عمران خان دا فوج مخالف بیانیہ

پچھلے وزیراعظم تے پاکستان تحریک انصاف دے سربراہ عمران خان اقتدار توں علیحدگی مگروں بہت پریشان وی نیں تے غصے وچ وی۔ اوہناں دی ایہہ پریشانی تے غصہ قابل فہم اے۔ ظاہر اے دس سال دا منصوبہ اچانک نال زمین بوس ہو جاوے تے انسان دی حالت انج دی ای ہوندی اے۔ عمران خان نوں اک آئینی طریقے دے تحت عدم اعتماد دی تحریک دے ذریعے حکومت توں وَکھ کیتا گیا مگر اوہ بضد نیں کہ اوہناں دے خلاف اک سازش ہوئی اے جہدے وچ امریکہ دا ہتھ اے جد کہ پاک فوج دے سربراہ وی ایہدے وچ شامل نیں۔ اوہ سمجھدے نیں کہ اقتدار صرف اوہناں دا حق اے تے جے اوہ اقتدار وچ نیں تے سب ٹھیک ورنہ پاکستان دے سارے اداریاں سنے سب کجھ ناقابل برداشت اے۔ ایہہ طرز سیاست اوہناں دے علاوہ ملک لئی وی نقصان دہ اے۔ پاکستان نوں ایس ویلے سیاسی استحکام دی بہت لوڑ اے۔ اج ملک دی تقریباً ساری سیاسی جماعتاں اک پاسے نیں جد کہ عمران خان تے اوہناں دی جماعت دوجے پاسے۔
پچھلے ڈھائی مہینے دے دوران عمران خان نے اک خطرناک بیانیے دا پرچار شروع کیتا ہویا اے جہدا غصہ عدلیہ’ فوج تے الیکشن کمیشن سنے ملک دے سارے قومی اداریاں نوں متنازعہ بنا کے دبائو وچ لیانا اے تے نال ای نال اپنے ورکراں نوں متحرک رکھنا’ نوجوان جہناں دی اک وڈی تعداد اوہناں دے جھانسے وچ آندی نظر آندی اے وی سوچے سمجھے ایسے سوچ نوں اگے ودھارہے نیں۔ نوجوان نسل نوں ایس طرح گمراہ کرنا ملک نال دشمنی دے مترادف اے کیوں جے تسیں تے ہمیشہ نہیں رہنا مگر اج دے ایہناں نوجواناں نے کل ملک دی باگ ڈور سنبھالنی اے۔ جے اج اوہناں دے زہناں نوں قومی اداریاں دے متعلق ایس طرح گمراہ کر دتا گیا تے کل نوں معاشرہ کہڑے پاسے پروان چڑھے گا۔ تحریک انصاف دا سوشل میڈیا سیل جہڑا کہ اوہناں دا سب توں موثر ہتھیار اے’ ایس سلسلے وچ بہت متحرک نظر آندا اے۔ ایس سوشل میڈیا سیل دے ذریعے معاشرے وچ مایوسی پھیلائی جا رہی اے۔ سوشل میڈیا اتے متحرک پی ٹی آئی دے اندرون تے بیرون ملک حمایتی انتہائی قابل اعتراض مواد شیئر کر رہے نیں جہدا ہدف مسلح فوج تے اوہدی قیادت اے۔
عام پاکستانی لئی تے ایہہ گل حیران کن ہو سکدی اے کہ عمران خان جہناں دے متعلق عام تاثر ایہہ اے کہ اوہناں نوں اقتدار وچ لیان تے فیر اوتھے برقرار رکھن وچ ملک دے مقتدر حلقیاں دا اہم کردار رہیا اے اوہ کیوں کر ایس طرح دا بیانیہ پھیلا رہے نیں۔ ایہدے برعکس ہر اوہ شخص جہڑا سیاست تے عمران خان دی سوچ نوں سمجھدا اے’ اوہدے لئی ایہہ طرزعمل کوئی اچنبھے دی گل نہیں۔ بعض لوگ شروع دن توں ایس گل دا خدشہ ظاہر کر رہے سن کہ جہڑے دن عمران خان دے اقتدار تے سیاست نوں ذرا وی خطرہ محسوس ہویا تے اوہ کسے وی قومی ادارے دے خلاف مہم چلان توں گریز نہیں کرن گے۔اج جس طرح دی زبان تے لفظ پاک فوج تے اوہدی قیادت بارے عمران خان دی جماعت دے ارکان تے اوہناں دے حامی استعمال کر رہے نیں اوہدی بدترین مثال ساڈی تریخ وچ نہیں ملدی۔
ماضی وچ خود عمران خان میاں نواز شریف تے مسلم لیگ (ن) اتے فوج دے خلاف مہم چلان تے ادارے وچ دراڑ پان جئے الزام لاندے رہے نیں۔ ایہہ طرز سیاست کسے صورت وی قابل برداشت نہیں تے نہ ای انج کرن نال کسے سیاست دان نوں اوہ مطلوبہ نتائج حاصل ہو سکدے نیں جہڑے اوہ سوچ رہیا اے۔ فوج اک قومی ادارہ تے ملک دی بقا دی علامت اے۔ایس کوشش وچ بدقسمتی نال فوج دے کجھ ریٹائرڈ افسر وی استعمال ہو رہے نیں جہڑے کہ انتہائی خطرناک رجحان اے۔ اوہنوں کسے صورت وی سیاست نہیں آکھیا جا سکدا۔ پاکستان اج بہت سارے خطرات نال دوچار اے تے اسیں اپنی فوج نوں تقسیم یا کمزور کرن دا سوچ وی نہیں سکدے۔ اگرچہ فوج دی قیادت نے اپنے آپ نوں سیاست توں وَکھ رکھن دا خوش آئند فیصلہ کر لیتا اے جہدے اتے اوہ سختی نال عمل کردے ہوئے نظر وی آندے نیں تے ہر کسے نوں اوہدا خیر مقدم تے حمایت کرنی چاہیدی اے کیوں جے ایہہ ہر سیاسی جماعت دا ہمیشہ توں مطالبہ تے خواہش رہی اے۔ فوج نوں متنازعہ بنان نال عمران خان تے اوہناں دی جماعت نوں کجھ حاصل نہیں ہووے گا۔
ایہدی مضبوطی ہر پاکستانی دی خواہش تے کوشش ہونی چاہیدی اے۔ عمران خان نے معاشرے دے ہر طبقے تے ہر قومی ادارے وچ اک خطرناک تفریق پیدا کر دتی اے تے ایہو کوشش اوہ ہن فوج دے ادارے دے متعلق وی کر رہے نیں۔
ایس کوشش وچ بدقسمتی نال فوج دے کجھ ریٹائرڈ افسر وی استعمال ہو رہے نیں جہڑے کہ انتہائی خطرناک رجحان اے۔ اوہنوں کسے صورت وی سیاست نہیں آکھیا جا سکدا۔ پاکستان اج بہت سارے خطرات نال دوچار اے تے اسیں اپنی فوج نوں تقسیم یا کمزور کرن دا سوچ وی نہیں سکدے۔ اگرچہ فوج دی قیادت نے اپنے آپ نوں سیاست توں وَکھ رکھن دا خوش آئند فیصلہ کر لیتا اے جہدے اتے اوہ سختی نال عمل کردے ہوئے نظر وی آندے نیں تے ہر کسے نوں اوہدا خیر مقدم تے حمایت کرنی چاہیدی اے کیوں جے ایہہ ہر سیاسی جماعت دا ہمیشہ توں مطالبہ تے خواہش رہی اے۔ فوج نوں متنازعہ بنان نال عمران خان تے اوہناں دی جماعت نوں کجھ حاصل نہیں ہووے گا۔
عمران خان نوں چاہیدا اے کہ اوہ سیاست نوں سیاسی میدان تک ای رہن دین۔ سیاسی عدم استحکام دا کارن نہ بنن۔ حکومت نوں وی چاہیدا اے کہ اوہ سوشل میڈیا دے قواعدوضوابط مرتب کرے تے کسے نوں آزادی رائے دے بھیس وچ اداریاں اتے حملے کرن دی اجازت نہیں دتی جانی چاہیدی۔ ایسے طرح پیمرا دے ذریعے الیکٹرانک میڈیا اتے اک سخت چیک ہونا چاہیدا اے جہڑا سیاسی رہنما’ کارکن یا چینل’ فوج تے عدلیہ سنے مقدم قومی اداریاں دے خلاف منفی مہم چلاوے اوہدے خلاف سخت کارروائی کیتی جاوے۔ عمران خان دی فوج مخالف مہم نوں صرف سیاست دی حد تک نہیں ویکھیا جا سکدا۔ ایہدے نال ہوربہت سارے عزائم جڑے نیں۔