاکستانی ادب دی ترویج تے اشعات تے پاکستانی اہل قلم دی فلاح و بہبود لئی کم کرن والا سب توں وڈا قومی ادارہ اے۔ اکادمی ادبیات پاکستان جنہوں مختصر طور تے پی اے ایل دے نام توں وی جانیا جاندا اے۔ پاکستانی زباناں دے فروغ لئی قائم شدہ ادارہ اے جہدا قیام 1976 وچ مرحوم صدر پاکستان ذوالفقار علی بھٹو دے ہتھیں ہویا۔ پاکستانی زباناں دے فروغ لئی سرگرم عمل ایس ادارے دا صدر دفتر اسلام آباد وچ واقع اے۔ اکادمی ادبیات پاکستان پاکستانی ادب دے فروغ دے سلسلہ وچ مختلف موضوعات تے بہت ساری ادبی تے تحقیقی تے ترجمہ شدہ کتاباں شائع کردا اے۔ علاوہ ازیں ایہ ادارہ پاکستانی ادب دی سال بہ سال کتابیات وی شائع کردا اے۔ اکادمی ادبیات پاکستان دے قیام دا مقصد جتھے اک پاسے پاکستانی زباناں دے ادب دی ترویج تے اشاعت اے اوتھے ای ایہہ گل وی اہم اے کہ اوہ بین الاقوامی ادب نوں پاکستانی زباناں خاص طور تے اردو وچ ترجمہ کرا کے ساڈی زباناں دے علمی تے ادبی سرمائے وچ وادھے دے نال نال پاکستانی ادبی قارئین دنیا بھر وچ تخلیق ہون والے ادب نال روشناس وی کرا رہی اے۔
ایس ادارے دے تحت ادبیات اطفال دے عنوان نال بالاں لئی سہ ماہی ادبی جریدہ شائع ہوندا اے۔ ’’ادبیات اطفال‘‘ دا پہلا شمارہ اپریل 2017 وچ منظر عام اتے آیا۔ اپریل 2022 نوں ادبیات اطفال نوں قائم ہوئے چھ ورھے ہون جا رہے نیں۔ ہن تک میرے علم دے مطابق 17 شمارے شائع ہو چکے نیں۔ ایس جریدے وچ ملک بھر توں بالاں دے ادب دی نگارشات دے نا ل نال غیر ملکی ادب دے ترجمے وی شائع ہوندے نیں۔ ادبیات اطفال سرکاری سرپرستی وچ چھپن والا بالاں دا واحد ادبی جریدہ اے۔ موجودہ عہد وچ بالاں دے ادب اتے بوہتی توجہ نہیں دتی جا رہی ۔ گھراں وچ بالاں نوں کہانیاں سنان دی روایت دم توڑ چکی اے۔ نویں نسل اپنی افکار تے ثقافت توں واقف نہیں رہی۔ سہ ماہی ادبیات اطفال دے مدیر اختر رضا سلیمی تے معاون مدیر ریاض عادل نیں۔ مجلس مشاورت وچ ڈاکٹر محمد افتخار کھوکھر‘ احمد حاطب صدیقی تے رضوانہ سید علی شامل نیں۔
بالاں دے منے پرمنے ادیب‘ شاعر تے سہ ماہی ادب اطفال دے نائب مدیر ریاض عادل بہائوالدین زکریا یونیورسٹی ملتان توں ماس کمیونیکیشن وچ پی ایچ ڈی دی ڈگری حاصل کرن دے نال نال ادب دی خدمت وچ دن رات کوشاں نیں۔ اوہ اپنی ذات وچ اک انجمن دی حیثیت رکھدے نیں۔ جہڑا شخص علم دا فروغ کردا اے اوہ موت مگروں وی زندہ رہندا اے۔ ریاض صاحب ہشت پہل شخصیت دے مالک نیں۔ ملنسار نیں‘ نویں ابھردے ہوئے قلمکاراں دی حوصلہ افزائی کردے نیں۔ اوہناں دے مسئلیاں نوں حل کرن دی کوشش کردے نیں۔ جتھوں تک ممکن ہویا اوہناں دی رہنمائی وی کردے نیں۔
ادارہ ادباء نوں اعزازی شمارہ دین دے نال نال معقول اعزازیہ وی دیندا اے۔ اکادمی ادبیات پاکستان دی اک خاص گل ایہہ ہے کہ ہر اک تحریر کانٹ چھانٹ کر کے شائع کیتی جاندی اے۔ ایہدے وچ تہانوں ادب دا حقیقی رنگ ملے گا۔ عام تے سطحی کہانیاں ایہدے وچ شائع نہیں کیتیا جاندیاں۔ اک اک سطر توں علم ہوندا اے ایہدے تے لکھاری دے نال نال مدیر نے وی محنت کیتی اے تاں جے قاری تک پہنچن والامواد ایس قابل ہووے کہ اوہ ایس توں لطف و تفریح دے نال نال سبق تے معلومات دلچسپ انداز وچ حاصل کر سکے۔
شمارہ نمبر17مینوں ملیا تے میں ایہدا مطالعہ شروع کردتا۔ اکادمی ادبیات پاکستان ولوں (بالاں دے ادب دا ترجمان) سہ ماہی
ادبیات اطفال اسلام آباد دا کجھ دن پہلے ڈاک راہیں اعزازی شمارہ ملیا جہدے وچ میری کہانی دی وی اشاعت ہوئی اے۔ جہدے تے میں انتہائی محترم ہستیاں مدیر اختر رضا سلیمی صاحب تے معاون مدیر ریاض عادل صاحب دا دل توں شکریہ ادا کرنا واں تے 232 صفحیاں اتے انتہائی گھٹ قیمت 100روپے وچ بالاں لئی اک معیاری میگزین دی اشاعت اتے اکادمی ادبیات پاکستان نوں خراج تحسین پیش کرنا واں۔ ڈاک خرچ ادارہ خود ادا کردا اے۔ ادبیات اطفال مینوں تے بالاں دے ادب دا حقیقی ترجمان ای لگیا۔ تسیں جے لکھاری او یا تسیں قاری او تے امید اے کہ تہانوں وی پسند آوے گا۔ 232صفحیاں اتے مشتمل شمارہ جہدے وچ 50توں ودھ ادبا دی تخلیقات شائع ہوندیاں نیں۔