کجھ ہور ساڈے لائق

اقتدار جاوید

صدر پاکستان دی منظوری تے دستخط بناں نیب آرڈیننس 2022 ملک وچ لاگو ہو گیا اے ایہ پاکستان دے اوہناں کجھ قنوناں وچ شامل اے جو صدر پاکستان دی عدم منظوری تے عدم دستخط دے باوجود لاگو ہوئے نیں۔ صدر پاکستان نے ایہنوں اپنے ولوں نامنظور کردے ہوئے ایس خدشے دا اظہار کیتا اے کہ احتساب دی اصل روح نوں نظرانداز کر کے بنائے گئے قنوناں دی قنونی حیثیت ضرور اے پر اخلاقی طور تے اوہ قنون مردہ ای تصور ہوندا اے۔ آپ وزارت قنون تے انصاف نے ایس بل دے آخر وچ اپنے نوٹ وچ لکھ دتا کہ
inquiry officer shall not harras any person at the time of investigation and confine his question.
ایہدے تے گل ختم نہیں کیتی گئی سگوں انکوائری آفیسر نوں پابند تے لازم کیتا اے کہ ملزم نوں پہلے دسیا جانا وی ضروری اے کہ تہانوں انکوائری لئی سدیا جانا ضروری اے ایہ اجہی خطرناک شرط لاگو کیتی اے جو انصاف دے قتل دے برابر اے۔ ایہدے مضمرات وچ ایہ گل شامل اے کہ ملزم دی اجازت نہ ملن تے اوہدے نال ملنا وی ناممکن ہووے گا۔ انکوائری آفیسر اپنے آپ نوں اوسے خاص کیس یاں الزام دے بارے پچھن دا پابند ہووے گا۔ دوجی ضروری جانکاری تک اوہدے دائرہ اختیار توں باراں پتھر کر دتے گئے نیں۔ نیب وچ اوہ ترمیماں جہناں دا رولا رپا سن دے آ رہے سی منظور ہو کے ہن حکومت پاکستان دا قنون بن گیا اے جہنوں نیب 2022 ایکٹ دا ناں دتا گیا اے۔ ایہ چھیتی لاگو ہووے گا تے ایہہ آرڈیننس 1999ء دے نال لاگو ہووے گا یعنی ایہ ترمیم تے ہن کیتی جا رہی اے پر ایہنوں 1999ء توں ای لاگو سمجھیا جاوے گا۔ یعنی جو کم ن لیگ تے پیپلزپارٹی عمران دے ساڑھے تن سالہ دور وچ نہ کروا سکے اوہ اپنی حکومت دے ساڑھے تن مہینے وچ کروان وچ کامیاب ہو گئے نیں۔ اوہ کنڈا جو اوہناں دا ساہ بند کر رہیا سی ختم ہو گیا اے۔
سیکشن پنج وچ ترمیم دے بعد نیب پنجاہ کروڑ توں گھٹ رقم دا کیس نہیں سن سکے گا۔ 1999ء دے اصل قنون وچ اک شق یاراں سی جہدے وچ کہیا گیا سی کہ جرمانے دی رقم خرد برد رقم توں کسے صورت گھٹ نہیں ہووے گی۔ ایہ خردبرد یاں غیرقنونی ذریعاں توں حاصل رقم بھاویں ملزم دے ناں ہووے یاں اوہدے کسے رشتے دار یاں ساتھی دے ناں تے ہووے ایس نویں ترمیم شدہ قنون دی ایس شق نوں سرے توں ای ختم کر دتا گیا اے۔ نیب کیس اوتھے دائر کر سکے گا جتھے جرم ہویا ہووے گا۔ ریفرنس اوس ویلے دائر ہووے گا جدوں مکمل چھان بین ہو چکی ہووے گی۔ کسے قسم دا سپلیمنٹری ریفرنس دائر نہیں ہو سکے گا تے اوہ وی مجاز عدالت دی اجازت دے بناں ممکن ہو سکے گا۔ جس شق دے مطابق پنجاہ کروڑ توں ودھ دی رقم نیب دا اختیار رہ گیا اے دی وجہ اے کہ کجھ دیہاڑ پہلاں کئی ریفرنس واپس کر دتے گئے نیں۔ شق نمبر یاراں دے مطابق ملزم نوں کسے الزام یاں جرم دے بارے دسیا جاوے کہ کیہ تساں ایہ جرم کیتا وی اے یاں نہیں تے اوہنوں ڈیفنس دا پورا موقع دتا جاوے گا تے ایس طریقے نال اوہنوں دسیا جانا وی ضروری اے جو رقم پلی بار گین وچ ملزم نے آفر کیتی ہووے اوہنوں اوہ ملزم بعد وچ دوبارہ کورٹ نوں رجوع کر سکدا اے کہ میرے تے دباء پا کے پلی بار گین کیتی اے تے اوہ اوہنوں منسو خ کروا سکدا اے۔
سیکشن 31 بی دے مطابق چیئرمین نیب نوں ایہ اختیار دتا گیا اے کہ اوہ کیس کسے ویلے وی ختم کر سکدا اے۔ اوہ عدالت وچ دائر ریفرنس دے مطابق ریفرنس دائر کرن توں پہلاں چیئرمین نیب پراسیکیوٹر جنرل دی مشاورت نال اجہی کاروائی منسوخ کر دیوے گا جو بلاجواز ہووے۔ ریفرنس دائر کرن دے بعد چیئرمین نیب نوں لگے کہ ریفرنس بلاجواز اے تے اوہ متعلقہ عدالت توں اوہنوں منسوخ یاں واپس لین دا کہہ سکدا اے۔ چارج فریم کرن توں پہلاں انج ہون دی صورت وچ ملزم نوں جرم توں ڈسچارج کر دتا جاوے گا جد کہ چارج فریم ہون دے بعد انج ہون تے ملزم نوں جرم توں بری کر دتا جاوے گا۔ دوجے پاسے حالت ایہہ وے کہ ٹرانسپرنسی انٹرنیشنل نے سیلاب متاثرین دی امداد لئی جمع ہون والے فنڈز تے خرچیاں وچ شفافیت نوں یقینی بنان لئی وزیراعظم شہبازشریف نوں خط لکھدے ہوئے چھ اہم سفارشات پیش کر دتیاں نیں۔ ایہ حکومتی گروہ اپنی تھاں پورا مطمئن اے جس مقصد لئی ایہ سارا میلہ سجایا گیا سی اوہ بہرحال اوہناں نے آپسی تعاون کرکے حاصل کر لیا اے۔ آصف زرداری’ یوسف رضا گیلانی’ راجہ پرویزاشرف’ حمزہ شہباز’ مریم نواز تے دوجے جدوں وزیراعظم نوں ملدے نیں تے سارے اک دوجے نوں کہندے نیں ”کجھ ہور ساڈے لائق” ایس حوالے نال عدالت عالیہ نال رجوع کر لیا گیا اے کہ اوہنوں Quash کیتا جا سکے کہ ایہ ترمیماں آئین دی روح دے خلاف نیں۔٭٭