آغا صدف مہدی رضوی ہوراں دے ناں اک شام

رپورٹ: تنویر حسین احمد پور سیال

انسانی معاشرے نو ں آپنیاں بنائیاں ہوئیاں ساریاں شیواں وچ سب تو ددھ کے چنگی تے مایہ ناز آپنی زبان تے ادبیات ہوندیاں نیں ۔زبان تے ادب ای انسان دی ایہوجئی شعوری تے نیم شعوری کوشش اے جیہڑی اوہدا سانجھہ سرمایہ تے میراث وی اے ۔ایہہ شخصیت تے ذہنیت دے اظہارداآلہ ای نئیں ،اک قوم دی رہتل، مزاجی کیفیات دا شیشہ ،اوہدی تہذیبی سرگرمیاں نوں اتے لے جان تے اوہناں نوں تھلے لے کے جان دا پیمانہ ،اوہنوں صحیح یا غلط راہواں تے ٹورن والی موئثر ترین طاقت وی اے ۔ایہئی اوہ محافظ خانہ ایں جیہدے وچ گزرے ہوئے زمانے دیاں ساریاں ریتاں تے یادداشتاں محفوظ ہوندیاں نیں جنہاں نال قوم طاقت تے تحریک پائوندی اے تے اوہ اپنے کماں داحساب کردی اے ۔پروفیسر طاہر ملک ہوراں دی قیادت وچ اگے ودھن آلی’’بزم قلم‘‘ احمد پور سیال دی مشور ادبی تنظیم ایں جیہڑی احمد پور سیال وچادب دی ترقی لئی کوششاں کر رئی اے ۔ احمد پور سیال ادبی لحاظ نال وی مردم خیز اے ۔ایس دھرتی نے اچے ناواں آلے دانشور ،شعراء تے ادیب جمے نیں جنہاں نے احمد پور سیال نوں نہ صرف پاکستان وچ بلکہ دنیا وچ وی ایہنوں اک پہچان دتی ۔صفدر سلیم سیال مرحوم تے کبیر انور جعفری مرحوم ہوراں دا ناں ادبی حلقیاں وچ اج وی عزت تے احترام دے نال لتا جاندااے۔کبیر انور جعفری مرحوم ہوراں دی شخصیت تے تاں تتھیسز تےPHDوی کیتی جارئی اے ۔لمے چر توں احمد پور سیال وچ ادبی سرگرمیاں مک گیاں سن اوہناں نوں اک واری فیر جیوندا کرن دا بیڑہ ریٹائرڈ ہیڈ ماسٹر ملک خادم حسین مرحوم ہوراں دے پترملک محمد طاہر عباس ہوراںجیہناں دا ادبی ناں طاہر ملک اے نے چکیا۔ایس مقصد لئی اوہناں نے نہوںاحمد پور سیال وچ لکے ہوئے ادبی ٹیلنٹ نوں باہر کڈھن لئی ’’بزم قلم ‘‘ دی بنیاد رکھی ۔اج بزم قلم اک وڈھے رکھ دی شکل اختیار کر چکیا اے۔’’بزم قلم‘‘ خالصتاً اک ادبی تنظیم جیہڑی نہ صرف ادب دی ترقی لئی کم کر رئی اے سگوں نویں پیڑھی نوں گندیاں کماں تو بچا کے ااوہناں نوں چنگیاں سرگرمیاں دے آرے لاکیاوہناں نوں آپنیاںتخلیقی صلاحیتاںنوں استعمال وچ لیون دا موقع فراہم کردی اے۔ نویںشعراء آپنا ادبی چا پورا کرن لئی بڑے شوق نال ایس ادبی تنظیم وچ شامل ہورئے نیں ۔ نوجوان شاعر ’’ہمیں کرگئے تنہا ‘‘دے لکھاری اسدرضا سحر ’’بزم قلم‘‘ احمد پور سیال دے صدر نیں ۔بزم قلم کدی نہ کدی ادبی محفلاں سجاکے نویں شاعراں نوں آپنیاں تخلیقی صلاحیتاں دا لوہیا منوان دا موقع فراہم کردی اے ۔ کجھ دیہاڑ پہلاں دنیا دے منے پر منے شاعر دانش نقوی ہوراں دے اعزاز وچ کامیاب محفل مشاعرہ منعقد کرن توں بعد بعد پچھلی راتیں بزم قلم ولوں اسد رضا سحرہوراں دے گھر وچ پاکستان دے اچے شاعر شاعر آغا صدف مہدی رضوی ہوراں دے ناں اک شام دے عنوان نال محفل مشاعرہ منعقد ہوئی جیہدے وچ آغاز سید قیصر مہدی رضوی ہوراں نے بطور مہمان خصوصی شرکت کیتی ۔ نقابت دے فرائض محمد قائم نے سرانجام دتے ۔اک پاسے
جتھے اسد رضا سحرتے ذوالکفل احمد طاہر سمیت مقامی شعراء نے آپنا کلام پیش کرکے ڈاہڈا رنگ جمایا تاں اوتھے ای دوجے پاسے صاحب محفل آغاصدف مہدی رضوی نے آپنیاں چنیاں ہویاں غزلاں دے شعر حاضرین محفل دیاںسماعتاں دے نذر کرکے چنگی داد وصول کیتی ۔اوہناں دے شعر کہن دے نویکلے انداز نوںحا ضرین محفل بڑا پسند کیتا۔ ۔اوہناں دا تلفظاں دی ادائیگی نے سنن آلیاں دیاں سماعتاں اتے ڈونگھے نقش چھوڑے ۔اوہناں دے ایک اک شعرا تے سامعین نے دل کھول کے داد دتی ۔ ’’کی کہنے،واہ واہ، بہت خوب ،مکرر‘‘ دیاں واجاں آئوندیاں رہیاں۔ آغا صدف مہدی رضوی ہوراں نے ماں بولی زبان پنجابی وچ وی اپنا کلام پیش کیتا جیہنوں بڑا پسند کیتا گیا۔اوہناں نے نے نویں پیڑھی دے ادبی ذوق دی تعرید کیتی۔ایس موقع تے گل بات کردیاںہویاں آغا سید صدف مہدی رضوی نے کہیا کہ ادب دے بغیر ذہن بنجر اے۔ذہن دی کھیتی نوں ادب دا پانی دے کے سرسبزتے شاداب بنایا جاسکدا اے۔اوہناں نے خوشی دا اظہار کردیاں ہویاں کہیا کہ نوجوان پیڑھی دا دب آلے پاسے آئوناں نیک شگون ایں ۔ اوہناں نے ادب دے رنگ وکھیرن اتے طاہر ملک تے اسد رضا سحر داشکریہ ادا کیتا۔