پِلاک ولوں عشرہ شانِ رحمة للعالمینۖ موجب خواتین دی محفلِ نعت دا پربندھ

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ عشرہ شان رحمة للعالمینۖ دے حوالے نال محفل نعت (خواتین ) ہوئی جہدے وچ محترمہ خدیجہ عمر (ایم پی اے) نے بطور اچیچے پروہنے رلت کیتی۔ ثنا خوان مصطفیۖ وچ بشریٰ صادق، شبانہ عباس، ثمینہ ملک، نگہت اسماء گلزار، عزم وحید، ہما عمران، حافظہ مصباح حفیظ، اسماء شرف الدین تے حافظہ فائقہ عباس شامل سن ۔ محترمہ خدیجہ عمر (ایم پی اے) نے آکھیا کہ ساڈی دنیا تے آخرت دی فلاح حضورۖ دے اسوۂ حسنہ اتے عمل کرن وچ اے۔ حضورۖ نال محبت دا تقاضا اے کہ اسیں آپ دی تعلیمات اتے دل وجان نال عمل پیرا ہو کے اللہ دے حضور سرخرو ہوجائیے۔ ساڈے اتے جہنی وی عنایتاں نیں اوہ حضورۖ دے توسل نال نیں۔ ایس موقعے اتے ڈائریکٹر جنرل پلاک ڈاکٹر صغرا صدف نے آکھیا کہ پنجاب حکومت ولوں اعلان کردہ ”عشرہ شان رحمة للعالمینۖ” دے سلسلے وچ پلاک نے مختلف تقریباں دا پربندھ کیتا اے۔ ایسی بابرکت محفلاں دے ذریعے ساڈے دلاں دا زنگ اتردا اے تے روح نوں نویں تازگی نصیب ہوندی اے۔ حضورۖ دا امتی ہون دے ناطے ساڈا فرض اے کہ اسیں آپ دی تعلیمات توں اپنی حیاتی دے سارے شعبیاں وچ رہنمائی حاصل کرئیے۔ اوہناں نے ایس گل دا وی اعادہ کیتا کہ پلاک ہمیشہ ایسے بابرکت پروگراماں دا پربندھ کردارہوے گا۔ محفل نعت مگروں ساری خواتین نے بارگاہ رسالتۖ وچ کھڑے ہو کے درودوسلام پیش کیتا۔