ذیشان للہ تو مسیر للہ تک دا سفر

تحریر: آفاق احمد نون

لاہور دیاں رنگینیاں وچ ڈُبیاں ہویاں، انارکلی بازار وچ کسی پرانے ڈھابے تے چاہ پیندیاں ہویاں تے اوہناں سوہنِیاں یاداں نوں اپنے مغز وچ قید کردیاں ایہہ نئیں سوچیا سِی کہ ساڈا ساریاں دا “مسیر” اک دیہاڑے “پورے عالم دا مسیر” بن کے اُبھرے دا۔ مترو! ذیشان للہ نوں اج جگ دا کیہڑا بشر نئیں جاندا؟ پنجاب تے پنجاب دنیا بھر وچ اپنی ماں بولی نال پیار کرن والیاں دے دل وچ اپنی آواز نوں چمبے دے پھُل دی خشبو وانگ ونڈن دی اٹکل وی “مسیر” نوں چنگی طرح آؤندی اے۔ افسوس دے آکھنا پوندا اے کہ اسی اک ایسے دور وچ جی رہ آں جتھے اپنی اپنی ماں بولی نال محبت بڑی گھَٹ اے اگر کوئی ماں بولی دا سیوک ہے تے اوہ وی اس نوں بولن لگیاں بڑی شرم محسوس کردا اے۔ شاید ساڈے لوکاں دے زہن کسی مفلوج کر دتے نیں۔ بڑے گھَٹ لوک نیں جہڑے اس کوشش وچ لگے نیں کہ جگ تے ماں بولی دا پرچار ہووے، پر اوہناں نوں وی مشکلات دا سامنا کرنا پوندا اے۔

انہاں لوکاں وچ اک ہیرا ایسا وی اے جس نیں اس خواب نوں حقیقت دا روپ دتا تے اپنی ماں بولی دا جھنڈا پورے جگ تے چایا تے اپنے اس سفر وچ کامیابی حاصل کرن لئی دن رات اک کر دتی۔ اس ہیرے نوں دنیا اج “ذیشان للہ” یا “مسیر للہ” دے نام توں جاندی اے۔ للہ صاحب دی شخصیت پھلاں ورگی سوہنی اے۔ اوہناں دی اپنی ماں بولی نال محبت اس قدر نمایاں اے کہ اوہ امریکہ جا کے وی اپنی ماں بولی دی شان ودھاندے نیں۔ کدیں اوہ وائٹ ہاؤس دے سامنے اپنے پنجابی لاچے تے کھُسّے وچ آ جاندے نیں تے کدیں اوہ پاکستان وچ بیٹھیاں لوکاں نوں اپنی ماں بولی دیاں مثالاں دے اک چنگا سَنیہا دیندے نیں۔ اکثر ساڈے مُلک وچ پنجابی بولن آلیاں نوں جاہل تے پینڈو سمجھیا جاندا اے، للہ صاحب نیں اس گل نوں کوڑیاں کیتا تے ایہہ پیغام دتا کہ ماں بولی ساڈی بنیادی شئے اے اس دے بناء ساڈی معاشرے وچ کوئی وقعت نئیں۔ للہ صاحب نیں ماں بولی نوں ایڈے سوہنے انداز وچ پیش کیتا کہ پنجابی تے پنجابی دُوجِیاں  قوماں دے لوگ وی اوہناں دے مداح نیں۔ ذیشان للہ دی دی شخصیت دا ہر پَنّا ای قابلِ تعریف اے اس وجہ تو ای ہر پنجابی نوں اوہناں تے ناز اے۔ ساڈی مالک اگے دعا اے کہ اللہ ساڈے مسیر نوں ڈھیر عزتاں تے ترقیاں دیووے تے اِنج ای پنجابی دی خدمت کردا رہوے۔ سوہنی بولی دا سوہنا سفیر۔