عبدالستار ایدھی

لاوارثاں دے وارث عبدالستار ایدھی 88سال زندہ رہن مگروں 8جولائی 2016 نوں سانوں چھڈ کے دنیا توں رخصت ہو گئے جہڑے خدمت خلق دے شعبہ وچ پاکستان تے دنیا دی جانی مانی شخصیت سن۔ پاکستان وچ خدمت دا جہڑا مشن اوہناں نے شروع کیتا اوہ ناقابل فراموش تے ناقابل یقین کم سی۔ اک لکھ توں ودھ لاشاں نوں چک کے کفن دفن کرن والے ایدھی صاحب نوں لہور مال روڈ دے ریگل چوک وچ کپڑا وچھا کے چندہ اکٹھا کردے میں وی ویکھیا۔ کیہ خوبصورت انسان سن۔ اک پیسہ توں لوکاں دی خدمت کرن والے ایدھی نے ثابت کر دتا کہ انسان کسے وی شعبہ وچ کم کر کے دنیا وچ نام کمانا چاہے تے کوئی مشکل نہیں۔ اپنی محنت تے خدمت نال ایدھی فائونڈیشن نوں نہ صرف پاکستان دی صف اول دی این جی او بنایا بلکہ دنیا دے سب توں وڈی خدمتگار ادارے دے طور تے وی اپنا آپ منوایا۔ ایدھی فائونڈیشن دی شاخاں ساری دنیا بھر وچ پھیلی ہوئیاں نیں۔ ایدھی صاحب دی وفات مگروں اوہناں دی بیوی بلقیس ایدھی ایدھی فائونڈیشن دی سربراہ بنی۔ دونواں نوں 1986 وچ عوامی خدمات دے شعبہ وچ رامون ماگیسے ایوارڈ نال نوازیا گیا۔ بلقیس ایدھی مگروں ہن اوہناں دے پتر فیصل ایدھی ایس مشن نوں لے کے پاکستانیاں دی خدمت کرن وچ مصروف نیں۔عبدالستار ایدھی یکم جنوری
1928 وچ بھارتی ریاست گجرات وچ پیدا ہوئے۔ اوہناں دے والد کپڑے دے تاجر سن جہڑے متوسط طبقہ نال تعلق رکھدے سن۔ عبدالستار ایدھی پیدائشی لیڈر سن تے شروع توں ای پنے دوستاں دے چھوٹے چھوٹے کم کردے رہندے سن۔ جدوں اوہناں دی ماں اوہناں نوںسکول جان ویلے دو پیسے دیندی سی تے اوہ اوہناں وچوں اک پیسہ خرچ کر لیندے سن تے اک پیسہ کسے ہور ضرورت مند دی ضرورت پوری کرن لئی خرچ کر دیندے سن۔ گیارہ سال دی عمر وچ اوہناں نے اپنی ماں دی دیکھ بھال دا کم سنبھالیا جہڑی شدید قسم دے ذیابطیس وچ مبتلا سن۔ چھوٹی عمر وچ ای اوہناں نے اپنے توں پہلاں دوجیاں دی مدد کرنا سکھ لیا سی جہڑی اگے دی زندگی لئی کامیابی دی کنجی ثابت ہوئی۔1947وچ تقسیم ہند مگروں اوہناں دا خاندان بھارت توں ہجرت کر کے پاکستان آیا تے کراچی وچ آباد ہوئے۔ 1951 وچ اوہناں اپنی جمع پونجی توں اک چھوٹی جئی دکان خریدی تے اوسے دکان وچ اک ڈاکٹر دی مدد نال چھوٹی جئی ڈسپنسری کھولی جہناں نے ایہناں نوں طبی امداد دی بنیادی گلاں سکھائیاں۔ ایس دے علاوہ اوہناں ایتھے اپنے دوستاں نوں تدریس ول وی راغب کیتا۔ اوہناں سادہ طرز زندگی اپنایا تے ڈسپنسری دے سامنے بنچ اتے ای سو جاندے تاں جے لوڑ پین تے ویلے تے مدد نوں پہنچ سکن۔ 1957 وچ کراچی وچ بہت وڈے پیمانے اتے فلو دی وبا
پھیلی جہدے اتے ایدھی نے فوری طور تے شہر دے نواح وچ خیمے لگوائے تے مفت دوائیاں فراہم کیتیاں۔ ایس موقع اتے مخیر حضرات نے اوہناں دی دل کھول کے مدد کیتی تے اوہناں دے کماں نوں ویکھدے ہوئے پاکستان بھر توں لوکاں نے اپنے خزانیاں دے منہ کھول دتے تے فیر اوسے امدادی رقم نال اوہناں نے اوہ پوری عمارت خرید لیتی جتھے ڈسپنسری سی تے اوتھے اک زچگی لئی سنٹر تے نرساں دی تربیت لئی سکول کھول لیتا تے ایہو ایدھی فائونڈیشن دا آغاز سی۔ ایہدے مگروں ایدھی فائونڈیشن پاکستان دے باقی علاقیاں تک وی پھیلدی گئی ۔ جدوں کراچی وچ فلو دی وبا پھیلی سی اوس ویلے اک کاروباری شخصیت نے ایدھی صاحب نوں کافی وڈی رقم دی امداد دتی’ اوہدے نال اوہنان نے اک ایمبولینس خریدی جہنوں اوہ خود ای چلاندے سن۔ اج ایدھی فائونڈیشن دے کول سینکڑاں ایمبولینساں نیں جہڑی ملک دے طول و عرض وچ پھیلیاں ہوئیاں نیں۔ کراچی تے اندرون سندھ وچ امداد لئی اوہ خود روانہ ہوندے سن۔ ایدھی فائونڈیشن دی حادثات اتے ردعمل دی رفتار تے خدمات میونسپل دی خدمات توں بہت زیادہ تیز تے بہتر نیں۔ ایس ویلے ہسپتال تے ایمبولینس خدمات دے علاوہ ایدھی فائونڈیشن نے کلینک’ زچگی گھر’ پاگل خانے’ معذوراں لئی گھر’ بلڈ بینک’ یتیم خانے’ لاوارث بچیاں نوں گود لین دے مراکز’ پناہ گاہواں تے سکول کھولے ہوئے نیں۔ ایس دے علاوہ ایہہ فائونڈیشن نرسنگ تے گھرداری دے کورس وی کرواندی اے۔ ایدھی مراکز دی اک خصوصیت ایہہ وی اے کہ ہر ایدھی مرکز دے باہر جھولے دا اہتمام اے تاں جے جہڑی زنانی بچے دی دیکھ بھال نہیں کر سکدی اپنے بچے نوں ایتھے چھڈ کے جا سکے۔ اوس بچے نوں ایدھی فائونڈیشن اپنے یتیم خانہ وچ پناہ دے کے اوہنوں مفت تعلیم دیندی اے۔ فائوندیشن نے صرف پاکستان وچ ای نہیں بلکہ بین الاقوامی سطح اتے وی ترقی کیتی اے۔ اسلامی دنیا وچ ایدھی فائونڈیشن ہر مصیبت تے اوکھے ویلے اہم مدد فراہم کردی اے۔ پاکستان دے علاوہ فائونڈیشن جہناں ملکاں وچ کم کر رہی اے اوہناں وچوں کجھ نام افغانستان’ عراق’ چیچنیا’ بوسنیا’ سوڈان’ ایتھوپیا تے قدرتی آفت (سونامی) توں متاثرہ ملک نیں۔ 16 اگست 2006 بلقیس ایدھی تے کبریٰ ایدھی ولوں ایدھی انٹرنیشنل ایمبولینس فائونڈیشن دے قیام دا اعلان کیتا گیا جہدے تحت دنیا دے امیر یا غریب ہووے یا دنیا دا کوئی وی ملک امریکا’ یوکے’ اسرائیل’ شام’ ایران’ بھارت’ بنگلہ دیش ہووے اوتھے ایہہ ایمبولینس بطور عطیہ دتی جا رہی اے تے اوہناں نوں ہدایت کیتی گئی اے کہ اوہ ایہناں ایمبولینس نوں 5 سال تک استعمال کرن مگروں فروخت کر کے ایہدی رقم خیراتی کماں وچ استعمال کرن۔ فیصل ایدھی دا آکھنا اے کہ اوہ دنیا دا امیر یا غریب ملک ہووے اوتھے مریض مریض ای ہوندا اے۔ ایمبولینس دا مقصد انساناں دی جاناں بچانا ہوندا اے تے مینوں ایس گل دی خوشی ہووے گی کہ ایدھی انٹرنیشنل ایمبولینس فائونڈیشن دی ایمبولینساں نے دنیا بھر وچ انساناں دی جاناں بچائیاں۔ خواہ اوہ لندن’ نیویارک’ ٹوکیو’ تل ابیب’ بیروت تے دمشق ہون۔ ایس طرح انسانیت دی بین الاقوامی خدمت دے حوالے نال ساڈا اک قدم ہور اگے ودھ رہیا اے۔ پاکستان دے علاوہ اسلامی دنیا وچ وی ایدھی نے اک غیر خود غرض تے محترم شخص دے طور تے شہرت پائی اے۔ شہرت تے عزت دے باوجود اوہناں نے اپنی سادہ زندگی نوں ترک نہیں کیتا۔ اوہ سادہ روایتی پاکستانی لباس پاندے سن جہڑا صرف اک یا دو اوہناں دی ملکیت سن۔ ایس دے علاوہ اوہناں دی ملکیت کھلی جوتیاں دا اک جوڑا جہنوں اوہناں نے 20سال استعمال کیتا تے ایہہ وی حقیقت اے کہ ایدھی فائونڈیشن دا بجٹ اک کروڑ دا سی جہدے وچوں اوہ اپنی ذات اتے اک پیسہ وی خرچ نہیں کردے سن۔ ایہو وجہ اے کہ اج ایدھی فائونڈیشن ترقی دی راہ اتے گامزن اے۔ ایدھی مستقبل ول ویکھدے ہوئے آکھدے سن کہ اوہ پاکستان دے ہر 500کلومیٹر اتے ہسپتال تعمیر کرنا چاہندے نیں۔ اگرچہ اوہناں نوں احترام دے طور تے مولاناد ا لقب دتا گیا لیکن اوہ ذاتی طور تے اوہنوں پسند نہیں کردے۔ اوہناں نے کدی کسے مذہبی سکول وچ تعلیم حاصل نہیں کیتی۔ اوہ اپنے آپ نوں ڈاکٹر کہلوانا پسند کردے نیں کیوں جے اوہناں نوں انسانیت دی خدمات اتے پاکستان وچ انسٹیٹیوٹ آف
بزنس ایڈمنسٹریشن کولوں ڈاکٹری دی اعزازی سند ملی ہوئی سی۔ اوہ ایس گل نوں وی سخت ناپسند کردے سن کہ لوک اوہناں دی یا اوہناں دے کم دی تعریف کرن۔ اوہ حکومت یا کسے جماعتاں کولوں امدادوی نہیں لیندے کیوں جے اوہ سمجھدے سن کہ ایہناں دی امداد مشروط ہوندی اے۔ ایسے لئی ضیاء الحق تے اطالوی حکومت دی امداد اوہناں نیواپس کردتی سی۔ ایدھی بذات خود بغیر چھٹی کیتے لمے عرصہ تک کم کرن دے عالمی ریکارڈ دے حامل نیں تے ریکارڈ بنن مگروں وی اوہناں نے انسانیت دی خدمت توں اک دن دی چھٹی نہیں لیتی۔ ہن اوہناں دے نقش قدم اتے اوہناں دے پتر فیصل ایدھی تے لہور وچ ایدھی صاحب دے عاشق تے دیوانے فیصل جلال انسانیت دے ایسے مشن نوں لے کے اگے چل رہے نیں جہڑا عبدالستار ایدھی تے بلقیس ایدھی دا سی۔