حق سچ دی واج۔۔۔۔ مشتاق بٹ

ڈاکٹر محمد ریاض شاہد

پنجابی زبان دی ترقی تے ودھا واسطے ویلے ویلے دے نال کجھ اجیہے بہادر میدان وچ آئے جہناں وقت دی واج دا بھرواں ساتھ دتا۔ اجیہے مہان پہادراں وچ مشتاق بٹ دا ناں عزت تے احترام نال لیا جاندا اے۔ 1970 تے 1980 دے دھاکے وچ ایہہ ناں چن وانگر چکیا۔ اوہناں دیس پنجاب محاذ دے پلیٹ فارم توں پنجابی زبان دے حق حقوق لئی آواز بلند کیتی۔ اک وکیل دے طور تے اوہناں نوں حق واسطے اگوائی کرن دا ول آئوندا سی۔ ایہناں دے نال ادبید وستاں دا اک وڈا گروپ وی موجود سی۔ ڈونگھے دریا وچ چھال اوہ ماردا اے جیس نوں تیرن دا ول وی آئوندا ہووے۔ ایس حوالے نال مشتاق بٹ پورے سن۔د یس پنجاب محاز دے بانی ہوون دے ناطے نال اوہناں 1970 وچ پاکستان دی تریخ وچ پہلی واری مال روڈ اتے پنجابی زبان نوں حق ودان لئی اک وڈے جلوس دا آہر کیتا۔ ایس جلوس وچ گڈے تے ریرھیاں نوں سجا بنا کیتے بلداں نوں شنگار دے دو وار جلوس کڈھے تے سرکار اگے کجھ مطالبے رکھے گئے۔ اپنے مطالبات وچ ایہناں حکومت کولوں پنجاب یونیورسٹی لہور وچ ایم اے پنجابی دیاں کلاساں شروع کرن ریڈیو پاکستان لہور توں پنجابی خبراں تے بالاں دا پنجابی پروگرام نشر کرن دی منگ کیتی۔ جلوس بڑا کامیاب رہیا۔ ہر پاسے پنجابی پنجابی دے نعرے وجن لگ پئے۔ ادبی محفلاں’ مشآعریاں تے اخباراں رسالیاں وچ دھماں پہ گئیاں۔ تحریک دے لیڈراں دا ایکا سی اوڑک مشتاق بٹ ہوراں اپنے حق حقوق دی جنگ جت کے پنجابیاں دا سر فخر نال بلند کر دتا۔ اج پنجابی جیہڑے مقام تے کھڑی اے ایس دا کریڈٹ مشتاق بٹ ہوراں نوں جاندا اے۔