ورلڈکپ دی جت اتے آئن مورگن نے آکھیا اللہ ساڈے نال سی

کرکٹ دی دنیا وچ تریخ رقم کرن والے انگلش ٹیم دے کپتان دا انٹرنیشنل کرکٹ توں ریٹائر ہون مگروں آکھنا اے کہ ا نگلینڈ شروع دے 5 ورلڈکپ ٹورنامنٹس وچوں 3وچ فائنل تک پہنچیا تے قسمت ویکھو کہ ہر واری شکست کھادی۔ ورلڈکپ 1992دے فائنل وچ پاکستان دے ہتھوں ہار سہن مگروں تے حوصلے ایسے ٹٹے کہ دوبارہ فائنل تک پہنچن وچ 27سال لگ گئے لیکن 14جولائی 2019 دی اوس شام انگلینڈ جت گیا۔ کیویں جتیا…؟ کیوں جتیا؟ ایہہ ایہناں سوالاں دا ویلا نہیں۔ ورلڈکپ جتن مگروں پہلی پریس کانفرنس دے دوران جدوں مورگن کولوں سوال کیتا گیا کہ ایس جیت وچ قسمت دا عمل دخل کنا رہیا؟ تے مورگن دا جواب سی اللہ ساڈے نال سی۔ ایہہ معمولی الفاظ نہیں سن۔ اللہ دا نام سن کے کجھ صحافی کھسیانے انداز وچ ہسے وی’ ایہہ سمجھدے ہوئے کہ شاید مورگن نے طنزاً اللہ دا نام لیتا اے لیکن مورگن نے اوتھے وضاحت پیش کیتی جہدے توں ظاہر ہویا کہ ا نگلینڈ دے ڈریسنگ روم وچ اصل بائنڈنگ فورس اوہناں دی شخصیت اے۔ اج اوہو آئن مورگن اچانک دنیائے کرکٹ نوں الوداع آکھ گئے۔ نیدرلینڈز دے خلاف سیریز وچ مسلسل 2ون ڈے میچاں وچ صفر اتے آئوٹ ہون مگروں اوہناں نے اچانک
ریٹائرمنٹ دا اعلان کر دتا اے۔ مورگن دا آکھنا سی کہ انتہائی غوروفکر مگروں میں فوری طور تے بین الاقوامی کرکٹ چھڈن دا فیصلہ کیتا اے۔ ایہہ آسان فیصلہ نہیں سی کیوں جے ایہہ میرے کیرئیر دا سب توں اہم مرحلہ اے۔ لیکن میں سمجھنا واں کہ ایہو ریٹائرمنٹ دا بہتر ویلا اے۔ میرے لئی وی تے انگلینڈ لئی وی۔ مورگن انگلینڈ دی تریخ دے عظیم ترین کپتان دی حیثیت نال کرکٹ نوں الوداع آکھ گئے نیں۔ اوہ وی ایسے ویلے جدوں رواں سال ٹی 20ورلڈکپ دی تیاریاں شروع ہو چکیاں سن۔ بہرحال معاملہ صرف 2میچاں وچ صفر اتے آئوٹ ہون دا نہیں سی بلکہ مورگن لمے عرصے توں بہت خراب فارم وچ چل رہے نیں۔ پچھلے ڈیڑھ سال وچ اوہ صرف اک واری نصف سنچری بنا سکے نیں۔ ٹی 20فارمیٹ وچ تے خاص طور تے اوہناں دی کارکردگی مایوس کن اے۔ جتھے 18مقابلیاں وچ اوہناں نے صرف 150سکور بنائے۔ ایسے لئی اوہ بوجھ بن کے ٹیم دے نال نہیںرہ سکدے سن یعنی آکھیا جا سکدا اے کہ اوہناں دا فیصلہ بہترین تے بروقت اے۔ انگلینڈ لئی اپنے 12سالہ کیرئیر وچ مورگن نے بہت کجھ حاصل کیتا۔ ورلڈکپ تے خیر ورلڈکپ اے لیکن انفرادی سطح اتے اوہناں نے ون ڈے تے ٹی 20بین الاقوامی مقابلیاں وچ انگلینڈ لئی سب توں بوہتے میچ کھیڈے تے دونویں ای فارمیٹ وچ سب توں ودھ سکور وی بنائے۔ مورگن نوں
2015وچ اوہدوں انگلینڈ دا کپتان بنایا گیا سی جدوں ٹیم ورلڈکپ لئی تیار ہو رہی سی۔ فیر بدترین شکست دے نال ٹیم پہلے ای مرحلے وچ باہر ہو گئی۔ اوہدے مگروں 7سال وچ مورگن نے ون ڈے تے ٹی 20وچ انگلینڈ نوں اک عظیم طاقت بنایا تے ورلڈکپ 2015 دی کارکردگی دی تلافی کردتی۔ اج انگلینڈ ون ڈے تے ٹی 20دونواں دی عالمی درجہ بندی وچ دوجے نمبر اتے اے۔ آئن مورگن 10ستمبر 1986 نوں آئرلینڈ دے دارالحکومت ڈبلن وچ پیدا ہوئے سن۔ اوہناں دے والد آئرش سن جد کہ والدہ انگریز سن۔ جہناں دی وجہ نال اوہ دہری شہریت دے حامل سن۔ لیکن اوہناں نے اپنی
کرکٹ دا آغاز آئرلینڈ ای توں کیتا۔ اوہ انڈر 19کرکٹ توں سامنے آئے تے اک نہیں بلکہ 2ورلڈکپ وچ آئرلینڈ دی نمائندگی کیتی۔ 2006 دے انڈر 19 ورلڈکپ وچ تے اوہ آئرلینڈ دے کپتان سن۔ ایسے سال اوہناں نے اپنے ون ڈے انٹرنیشنل کیرئیر دا وی آغاز کیتا۔ جی ہاں آئرلینڈ ای ولوں جہدے ولوں اوہناں نے کل 23ون ڈے میچ کھیڈے یعنی مورگن دا شمار اوہناں کھیڈاریاںوچ ہوندا اے جہناں نوں 2ملکاں دی نمائندگی دا اعزاز ملیا۔ ویسے مورگن لئی آئرلینڈ توں انگلینڈ منتقلی بہت آسان رہی۔ ٹیسٹ کھیڈن والے ملکاں دی نمائندگی کرن والا کوئی کھیڈاری جے دوجے ملک توں کھیڈنا چاہوے تے اوہنوں گھٹ توں گھٹ 3سال دا انتظار کرنا ہوندا اے لیکن آئرلینڈ اوہدوں آئی سی سی دا ایسوسی ایٹ ممبر سی یعنی ایس شرط دا اطلاق آئرلینڈ دے کھیڈاریاں اتے ہوندا ای نہیں سی۔ ایہو وجہ اے کہ 2007 وچ ای اوہ ویسٹ انڈیز دے خلاف لارڈز ٹیسٹ وچ 12ویں کھیڈاری دے طور تے انگلینڈ ولوں کھیڈدے نظر آئے۔ البتہ ا نگلینڈ لئی ڈیبیو دا موقع مئی2009 وچ جا کے ملیا جدوں ویسٹ انڈیز دے خلاف ون ڈے سیریز لئی اوہناں نوں طلب کیتا گیا۔ مورگن نے پہلا قدم اوہدوں چکیا تے اج اوہ انگلینڈ لئی سب توں ودھ 225ون ڈے انٹرنیشنل میچ کھیڈن دا ریکارڈ رکھدے نیں۔ اوہناں نے 7701سکور بنائے۔ ایہہ وی اک قومی ریکارڈ اے بلکہ ذرا ٹھہرو’ایہناں وچوں 744سکور تے مورگن نے آئرلینڈ لئی بنائے سن یعنی انگلینڈ لئی اوہناں دے سکور دی تعداد 6957اے۔ اپنی 14ون ڈے سنچریاں وچوں اک سنچری وی آئرلینڈ لئی بنائی سی۔ البتہ ٹی 20انٹرنیشنل وچ اوہناں دے سارے102میچ انگلینڈ لئی ای نیں جہناں وچ اوہناں نے سب توں ودھ 2311 سکور بنائے۔ انٹرنیشنل کرکٹ وچ مورگن دے 10ہزار توں ودھ سکور’ 16سنچریاں تے 65نصف سنچریاں وچوں کجھ نوں کڈنا بڑااوکھا کم اے۔ ایہہ کم ایس لئی وی بوہتا دشوار ہو جاندا اے کیوں جے ایہہ مورگن جئے پائے دے بلے باز دی اننگز نیں۔ خیر کوشش کر کے ویکھنے آں۔ ایہہ سال 2012دے آخری دن سن۔ بھارت ٹی 20وچ نمبرون بنن دے کول سی۔ صرف اک کامیابی درکار سی۔ ممبئی دے وانکھڈے سٹیڈیم وچ سیریز دا دوجا تے آخری ٹی 20جاری سی۔ بھارت نے انگلینڈ نوں 178 سکور دا ہدف دتا سی۔ مورگن دی قائدانہ اننگز پاروں انگلینڈ فتح دے کول تے پہنچیا لیکن معاملہ آخری گیند تک چلیا گیا جتھے جت لئی 3سکور درکار سن۔ سٹیڈیم وچ کن پئی آواز نہیں سنائی دیندی سی۔ جدوں اشوک ڈٹھا آخری گیند سٹن لئی آئے تے مورگن نے اک شاندار چھکے دے ذریعے میچ دا خاتمہ کر دتا۔ اوہناں دی 26گینداں اتے 49 سکور دی اننگ نے سیریز وی برابر کر دتی تے نال ای بھارت دا نمبرون بنن دا سفنا وی چکنا چور کر دتا۔