سیاسی لیکس تے ملکی سلامتی

ایوان صدر یاں وزیراعظم کسے وی ملک دے سب توں ودھ محفوظ ہوندے نیں جہناں ملکاں وچ بادشاہت اے اوتھے شاہی محلات دی سکیورٹی فول پروف ہوندی اے۔ ساڈے ایتھے جس طرح نال وزیراعظم ہائوس دی سکیورٹی بریچ ہوئی اے اوہ پاکستان دی سلامتی تے ساکھ لئی تباہ کن اے۔ وزیراعظم ہائوس وچ ہون والی گل بات جس طرح سامنے آئی اے اوہدے توں لگدا اے اوہ جو وی گل بات ہوندی اے اوہ سربازار تے سرعام ہو رہی اے۔ ایوان صدر تے وزیراعظم ہائوس دا مکین جو وی ہووے اوہدے توں ہٹ کے اوتھے ہون والی گل بات دا اک وی لفظ دا باہر آنا وڈے وڈے سوالات نوں جنم دیندا اے۔ ایہناں آڈیو لیکس نے پاکستان وچ اک ہلچل پا دتی اے۔ عالمی سطح تے لیکس دا جائزہ لیا جاوے وکی لیکس سب توں وڈی سی۔ اوہدے وچ وی کئی حوالیاں نال پاکستان دا ناں آیا سی۔ ایہ کدھرے ہور توں لیکس ہوئی تے فیر دو تن ورھے پہلاں پاناما لیکس سامنے آئیاں۔ جہدے پاکستان تے گہرے اثرات پئے۔ اوہنے پاکستان وچ زلزلہ برپا کر دتا سی جہدے آفٹرشاکس ہن تک محسوس ہو رہے نیں۔ کدی تے ایہ شاکس اپنی شدت وچ بھنچال والی کیفیت رکھدے نیں۔ عمران خان دی حکومت دا خاتمہ وی آفٹرشاکس وچ شامل اے۔ میاں نوازشریف دی نااہلیت’ اوہناں نوں قید تے جرمانے دی سزا وی پاناما لیکس دا ای نتیجہ سی۔
جدوں دنیا دی کجھ مشہور لیکس دی گل ہوندی اے تے اوہدے وچ امریکہ وچ ہون والے واقع واٹرگیٹ نوں زیادہ شہرت ملی۔ جون 1972ء وچ امریکی تریخ دا سب توں وڈا سیاسی سکینڈل سامنے آیا جو دو ورھے بعد ریپبلکن صدر رچرڈ نکسن دے عہدے توں مستعفی ہون دا کارن بنیا۔ 16 تے 17 جون دی درمیانی رات پنج بندے واٹر گیٹ ہوٹل وچ واقع ڈیمو کریٹک پارٹی دے دفتر وچ وڑے جہناں نوں موقعے تے ای پھڑ لیا گیا سی۔ ایہناں بندیاں نوں ذمہ داری دتی گئی سی کہ رچرڈ نکسن دے مخالفین بارے معلومات حاصل کرن لئی فوٹواں لوو تے ڈیموکریٹک پارٹی دے دفتر وچ مائیکرو فون لائو۔ دوجی شہرت پان والیاں ایہناں لیکس وچ پینٹاگون پیپرز’ پلیم گیٹ’ کیبل گیٹ’ ٹریٹی آف گوادل’ پورہیڈ لگوسکینڈل’ میک کرسٹل وار پلان’ اپاچی ہیلی کاپٹر شوٹنگ’ سارہ پلنز ای میلز’ لل وائن دا لیک شامل نیں۔ ایہناں وچوں ہر اک وچ ہلا دین والی کہانی اے۔
پوری دنیا وچ مسلم ملکاں دی گنتی 60 توں ودھ اے۔ آبادی پونے دو ارب یعنی اک سو 70 کروڑ توں ودھ اے۔ ایہناں ملکاں وچوں پاکستان واحد ایٹمی قوت اے پوری دنیا دی گل کریئے تے ستواں ملک جہدے کول ایٹم بمب دی صورت وچ جدید ترین اسلحہ اے۔ ایس طاقتور ملک دے صدر’ وزیراعظم ہائوس تے جی ایچ کیو ورگے سکیور ترین اداریاں تے حملہ ہونا یاں آڈیو ویڈیو دا ریکارڈ ہو کے سامنے آنا شرمناک اے تے پاکستان دے صوبائی تے وفاقی اداریاں دے دفتراں وچ موجود ریکارڈ نوں اگ لگ جانا’ وزیراعظم ہائوس توں سائفر دا چوری ہو جانا سانوں ایہ گل سوچن تے مجبورکردی اے کہ پاکستان دا نیوکلیئر پروگرام تے ایٹم بمب تے اللہ نہ کرے کدھرے غیرمحفوظ ہتھاں وچ تے نہیں؟ ریکارڈنگ کرن والے جناں غیرقنونی کم کردے نیں اوناں ای اوہنوں لیک کرن والے کر رہے نیں۔ دوہاں دا جرم برابر تے ناقابل معافی جرم اے۔
وزیراعظم شہبازشریف نے ایس خدشے دا ٹھیک اظہار کیتا اے کہ جس طرح آڈیو لیک ہوئیاں نیں دنیا دے کسے وی ملک دا سربراہ پاکستان آن تے وزیراعظم ہائوس وچ گل بات کرن لئی کیویں تیار ہووے گا۔ جس گل بات دے لیک ہون دا امکان ہووے گا۔ بھارت’ امریکہ تے اسرائیل دے ہتھوں پاکستان دا ایٹمی پروگرام کدوں تک محفوظ اے؟ ایہناں آڈیو لیکس دے بعد ایہ سوال شدومد نال سامنے آندا اے اگوں اجہی لیکس توں ایسے طرح بچیا جا سکدا اے کہ ہر ادارہ اپنے دائرہ اختیار وچ رہ کے کم کرے۔ ادارے اک دوجے دے معاملات کردے رہن تے اجہے سانحات جنم لین توں نجات ممکن نہیں؟
دوستو! ایس توں پہلاں کہ عوامی غیض و غضب تے صبر دا پیمانہ لبریز ہو جاوے پاکستان دی سلامتی’ تحفظ تے انصاف دے اداریاں نو ںایہ طے کرنا ہووے گا کہ پاکستان نہ تے شام’ عراق’ لیبیا’ افغانستان ورگا عسکری لحاظ نال ماڑا ملک اے تے نہ ای سری لنکا ورگا گھٹ آبادی والا ماڑا ملک اے جد کہ پاکستان دنیا دی ستویں نیوکلیئر طاقت اے جہدے کول باراں لکھ توں ودھ مکمل تربیت یافتہ فوج تے سب توں وڈی گل جذبہ ایمان موجود اے پر جدوں لوکاں دے نال مسلسل کھلواڑ کیتا جاوے گا تے فیر اوہدے ردعمل وچ عوامی غیض و غضب دا پھٹ پینا اک حقیقت ہووے گی۔ جہنوں نظرانداز نہیں کیتا جا سکدا۔ کوئی وی سیاسی پارٹی ہووے’ کوئی وی قائد ہووے سانوں سب توں پہلاں ملکی سلامتی تے تحفظ نوں یقینی بنانا اے تے پاکستان نوں عوامی حصار وچ لے کے مستقبل وچ ہون والی متوقع تے غیرمتوقع سیاسی تے حفاظتی لیکس توں بچنا ہووے گا۔٭٭