دل دریا پاکستان رجسٹرڈ دی چھتر چھاویں اک مشاعرہ

مان جوگ شاعر قیصر عباس قیصر ہوراں دے شعری پراگے ”اسیری”دا مکھ وکھالی اکٹھ پریس کلب قلعہ دیدار سنگھ گجرانوالہ وچ ہویا۔ اکٹھ دے پربندھک محمد شوکت ڈار،مقصودیاور،محمدرمضان تائب ہوریں سن۔ مہان شاعر طارق جاوید رانا ہوراں اکٹھ دی پردھانی کیتی۔ علی احمد گجراتی ہوراں نظامت دا ذمہ چایا۔پریس کلب قلعہ دیدار سنگھ وچ ملک گیر ادبی تنظیم دل دریا پاکستان رجسٹرڈ ولوں عید ملن مشاعرہ تے قیصر عباس قیصر ہوراں دے شعری پراگے”اسیری”دا مکھ وکھالی اکٹھ کیتا گیا۔قاری وقار کاوش ہوراں تلاوتِ کلامِ مبین نال پروگرام دا مڈھ بنھیا۔خوش الحان نعت خواں اسد عباس راز ہوراں ہدیہ نعت پیش کیتا۔ محمد شوکت ڈار ہوراں آن والے متراں دا سواگت کیتا۔طارق جاوید رانا،ایوب صابر،آصف علوی،سیف اللہ حیدر باجوہ،ریاض ارمان، محمود حیدر پیرزادہ،علمدار حیدر اوج ہوریں اسٹیج دی زینت بنے۔علی احمد گجراتی، مقصود یاور، عادل بادشاہ، حاذق امر حاذق تے ڈاکٹر امین جان ہوراں ”اسیری”تے گل بات کردیاں ہویاں اس دے شعری محاسن دا ویروا کیتا۔ تے صاحبِ کتاب قیصر عباس قیصر ہوراں نوں ودھائی پیش کیتی۔ اس دے بعد مشاعرے دا آہر کیتا گیا سی۔ جس وچ سید صداقت علی شاہ،محمد شوکت ڈار،اسد عباس راز، ڈاکٹر امین جان،توصیف یوسف اشعر، قاری وقار احمد کاوش،عادل بادشاہ،مقصودیاور،خلیل الرحمن حماد،عصمت اللہ سیکھو،بنارس عاجز،حاذق امر حاذق،طاہر خیال،ارباب اقبال بریار،طیب گجر،فرقان فرضی،امتیاز قیس چٹھہ۔،مرزا سیف اللہ ساجد،اسلم ہیرا، زبیر حمزہ،انعام اللہ ناصر مان،عدنان ملہی،علی مقتول، اسد بادشاہ تے محمد رمضان تائب ہوراں دے ناں شامل سن۔ مشاعرے دے اخیر تے آن والے پروہنیاں لئی ان پانی دا آہر کیتا گیا سی۔قیصر عباس قیصر ہوراں سبھناں شاعراں نوں اپنا شعری پراگا پیش کیتا۔ پروگرام وچ رلت کرن والے متراں دی ڈھیر گِنتی دے باجود علی احمد گجراتی ہوراں پروگرام نوں بڑے چج سیانف نال سنبھالیا تے اگے ٹوریا۔ جس پاروں پروگرام بڑا ویلے سر سِرے چڑھیا۔اس تے سارے متراں ولوں انہاں نوں شاباش دتی گئی۔کہ دو حصیاں تے مشتمل اک وڈا پروگرام ریکارڈ وقت وچ مکمل ہویا۔ ادبی حلقیاں ولوں دل دریا پاکستان دی ایس ادبی سیوا و کاوش نوں ڈھیر سراہیا جاریہا اے۔مجمان شوکت ڈار ہوراں دا آکھنا سی کہ اسیں اپنی تنظیم دل دریا پاکستان رجسٹرڈ دے پلیٹ فارم تے اجہے پروگراماں دا اگے وی بڑے مان نال پربند کردے رہواں گے۔