امید رکھن وچ کیہ حرج اے؟

ممکن اے میرا تجزیہ غلط ہووے کہ بعض اوقات تسیں جس سیمپل تے اپنا تھیسس کھڑا کردے او اوہ سمیپل بدقسمتی نال حقیقی نتیجے دین وچ نکام رہندا اے تے ایہدی وجہ صرف ایہہ ہوندی اے کہ اوہ سیمپل ای غلط ہوندا ے تے اوہ رائے عامہ دی حقیقی نمائندگی کرن دی تھاں یکطرفہ نتیجے دیندا یاں دوجے لفظاں وچ غیرحقیقی نمائندگی کردا اے تے سارے دا سارا تھیسس ای غلط ہو جاندا اے۔ ایہ گل میں ایس حوالے نال کہہ رہیا واں کہ اکثر اوقات تسیں مسلسل اجہے لوکاں نوں ملدے او جواتفاقاً اک ای نقطہ نظر نال تعلق رکھدے نیں تے تسیں اوہناں دی گل بات تے نظریات پاروں اک رائے قائم کر لیندے او۔ تسیں ایہ رائے قائم کردے ہوئے بالکل وی کسے قسم دی ڈنڈی نہیں ماردے پر ہن اوہدا کیہ کیتا جاوے کہ جس سمیپل نوں تسیں بنیاد بنا کے کوئی نقطہ نظر قائم کردے او اوہ سمیپل ای تہاڈے نال ڈنڈی مار جاندا اے اجہے وچ بھلا تہاڈا کیہ قصور اے؟۔
پچھلے کجھ دیہاڑیاں توں میں مسلسل سفر وچ آں پہلے تے دھی کول سی تے میری کل کائنات تن عدد معصوم بچے سن جہناں دی اپنی ای دنیا سی تے ایس دنیا وچ کوئی سیاست’ کوئی دونمبری تے کوئی بل پیچ نہیں سن۔ ایہ دن سب توں شاندار’ مزیدار تے سکون نال بھرپور سن۔ فیر سفر شروع ہویا تے سارا اطمینان’ سکون تے ساری شانتی رخصت ہو گئی۔ دو دن رچمنڈ’ تن دن ہیوسٹن تے ایہدے بعد ہن لاس اینجلس وچ آں۔ ایتھے برادر خورد تے یارمن شفیق اے تے میں آں۔
شفیق صرف میاں نوازشریف دا متوالا ای نہیں سگوں عمران خان دا سخت ناقد وی اے پر ایہناں دوہاں گلاں دے باوجود اوہ ایہ نہیں من دا کہ اوہ ن لیگیا اے۔ اللہ جانے ایس سفید حقیقت نوں منن وچ کیہ مسئلہ اے کہ اوہ اک فریق لئی اپنی محبت تے دوجے لئی مخالفت دے باوجود اپنے آپ تے کسے سیاسی جڑت دا لیبل لگوان توں صاف انکاری اے ایہ ساریاں گلاں میں ایس بنیاد تے کہہ رہیا واں کہ شفیق دوستاں دے اک واٹس ایپ گروپ وچ دوہاں حوالیاں نال بڑا ای سرگرم رہندا اے تے ایس گروپ وچ جو بہاء الدین ذکریا یونیورسٹی دے شعبہ بزنس ایڈمنسٹریشن توں فارغ التحصیل طلبہ نے اپنے اگے پچھے دے اک دو تعلیمی سیشناں دے پاس شدہ دوستاں نوں شامل کرکے بنا رکھیا اے شفیق تے عبدالرحمن ارشد خوب فساد برپا کیتی رکھدے نیں۔ دوستاں تے یونیورسٹی فیلوز تے مشتمل بزرگاں دے ایس گروپ دا ایڈمن چوہدری اشرف شاد اے جو یونیورسٹی دے شعبہ بزنس ایڈمنسٹریشن دی ایلومینائی دا بانی صدر سن۔ دوستاں تے ہم جماعتاں نال رابطہ رکھن وچ اپنا ثانی نہ رکھن والا چوہدری اشرف شاد ایس گروپ وچ ہر ویلے بیچ بچائو وچ مصروف رہندا اے۔ ایس گروپ وچ زیادہ تر جنگ وجدل دا باعث عبدالرحمن ارشد اے جد کہ شفیق عام طور تے صرف شرارت دی ابتدا کرکے سائیڈ تے ہو جاندا اے۔ ایس گروپ دی اکثریت دو چوراں دے خلاف متحد اے پر ایہناں دو دی وجہ نال گروپ یکطرفہ ہون توں بچیا ہویا اے۔ میرے نال صرف اک دو گروپ اراکین نیں جو تناں فریقاں دی نااہلی’ نالائقی تے غلط بحثاں تے کدی کدائیں اپنی رائے دا اظہار کردے نیں نہیں تے اسیں صرف نوک جھوک توں محظوظ ہون توں علاوہ گھٹ ای دخل اندازی کرنے آں۔
شفیق گروپ وچ اپنی ساری سیاسی تیز طراری دے الٹ میرے نال جنے جن وی رہندا اے پہلاں تے سیاسی گل بات کردا ای نہیں تے جے کوئی موضوع زیربحث آ وی جاوے تے گروپ وچ اپنے مزاج دے الٹ واہوا معقول گل بات کردا اے تے ایس دوران اوہدے وچ اوہ انتہاپسندی بالکل وی وکھائی نہیں دیندی جو وٹس ایپ گروپ وچ اوہدا خاصا اے۔ شفیق دے خیالات تے نظریات دا مینوں تے چنگی طرح پتہ اے ایس لئی اوہنوں تے میں کسے گنتی وچ نہیں لیا رہیا پر ایس واری امریکہ وچ ملن والے سارے یار دوستاں نوں دسمبر’ جنوری دوران عمران خان دے بارے جس مایوسی دا شکار ویکھیا سی ہن اوہناں دی حالت ایس توں کافی بہتر وکھائی دے رہی سی جیویں صرف پنج’ چھ مہینے پہلاں سی پر عمران خان تے اوہناں دے اعتماد دا عالم بہرحال انج دا نہیں جیویں دا دو اڑھائی ورھے پہلاں سی جدوں اوہ ہر اک نال آمادہ برسرپیکار سن۔ ہن اوہ تھوڑے قرار وچ سن۔ اج توں صرف پنج’ چھ مہینے پہلاں اوہ جس طرح دبے دبے لفظاں وچ یاں تھوڑی شرمندگی دے نال عمران خان دی حکومت دیاں خرابیاں’ غیرمنتخب مشیراں تے معاونین خصوصی دے غلط انتخاب’ کرپشن دے خاتمے دی مہم دی نکامی’ کیتے گئے وعدیاں توں مکرنا تے روزانہ دی بنیاد تے لئے جان والے یوٹرنز تے گل بات کردے ہوئے اپنی سابقہ حمایت توں اپنے آپ نوں بری الذمہ قرار دین دیاں کوششاں کردے سن ایس واری اوہناں دی شرمندگی بھاویں گھٹ ہو چکی سی تے عمران خان نال اوہناں دی محبت دوبار لوٹ آئی سی پر اوہناں دے جوش و جذبے دا حال انج دا بالکل وی نہیں سی جیویں کہ عمران خان دے اقتدار وچ آن توں پہلاں یاں اقتدار وچ آن دے فوراً بعد سی۔
کسے نے میرے توں پچھیا کہ سنیا اے پاکستان وچ مقتدرہ دے خلاف بہت زیادہ ہوا چل پئی اے تے کیہ ایہ جمہوریت تے ملک لئی نقصان دہ نہیں؟ میں کہیا ایہنوں تسیں دوجے پہلو نال ویکھو تے ایہ خرابی آخر کار بہتری وچ بدل سکدی اے۔ ممکن اے ایس سجری ہوا دے بعد مقتدرہ اپنی بے جا مداخلت دی پالیسی تے نظرثانی کرے تے اپنے آپ نوں ایہناں معاملیاں توں وکھ کر لوے جہدے تے لوکاں نوں اعتراض اے جے انج ہو جاوے تے ملک وچ جمہوریت تے سیاسی نظام تھوڑا وقت تے لوے گا پر اپنے پیراں تے کھڑا ضرور ہو جاوے گا۔ کیہ پتہ اللہ ایسے خرابی توں بہتری دی صورت پیدا کر دیوے۔ بھاویں اجے ایہ صرف میری امید اے پر امید رکھن وچ بھلا کیہ نقصان اے؟۔٭٭