بشیر رحمانی
ایم آر شاہد
بشیر رحمانی 80 ورھے دی عمر وچ وی شعروادب وچ طبع آزمائی کر رہے نیں تے ادبی حلقیاں وچ ایہناں دی تخلیقات دی پذیرائی دا سلسلہ جاری اے۔ ایہناں دیاں غزلاں دا مجموعہ ”سلگتا سمندر” اک نعتیہ مجموعہ ”بشارتیں” چھپ چکیا اے جد کہ ناول دی صورت وچ اک نثری کتاب ”غم عشق گر نہ ہوتا” وی چھپیا۔ ایس ناول دا دیباچہ مشہور مزاح نگار شوکت تھانوی مرحوم نے لکھیا سی۔
بشیر رحمانی دا تعلق ہندوستان دے آخری مغل تاجدار بہادرشاہ ظفر دے ادبی خاندان نال اے۔ ہن اوہ آپ تے اوہناں دا نوجوان بیٹا نوید مرزا شاعری دیاں اوہناں شاندار روایات نوں نبھا رہے نیں۔ نوید مرزا دی شاعری دیاں وی چار کتاباں چھپ چکیاں نیں۔ اوہ بچیاں دے ادیب دے طور تے وی جانے پہچانے جاندے نیں۔ بشیر رحمانی نے ابتدائی تعلیم گورنمنٹ ہائی سکول ہوشیارپور توں حاصل کیتی۔ سکول دے ہیڈماسٹر خان عثمان خان سن تے اک چنگے شاعر سن۔ جہناںنے طلباء دے ادبی ذوق دی وی حوصلہ افزائی کیتی۔ اوہناں نے وی نظماں تے غزلاں کہنیاں شروع کیتیاں۔
نوجوانی وچ حسن اتفاق نال علامہ ذوقی مظفرنگری دی رہنمائی حاصل ہوئی جہناں نے اوہناں دے ادبی ذوق نوں ہور نکھاریا۔ ایس طرح اوہناں نے ادب دا جہڑا سفر شروع کیتا سی اوہدے وچ بہتری آندی سی۔ بشیر رحمانی نے آکھیا کہ اوہناں دا نظریہ ادب’ ادب برائے زندگی تے زندگی برائے انسانیت اے۔ زندگی ناپائیدار نہیں سگوں ایہ مرن دے بعد وی جاری رہندی اے۔ موت زندگی دے مختصر سکون دا ناں اے۔ جدید ادب دے بارے اوہناں دسیا کہ ایہ صورتحال دور حاضر دے تخلیق کاراں لئی بڑی نقصان دہ اے۔ اج کل مستند زبان نوں جان بجھ کے خراب کیتا جا رہیا اے۔ بشیر رحمانی نے دسیا کہ موجودہ دور وچ ان گنت نوجوان شاعراں دے شعری مجموعے دھڑا دھڑ چھپ رہے نیں جو اوہناں دی نظر چوں گزردے نیں۔ اکثر شاعر جوہر قابل دی صف وچ آندے نیں پر ایہ وی ویکھیا گیا اے کجھ نوجوان راتوں رات مشہور ہونا چاہندے نیں حالاں کہ ایس میدان وچ سخت محنت پہلی شرط اے۔
ایہناں دی تریخ وفات 8فروری 2015ء اے تے ابدی آرام گاہ قبرستان برموداآوا وچ اے۔٭٭