مشتاق بٹ ۔۔۔۔۔ پنجابی زبان دے سب توں کامیاب آگو

الیاس گھمن

مشتاق بٹ جی پنجابی زبان نوں اوہدے حق دوان دی تحریک دے سبھ توں کامیاب آگو سن۔ آپ نے 17 جون 1925 نوں موچی دراوزہ لاہور دے اندرلے علاقے وچ وسے اک درمیانے میل دے ٹبر وچ اکھ کھولی’ اوہناں دے پیو غلام قادر بٹ اک محنتی انسان سن’ اوہناں ڈاڈھے شوق نال پڑھا کے اپنے لاڈلے پتر مشتاق نوں وکیل بنایا سی۔ مشتاق بٹ جی نے ضلع کچہری لہور وچ وکالت شروع کردتی جد کہ اپنا دفتر 9۔اے شاہ عالم مارکیٹ وچ بنایا۔ ایہہ دفتر ای بعد وچ پنجابی لہر دا گڑھ بنیا ایتھے ای اوہناں جولائی 1970 دے شروع وچ ”دیس پنجاب محاذ وی انینہ رکھی تے نال ای پنجابی زبان دے حق منوان لئی عملی جتن شروع کردتے ایم اے پنجابی شروع کروان لئی سرکار تے دبائو پاون دا متا پکایا گیا۔ ایس سلسلے وچ 17 جولائی 1970 نوں مستاق بٹ جی دے سدے تے وڈی گنتی وچ لوک موچی دروازے والے میدان وچ اکٹھے ہوئے۔ بہت سارے لوک شنگھارے ہوئے گڈے تے ریڑھے وی لے کے ایتھے آئے سن پچھلے پہر تیک لوکائی دا ایہہ ہڑھ اک ریلی دا روپ دھار چکیا سی۔ پاکستان دی تریخاں وچ پہلی وار مال روڈ تے پنجابی زبان دے حقاں لئی نعرے ماردے لوکاں دا جلوس وڈی شان نال اپنی منزل تیک پہنچ گیا۔ ایس جلوس وچ مشتاق بٹ تے دوجے آگوواں جو منگاں کیتیاں سن اوہناں پاروں ای سرکار پنجاب یونیورسٹی وچ ایم اے پنجابی دیاں جماعتاں شروع کروا دتیاں۔ اپنیاں میں نگاں دے پورا ہون تے ستمبر 1970 وچ اک وار فیر دیس پنجاب محاز” نے جولس کڈھیا۔ ایس بھرویں تحریک دا ای سنیا سی پئی سرکار نے گوڈے ٹیک دتے تے سرکاری ریڈیو توں پنجابی خبراں نشر کرن دا شیڈول وی پکا کر دتا۔ اگلے سال 30جولائی 1971 نوں اک بھرویں پریس کانفرنس کر کے مشٹاق بٹ جی نے پنجابی زبان تے ثقافت دے ودھارے لئی 14 منگاں پیش کیتیاں۔ ایہناں وچ ریڈیو توں بالا لئی تے پڑھیاراں لئی وکھ وکھ پنجابی پروگرام شروع کرن’ ہر روز مقامی خبراں پنجابی وچ نشر کرن’ پنجابی صوفی شاعراں دے مزار بناون’ سڑکاں گلی محلیاں دے ناں وڈے پنجابی لکھاریاں دے ناواں تے رکھن تے سرکاری ملازماں نوں پنجابی لباس پہنائون جہیاں منگاں شامل سن۔ مشتاق بٹ جی دے ایہناں تگڑے آہراں کر کے ای ریڈیو توں پنجابی پروگرام شروع کرن دیاں منگاں وی منیاں گئیاں۔ مشتاق بٹ جی پنجابی بولی توں پرائمری توں پڑھان تے سرکاری زبان بناون دے بہت وڈے حمایتی سن پر ایہہ ریجھاں پوریاں نہ ہو سکیاں تے اوہ اپنی حیاتی دے اخیری ساہواں تیک ایہناں منگاں دے پورے ہوون دی اڈیک کردے رہے۔ مشٹاق بٹ جی نے 17 جون 1986 نوں اکھاں میٹیاں تے اوہناں نوں میانی صاحب قبرستان وچ دفن کیتا گیا۔ اوہناں دے وارثاں وچ اک دھی تے تن پتر شامل نیں۔