کراچی دی پکار

مطلوب وڑائچ

پورے ملک وچ امن و امان دی صورتحال ماڑی اے۔ کہڑا جرم اے جہڑا کسے علاقے وچ نہیں ہوندا۔ جرائم پیشہ بندیاں لئی ایہہ دور سنہرا جد کہ عام بندے لئی سوہان روح اے۔ قتل‘ ڈکیتی‘ چھینا جھپٹی‘ اغوا، سرکہ بالجبر دیاں وارداتاں معمول بن چکیاں نیں۔ مجرم ڈھیر نیں‘ پولیس اوہناں نال ملی ہوئی نہیں تے جرائم پیشہ لوکاں توں لاتعلق ضرور اے۔ اودھر عدالتاں نے جو کم کرنا اے اوہ وی ایس طریقے نال نہیں کر رہیاں کہ مجرم سزاواں دے ڈر توں عبرت پھڑن۔ ساڈی پولیس جیویں دی وی اے‘ انج ای رہوے۔ دوجے ادارے وی کوئی قابل رشک کارکردگی دے حامل نہیں۔ پاک فوج نسبتاً مضبوط تے منظم ادارہ اے اوہدیاں وی جڑاں کٹن دیاں سازشاں ہوندیاں رہندیاں نیں۔ اداریاں دی اصلاح پارلیمنٹ راہیں ای ہو سکدی اے پر ایتھے تے پارلیمنٹ وی اک تماشا بنی ہوئی اے۔ حکمران وقت دا ڈکٹیٹر ہونا قطعاً ضروری نہیں پر اوہدا مضبوط ہونا ضروری اے۔ مضبوط اوہنوں عوامی مینڈیٹ ای کردا اے۔ ساڈے ملک وچ جے کسے نوں دوتہائی اکثریت ملی تے اوہنے اداریاں نوں مضبوط بنان دی تھاں اپنی ای پروجیکشن کیتی۔ عالمی لیڈراں نال ذاتی تعلقات بنائے تاں جے بوقت مصیبت کم آ سکن۔ ادارے مفلوج ہوندے چلے گئے۔ ج اک ای ادارہ اپ رائٹ ہو جاوے تے بہت سارے مسئلے حل تے اوکڑاں دور ہو سکدیاں نیں تے اوہ ادارہ ساڈی عدلیہ اے پر کاغذ دے پھُلاں توں خشبو نہیں آ سکدی۔ پورے ملک وچ صورتحال ماڑی اے پر سندھ وچ جو کجھ ہو رہیا اے اوتھے جنگل دا قنون اے۔ لوک پتھر دے دور ول جا رہے نیں۔ الطاف تے اوہدی ایم کیو ایم نے کراچی وچ بیڑیاں دے پشتے لا دتے جبر دی رات لمی ہوندی گئی۔ حکیم سعید تے غازی صلاح الدین ورگے نابغہ روزگار الطاف دی شقی القلبی تے سفاکیت دے ڈھائے چڑھ گئے۔
کجھ ورھے پہلاں پاک فوج نے کراچی نوں امن دی راہ تے لیان دی کوشش کیتی جہدے وچ کامیابی حاصل ہوئی۔ کراچی دا امن پرتن لگ پیا‘ روشنیاں بحال ہون لگ پئیاں جو کراچی دے عوام دے دشمناں نوں پسند نہیں آئیاں تے کراچی وچ فیر بدامنی دے بدل منڈلان لگ پئے ایہدی سب توں وڈی وجہ حکمراناں دی نااہلی دے نال نال اوہناں دا کرپٹ ہونا وی اے۔ نسلہ ٹاور کیویں کھڑا ہو گیا‘ اک پراپرٹی ٹائیکون نوں کئی سو ارب دی زمین پنج چھ ارب روپیے وچ الاٹ کر دتی گئی۔ عدلیہ نے گھیرا تنگ کیتا تے ایہ صاحب چار سو سٹھ ارب روپیے دی ادائیگی تے تیار ہو گئے۔ دنیا وچ کتھے ہوندا اے کہ ریلوے ٹریک ویچ دتا جاوے جہدے تے لوک گھر بنا لین‘ انج کراچی وچ ہویا‘ سرکاری ریلوے دی پٹڑی پٹی گئی تے اوہدے تے بستیاں بن گئیاں جہنوں اج دی حکومت وی تحفظ دیندی رہی۔ کراچی امن دا گہوارہ بن رہیا سی کہ اک واری فیر مجرماں دی آماجگاہ بنن لگ پیا اے۔ جتھے ہر قسم دے جرائم پیشہ لوک پائے جاندے نیں۔ بلاول پورے پاکستان نوں مثالی ملک بنان دے دعوے کر رہے نیں سندھ ورگا مثالی بنان گے جتھے جرائم پیشہ بندیاں دے نال نا لآوارہ کتے وی بے قابو نیں۔ پی پی تیراں ورھے توں اقتدار وچ اے پر اک ٹکے دا کم نہیں کیتا۔ جے کم ہوئے نیں حکمران طبقے دے ہوئے نیں۔ عوام پہلے توں زیادہ پس چکے نیں۔ بلاول تے زرداری پورے ملک تے حکمرانی دے خواب ویکھ رہے نیں۔ سندھ ورگا پورے ملک دا حشر نشر ہووے گا جے زمام اقتدار اوہناں دے حوالے ہو گئی تے۔ پچھلے دیہاڑیاں صحافی اطہرمتین نوں ڈاکوئواں نے بے دردی نال قتل کر دتا۔ اوہدے لواحقین اپنے پیارے دا لہو کہدے ہتھ تے تلاش کرن۔ سعیدغنی حکومتی ترجمان نیں اوہ کہندے نیں کہ کراچی وچ سٹریٹ کرائم گھٹ نہیں ہوئے ایہو اک اعتراف ایس حکومت دے خاتمے دے جواز لئی کافی اے۔
کراچی پاکستان دا بزنس ہب اے ایہنوں لٹیریاں توں محفوظ رکھنا ہووے گا۔ اک ڈاکو جاوے دوجا آ جاوے ایہدے نال کراچی ترقی نہیں کر سکے گا۔ کراچی نوں مہاجراں دا شہر کہیا جاندا اے۔ ایہ ٹھیک اے پر جتھے صرف تقسیم ہند دوران یاں بعد وچ ایہناں علاقیاں توں آن والے ای شامل نہیں جو علاقے اج ہندوستان دا حصہ نیں سگوں اوہ لوک وی مہاجر نیں جو سندھ دے اندرون توں کراچی تے حیدرآباد ورگے وڈے شہراں وچ آ کے بسے نیں۔ بلاشبہ ایہ سارے محب وطن نیں کراچی دی ترقی دے خواہش مند نیں ایہناں ساریاں نوں رَل کے کراچی نوں انھیریاں وچ سٹن والیاں دا خاتمہ کرن لئی اکمٹھ ہونا پوے گا۔
اج کراچی دے اندر سندھ دے دراڈے علاقیاں توں ان پڑھ تے گھٹ پڑھے لکھے لوکاں نوں پولیس تے دوجے محکمیاں وچ بھرتی کر لیا گیا اے تے ایہناں لوکاں نوں کراچی نال رتی بھر وی رغبت نہیں۔ ایہ ایتھے اپنی ڈیوٹی نبھان دی تھاں لوکاں دیاں جیباں چوں بٹوے کڈھنا تے پرسن کھوہنا شروع کر دیندے نیں۔ کجھ روپیاں دی خاطر بچیاں دا اغوا تے قتل و غارت وچ ملوث ہو جاندے نیں۔ پچھلے دیہاڑیاں سندھ پولیس وچ اجہے ان گنت واقعات ویکھن نوں ملے۔ جے کرا چی دا امن بحال کرنا اے تے اک کوالیفائیڈ پڑھی لکھی فورس تعینات کرنی ہووے گی تے ایہدا دوجا حل صرف ایہہ وے کہ کراچی وچ گورنر راج لاگو کرکے کراچی نوں فوج تے رینجر دے حوالے کر دتا جاوے۔٭٭