شکر اے گل تے سمجھ آئی

جان عجب مصیبت وچ اے سچ بولو تے لوک اعتبار نہیں کردے تے جھوٹ بولن تے دل راضی نہیں۔ ہن دسو بندہ کیہ کرے؟ سچ تے ایہو اے کہ کسے نوں نہیں پتہ کہ ملک وچ کیہ چل رہیا اے تے ایہ کدوں تک چلے گا۔ ہاں! خواہش نوں خبر بنا لوو تے گل اے۔ ہن بندہ کیہ لکھے؟ پاکستان دی تے گل ای چھڈو اودھر امریکہ وچ وی ایہ عالم اے کہ ہر بندہ پریشان اے تے جس دوست دے نال وی اوہدی گڈی وچ بہہ کے سفر کیتا اے اوہ دوجے یاں تریجے چوک تک تے صبر کردا اے تے فیر اوہدے توں اگلے چوک دی نکر تے بنے ہوئے پٹرول پمپ جہنوں امریکہ وچ گیس سٹیشن کہندے نیں دے کنڈھے تے لگے ہوئے الیکٹرانک بورڈ تے چمکدی ہوئی پٹرول دیاں قیمتاں تے نظر ماردا اے تے فیر دسدا اے کہ پٹرول پچھلے کجھ مہینے وچ تقریباً دونی قیمت دا ہو گیا اے۔ کیلیفورنیا وچ تے ہور وی برا حال اے۔ امریکہ وچ ساڈے الٹ پٹرول دی قیمت حالاں کہ حکومتی کنٹرول وچ نہیں تے ہر کمپنی اپنی مرضی نال قیمت لاندی اے تے مارکیٹ وچ بڑی مسابقت تے مقابلے دا رجحان اے پر ایہدے باوجود قیمتاں اسمان تے نیں تے اودھر کیلیفورنیا وچ باقی امریکہ توں تیل تقریباً اک ڈالر فی گیلن مہنگا اے۔
اک پاسے کیلیفورنیا وچ پٹرول دی قیمت باقی امریکہ توں ڈھیر ودھ اے تے دوجے پاسے ایہ عالم اے کہ تھاں تھاں تیل کڈھن والے نلکا نما کھوہ نیں تے مسلسل اُتے تھلے ہو کے چل رہے نیں تے تیل کڈھی جا رہے نیں۔ عالم ایہ وے کہ شاپنگ مال دی پارکنگ لاٹ دے اندر تن چار تیل دے نلکے چل رہے نیں۔ پرانے ہینڈ پمپ دی ہتھی وانگوں لمبے جہے گارڈر دے اگلے سرے تے چنج جہی بنی ہوئی اے تے مسلسل کسے پرندے وانگوں اُتے تھلے ہل رہے نیں جیویں دانہ چگ رہے ہون حالاں کہ اک میکڈونلڈ دی پارکنگ وچ جالی نال حفاظتی واڑ بنی ہوئی اے تے اوہدے اندر ایہو تیل دا نلکا چل رہیا اے پر تیل دی قیمت اے کہ قابو وچ نہیں آ رہی۔ میں شفیق توں پچھیا کہ ایدھر سارے امریکہ وچ ایناں تیل نکل رہیا اے کہ باہروں بہت ای گھٹ منگوانا پیندا اے زیادہ کرایہ وی نہیں پے رہیا کسے ہور ملک دی زور زبردستی وی نہیں فیر وی تیل ایناں مہنگاکیوں اے؟ کیہ زمین نے سستا پٹرول کڈھن تے پابندی لا دتی اے؟ کیہ آپ تیل نے اپنی گھٹ قیمت تے باہر آن توں انکار کر دتا سی؟ تیل نوں کڈھن یاں صاف کرن دی قیمت دونی ہو گئی سی؟ جے انج نہیں تے فیر تیل 55′ 60 ڈالر فی بیرل توں ودھ کے اک سو ڈالر فی بیرل توں وی اُتے جا چکیا اے جے ایہدی وجہ روس تے یوکرین دی جنگ اے تے آخر الاسکا’ نیومیکسیکو’ کیلیفورنیا’ ٹیکساس تے اوکلاہوما وغیرہ چوں نکلن والا امریکی تیل ایس جنگ دی زد وچ کس طرح آ گیا اے؟ شفیق نے کہن لگا: تہاڈے سوال تے ٹھیک تے بڑے مناسب نیں پر میرے کول ایہناں سوالاں دا کوئی منطقی جواب نہیں ساریاں تیل کمپنیاں جو آخر وچ جا کے صرف پنج چھ وڈیاں کمپنیاں دا لٹ مار کرن والا کارٹل نکلدا اے کسے دے کنٹرول وچ کیوں نہیں؟ شفیق ہس کے کہن لگا تسیں تن چار دن پہلے شاید امریکی صدر جوبائیڈن دی لاچاری نہیں ویکھی۔ اوہ ایس بحران بارے گل بات کر رہیا سی تے تنگ آ کے کہن لگا کہ ایہناں تیل کمپنیاں نے ایناں پیسہ بنا لیا اے ایناں پیسہ تے اللہ دے کول وی نہیں۔
اُتوں کیلی فورنیا وچ ہسپانوی زبان نے بڑا کنفیوژ کر رکھیا ے۔ لکھدے انگریزی دا جے نیں تے اوہنوں پڑھدے ح نیں۔ شہر دا ناں لکھن وچ سان جوزے اے پر اوہنوں پڑھدے سان ہوزے نیں۔ ایہو حال صحرائے مہاوی دا اے جہنوں لکھدے مجاوی نیں پر پڑھدے ہوئے جیم نوں ”ہ” وچ بدل دیندے نیں۔ اک تھاں El Pollo Loco لکھیا ہویا سی پچھیا کیہ اے تے پتہ لگا کہ میکسیکن کھانیاں دی اک ریسٹورنٹ چین اے تے پڑھن وچ ال پویولوکو اے۔ پتہ لگا کہ پولو دے دو عدد ایل خاموش یعنی سائلنٹ نیں۔ وجہ پچھی تے کہن لگے واللہ عالم ایہدی کیہ وجہ اے۔ اودھر سان ہوزے اپڑے تے اک سڑک دا ناں تھاال کمینو۔ نوید توں پچھیا کہ ایہ ”ال” ہسپانوی اے یاں عربی والا۔ جواب ملیا ہسپانوی والا اے پر ایہنوں عربی دے متبادل وی سمجھ لوو تے کوئی حرج نہیں۔ فیر پچھیا کہ ایس ”کمینو” توں کیہ مراد اے؟ ایہ اردو والے کمینے توں نکلیا اے یاں ایہ وی ہسپانوی لفظ اے؟ نوید نے ہس کے کہیا ہے تے ہسپانوی پر تسیں ایہنوں بے شک اردو والا ای سمجھ لوو۔
نوید کہن لگا: تسیں میرے توں اینیاں گلاں پچھ لئیاں نیں کوئی گل میں وی پچھ سکنا واں’ میں کہیا پچھ لوو’ کہن لگا: پاکستان وچ کیہ ہو رہیا اے؟ میں کہیا میاں! ایہ سوال تے نہ ہویا سدھی سدھی پریشان کرن والی گل ہو گئی۔ جتھے کنفیوژن دا ایہ عالم ہووے کہ چوہدری شجاعت حسین تے چوہدری پرویزالٰہی ورگے کائیاں تے اندر دی خبر رکھن والے بلکہ اڈدی چڑی دے پر گنن والیاں دے بااعتبار تے قدیمی خدمتگار ہون تے ہر پالیسی دے بنان وچ کسے حد تک حصے دار ہون آپ اینے کنفیوژ ہون کہ ایہ فیصلہ تک نہ کر پا رہے ہون کہ کس فریق دے نال کھڑے ہونا اے تے اوہناں ایہ وی سمجھ نہ آ رہی ہووے کہ اگے کیہ ہون جا رہیا اے تے بھلا پردیسی ایہ گل کیویں دس سکدا اے کہ کیہ ہو رہیا اے تے کیہ ہون جا رہیا اے؟ ایسے کنفیوژن دے بارے آخر چوہدریاں نے فیصلہ کیتا کہ ادھا خاندان اک پاسے ہو جاوے تے باقی ادھا ٹبر دوجے پاسے کھڑا ہو جاوے تے تسیں آپ اندازا لا لوو کہ حالات کنے پیچیدہ تے سیاسی بساط تے کیسا گھڑمس مچیا ہویا ہووے گا جنہے مقتدرہ دے ایہناں بڑے وفاداراں تک نوں وی پریشان کرکے رکھ دتا اے۔٭٭