سب گورکھ دھندا اے

موجودہ حکومت دا قیام وی رسوائی دے نال ہویا سی ہن جدوں حکومت اپنے اختتام ول ودھ رہی اے تے اک واری فیر اوہنوں رسوائی نے گھیر لیا اے۔ سازشاں دے تحت بنن والی حکومت سازشاں دا شکار ہو کے رہ گئی اے۔ مہنگائی مارچ کرن والیاں نے پہلے اپنے لوکاں نوں مہنگائی نال لتاڑیا’ لوکاں دیاں زندگیاں وچ زہر گھولیا فیر امریکہ وچ حکمراناں دیاں عیاشیاں دے قصے سامنے’ اجے اوہ قصے گھٹ نہیں سن ہوئے کہ آڈیو لیکس دا پنڈورا باکس کھل گیا۔ ایہ سارا گورکھ دھندا کیہ اے ایہنے سب کجھ ننگا کرکے رکھ دتا اے تے اقتدار تے بیٹھے لوکاں دے جیویں چہرے ننگے ہو کے رہ گئے نیں۔ اک آڈیو لیک وچ اپنے اک رشتے دار نوں فائدہ اپڑان دیاں گلاں ہو رہیاں نیں ایسے آڈیو وچ دشمن ملک بھارت توں مشینری منگوان دا تذکرہ اے فیر اک ہائوسنگ سوسائٹی دی سہولت کاری دی گل اے۔ ایس آڈیو وچ دسیا جا رہیا اے کہ اسحاق ڈار نے جس طرح پچھلے وزیراعظم دی گڈی کلیئر کروائی سی اوہ اوسے طرح ایس مشینری نوں وی کلیئر کروا لین گے آخر وچ چیئرمین نیب دے حوالے نال جسٹس (ر) مقبول باقر دی شخصیت تے شک دا ظہار وی اے۔ ایس پہلی آڈیو توں دو تن گلاں دا کھلا اظہار ہوندا اے کہ کس طرح وزیراعظم اپنے حلف دی خلاف ورزی کردے نیں۔ حلف اٹھان ویلے ایہ گل کیتی جاندی اے کہ بطور وزیراعظم اوہ کسے ذاتی فائدے لئی کم نہیں کرن گے تے نہ ای اپنے کسے رشتے دار نوں فائدہ اپڑان دی کوشش کرن گے۔ دوجی گل قومی سلامتی دے حوالے نال اے کہ کس طرح دشمن ملک توں سامان منگوایا جا رہیا اے تے ایہ سامان چوری منگوایا جا رہیا اے۔ تریجی گل ایہہ وے کہ مسٹر ڈار کس طرح پہلے قومی خزانے دا استعمال کردے رہے نیں تے کس طرح پچھلے وزیراعظم اپنے حلف دی خلاف ورزی کردے رہے نیں۔ چوتھی گل وچ تے حد ای ہو گئی اے کہ کس طرح پسند دا چیئرمین نیب لبھیا جا رہیا اے یعنی اوہ اجیہا بندہ ہووے جہڑا حکمراناں دا نامہ اعمال سامنے آن تے اکھاں بند کر لوے۔ پہلی آڈیو توں مجموعی تاثر ایہو ملدا اے کہ عوامی خدمت دے دعوے دار صرف اپنی خدمت سے سارا دھیان رکھدے نیں اوہناں دی عوامی محبت دے سارے دعوے صرف افسانے نیں۔
دوجی آڈیو وچ پنج وزیر اپنے وزیراعظم دے نال رَل کے استعفیاں دے حوالے نال سازش دی منصوبہ بندی کر رہے نیں ایہدے توں وی کجھ سوال ابھردے نیں کہ کیہ وزراء تے وزیراعظم اپنے ملک دے لوکاں دا نہیں سوچدے۔ کیہ اوہ صرف اپنے مخالفین دے خلاف سازشی حکمت عملیاں بناندے نیں کیہ ایہ ساری گل بات جمہوریت دی خدمت اے۔ ایہ پوری گل بات پارلیمنٹ دے خلاف سازش نہیں تے ہور کیہ اے؟ کیہ ایہ گل بات سپیکر دے اختیارات تے سوالیہ نشان نہیں تے کیہ ایہ گل بات چیف الیکشن کمشنر دی جانبداری نوں واضح نہیں کر رہی؟ کیہ ایس گل بات توں ایہ تاثر نہیں ملدا کہ الیکشن کمیشن آف پاکستان اک خودمختار آئینی ادارہ نہیں۔ ایس آڈیو وچ استعفیاں دی منظوری دے حوالے نال اک سزا یافتہ بندے نوں فہرست گھلن دی گل وی شامل اے۔ آرمی چیف دے خلاف گلاں کرن والا اک بندہ کہہ رہیا اے کہ اسیں ایہ لسٹ لندن گھل دیاں گے فیر اوتھوں لیڈرشپ دی منظوری توں فیصلہ ہو جاوے گا۔ ہن سوال ایہ پیدا ہوندا اے کہ پاکستان تے پاکستان دی پارلیمنٹ بارے فیصلے باہر بیٹھا ہویا اک سزا یافتہ بندہ کر رہیا اے کیہ ایہ عمل ٹھیک اے؟ کیہ پاکستان دی موجودہ حکومت فیصلے کرن دی اہلیت تے صلاحیت نہیں رکھدی یاں فیر اوہ ایم کیو ایم دی طرزتے معاملات چلا رہی اے۔
تریجی آڈیو وچ کس طرح مفتاح اسماعیل دے بارے توہین کیتی گئی اے حالاں کہ اوہناں دی اپنی حکومت دے وزیر خزانہ ہون دے ناطے مشکل فیصلے کر رہے سن۔ کس طرح اک خاتون پٹرول دی قیمت ودھان دی گل کر کے نال ای نویں شوشے چھڈن دیاں گلاں کر رہی اے۔ کیہ ایہ کھلی منافقت نہیں؟ کس طرح ڈی جی آئی ایس پی آر دیاں گلاں دا مفہوم بدلن دا تذکرہ ہو رہیا اے کیہ ایہ سارا طرزعمل ٹھیک اے؟ اک چوتھی آڈیو وی اے ایس آڈیو وچ اخلاقیات دا درس دین والے کس طرح وزیراعلیٰ پنجاب چوہدری پرویزالٰہی بارے لاف و گزاف توں کم لے رہے نیں کیہ ایہ عمل ٹھیک اے؟۔
بتیری واری عرض کر چکیا واں کہ پاکستان دا حکمران طبقہ نہ پاکستان دا سوچدا اے تے نہ ای اوہنے کدی وطن عزیز دے لوکاں دا سوچیا اے۔ کیہ ایہ سب کجھ لیڈر شپ دی دوعملی نہیں؟ کیہ ایہ وطن نال بے وفائی نہیں؟ کیہ ایہ جمہوریت تے جمہور دے خلاف گھٹیا کھیڈ نہیں۔ ایسے لئی تے ہر پاسے رسوائی ای رسوائی اے اج صوفی تبسم دا شعر رہ رہ کے یاد آ رہیا اے کہ:
دیکھے ہیں بہت ہم نے ہنگامے محبت کے
آغاز بھی رسوائی انجام بھی رسوائی