جذبہ نہیں ہردا

فوجاں جذبے نال لڑدیاں نیں تے جذبہ اوس ویلے پیدا ہوندا اے جدوں فوج دی کنڈ تے قوم کھڑی ہوندی اے۔ تریخ سانوں ایہ گل ساڈے ای خطے توں سمجھان دی کوشش کردی اے۔ میں ایتھے زیادہ پرانیاں گلاں تے نہیں کراں گا صرف اوہو گلاں کراں گا جہناں دیاں گواہیاں دین والے جیوندے نیں۔ مثلاً یسے خطے وچ 1971ء وچ مشرقی پاکستان دے لوک اپنی فوج دی کنڈ تے نہیں سن کھڑے۔ پاک فوج دے جوان بڑی بہادری نال لڑے۔ پاک فوج دے افسراں دیاں تعریفاں اوس ویلے دے بھارتی رمی چیف مانک شاہ نے وی کیتیاں۔ پاک فوج ساری بہادری دے باوجود مشرقی پاکستان تے کنٹرول برقرار نہ رکھ سکی ایہدی وڈی وجہ ایہو سی کہ اوتھوں دے لوک فوج دی کنڈ پچھے نہیں سن کھڑے۔ اوتھے بہادری سی’ حوصلہ سی پر جذبہ ٹُٹ گیا۔ جذبے دا ایہ ٹُٹنا سانوں گہرا پھٹ دے گیا۔ تسیں مقبوضہ کشمیر نوں ویکھ لوو اوتھے نو لکھ بھارتی فوج بے بس اے کیوں جے اوتھوں دے لوک بھارتی فوج دی کنڈ تے نہیں سن کھڑے۔ کشمیریاں دا جذبہ آزادی لئی اے بھارتی فوج لئی نہیں’ ایسے بھارتی فوج دے حوصلے پست نیں اوہناں دے ہاں دلیری تے بہادری نہیں بھارتی فوجی اوتھے ظلم کردے نیں تے یاد رہوے کہ ظالم کدی بہادر نہیں ہوندا۔ جدوں کشمیری بھارتی فوج دے نال نہیں تے ایسے لئی صاف وکھائی دے رہیا اے کہ اج نہیں تے کل کشمیر بھارت دا حصہ نہیں رہوے گا۔ تسیں ایران دی مثال لے لوو جتھے فوج تے امریکی ہمدردیاں شاہ ایران دے نال سن پر قوم کجھ ہور سوچ رہی سی ایس سوچ وچ جذبہ سی تے فیر دنیا نے ویکھیا کہ ایسے جذبے نے شاہ ایران نوں سامراجی طاقتاں سنے ہرایا۔ ایس لئی دوستو فوجاں بہادری نال اوس ویلے تک لڑدیاں نیں اوہناں دے حوصلے اوس ویلے تک بلند رہندے نیں جدوں تک کنڈ تے قوم کھڑی ہوندی اے قوم دا جذبہ فوج دے نال ہوندا اے پاکستانی قوم پاک فوج دے نال کھڑی اے۔ پاک فوج نال محبت’ سیاست توں اگے دی چیز اے ایسے لئی پاکستانی قوم دے مقبول ترین لیڈر عمران خان نے کہیا اے کہ فوج مینو ںاپنی جان توں وی ودھ پیاری اے تے پاک فوج ای پاکستان لئی بائنڈنگ فورس اے سانوں اپنی فوج نال ہر صورت محبت کرنی چاہیدی اے۔
پاکستان خلاف سازشاں کرن والے عالمی کھڈاریاں نے ہمیشہ کوشش کیتی اے کہ پاکستانی قوم کسے طرح اپنی فوج دے سامنے کھڑی ہو جاوے پر پاکستان دی عظیم قوم ہمیشہ اپنی فوج دے نال کھڑی رہی اے۔ ایس سلسلے وچ پہلی کوشش 1977ء وچ کیتی گئی جدوں بیرونی دنیا دی مدد نال نام نہاد ٹھیکیداراں نے تحریک چلائی اوسے تحریک دوران بیرونی دنیا توں ایس تحریک دے ناں وکھووکھ چیکس وی پھڑے گئے فیر کجھ عرصہ ایہ اگ ٹھنڈی رہی کیوں جے پاکستان روس خلاف امریکیاں دی جنگ لئی کارآمد بنیا ہویا سی جیویں ای ایہ کم ختم ہویا تے کدی پریسلر ترمیم تے کدی کوئی ہور ترمیم سامنے آن لگ پئی۔ ایسے دوران سامراجی طاقتاں نے چال بدلی تے سیاسی رہنماواں نوں اپنا ہمنوا بنانا شروع کیتا تے ایس طرح کراچی دا امن برباد کر دتا گیا کجھ انج ای بلوچستان وچ وی ہویا۔
ایہ ہمنواہی میمو گیٹ سکینڈل جنم دیندیاں نیں تے ایہو ہمنوا پاکستان وچ منی لانڈرنگ نوں رواج دیندے نیں۔ ایہ پورے دا پورا کھیڈ پاکستان نوں کمزور کرن لئی کھیڈیا جاندا اے۔ 2018ء وچ الیکشن ہوندا اے تے اقتدار توں جان والی پارٹی دے لوک دعاواں کردے نیں کہ ساڈی حکومت نہ آوے کیوں جے معیشت دا جو حال اساں کر دتا اے آن والے لئی حکومت چلانا ممکن ای نہیں ہووے گا تے پاکستان ڈیفالٹ کر جاوے گا۔
2018ء وچ الیکشن ہویا تے پاکستان دا مقبول ترین رہنما جت کے کجھ جماعتاں دی مدد نال حکومت بناندا اے ایسے دوران کرونا ورگی وباء وی سامنے آ جاندی اے یعنی معیشت پہلے ای اوکڑا ںدا شکار سی ہن ایہنوں کرونا دا تڑکہ وی لگ گیا خیر اوہ ہمت نہیں ہاردا جذبے نال لڑدا اے تے اپنے ملک نوں بحراناں چوں کڈھن دی کوشش کردا اے۔ کرونا دی شدت گھٹ ہوندی اے دنیا دسدی اے کہ کرونا نوں شاندار طریقے ن ال ہینڈل کرن والے پہلے پنج ملکاں وچ پاکستان شامل اے۔ ایس دوران پاکستان دی برآمدات ودھیاں نیں’ پاکستان دا گروتھ ریٹ ودھدا اے ڈولدا ہویا پاکستان سنبھلدا ہویا وکھائی دیندا اے تے ایتھے بیرونی طاقتاں دی مدد نال رجیم چینج پروگرام آ جاندا اے ایس پروگرام دے آندے ای مہنگائی اینی ودھدی اے کہ لوکاں دا جینا اوکھا ہو جاندا اے۔ ڈالر آپے توں باہر ہو جاندا اے تیراں جماعتاں رل کے اکلے عمران خان نوں ہران دی کوشش کردیاں نیں پر قوم عمران خان دے نال کھڑی ہو جاندی اے خاص طور تے سٹھ فیصد آبادی جو نوجواناں تے مشتمل اے ایہ تے اوہدی دیوانی نظر آندی اے۔
ہن سامراج دا خیال سی کہ کیوں جے اسیں اک رجیم چینج پروگرام دے تحت پاکستان دے مقبول ترین لیڈر نوں ہٹایا اے ہن ضرور پاکستانی قوم اپنی فوج دے خلاف کھڑی ہو جاوے گی پر سامراجی قوتاں پریشان نیں کیوں جے مقبول ترین لیڈر ای کہہ رہیا اے کہ پاک فوج مینوں میری جان توںودھ پیاری اے جس قوم دے مقبول ترین لیڈر دا ایہ جذبہ ہووے اوہنوں ہرانا سوکھا نہیں کیوں جے جذبہ کدی نہیں ہردا’ جذبہ سازشاں نوں ہرا دیندا اے۔ بقول اسداعوان
میں اپنے یاروں کے نرغے میں قتل ہو جاتا
مگر یہ میرا مقدر بچا گیا ہے مجھے