اسیں سب کجھ بھُل بھُلا گئے

تسیں اوہ کہانی سن رکھی ہووے گی کہ اسحاق ڈار ست ورھے لندن وچ جس قاضی خاندان دے گھر رہ کے پڑھدے رہے’ سیاست’ پارلیمنٹ وچ آن مگروں اوسے قاضی خاندان دے شناختی کارڈ تے اوہناں نے شریف خاندان لئی جعلی بینک اکائونٹس کھولے۔ قرضے لئے’ منی لانڈرنگ کیتی۔ تسیں اوہ کہانی وی سن رکھی ہووے گی کہ مشرف مارشل لاء دے بعد کیویں ڈار صاحب حدیبیہ پیپر مل کیس وچ شریفاں دے خلاف وعدہ معاف گواہ بنے۔ کیویں 45 صفحاتی اعترافی بیان وچوں 17 صفحے اپنے ہتھ نال لکھے جہناں دا لب لباب ایہہ وے کہ میں ساری منی لانڈرنگ شریفاں دے کہن تے کیتی ایہ وکھری گل اے کہ بعد وچ اوہ ایس اعترافی بیان توں مُکر گئے پر ایہ اوہو اعترافی بیان کہ جہدے بارے اسحاق ڈار دے وکیل نے جدوں سپریم کورٹ وچ کہیا کہ اسحاق ڈار دا اعترافی بیان صرف کاغذ دا اک ٹکڑا تے جسٹس کھوسہ بولے ایہ کاغذ دا ٹکرا نہیں اوہ ثبوت جہدی کدی تحقیق ای نہیں کیتی گئی خیر ایس اعترافی بیان دی کیہ تحقیق ہونی سی جدوں حدیبیہ پیپر مل کیس دا ای مکو ٹھپ دتا گیا۔
تسیں اوہ کہانی وی سن رکھی ہووے گی جدو ںڈار صاحب توں اوہناں دی ان گنت دولت’ جائیداداں دا پچھیا گیا تے ایہ اک عربی شیخ دا To whom it may concern ٹائٹل والا خط لے آئے جہدے وچ عربی شیخ فرمان اسحاق ڈار جون 2004ء توں جون 2005ء تک اک ورھے لئی میرے مشیر رہے تے میں اوہناں نوں 83 کروڑ فیس دتی ایہ وکھری گل ایس 83 کروڑ کنسلٹنسی فیس دا کوئی بینک ڈپازٹ ریکارڈ نہ کوئی بینک رسید’ بس عربی شیخ دا اک خط’ اللہ اللہ خیرسلا۔ تسیں اوہ کہانی وی سن رکھی ہووے گی کہ ڈار صاحب دے آئی ایم ایف نال جھوٹ بولن’ جعلی اعدادوشمار پیش کرن تے پاکستان نوں ساڑھے پنج ملین ڈالر جرمانہ کیتا گیا جو بعد وچ مشرف حکومت نے بھریا۔ تسیں اوہ کہانی وی سن رکھی ہووے گی کہ کیویں اک دن قومی اسمبلی وچ کھڑے ہو کے اسحاق ڈار نے کہیا کہ پاکستانیاں دے دو سو ارب ڈالر سوئس بینکاں وچ پئے ہوئے تے ایہو نہیں سگوں اسحاق ڈار نے قومی اسمبلی وچ 40 صفحاتی دستاویز لہرا لہرا کے پیپلزپارٹی والیاں نوں وکھا وکھا کے کہیا کہ اسیں سوئس بینکاں وچ پیا پاکستانیاں دا کالا دھن واپس لیان لئی سوئٹزرلینڈ نال معاہدہ کرن جا رہے آں۔
تسیں اوہ کہانی وی سن رکھی ہووے گی کہ 2016 وچ اسحاق ڈار نے قوم نوں ایہ خوشخبری سنائی کہ آئی ایم ایف دے اخبار ایمرجنگ مارکیٹس نے مینوں ایشیا دا فنانس منسٹر آف داایئر قرار دتا اے پر آئی ایم ایف بولیا’ ایس اخبار نال ساڈا کوئی تعلق ای نہیں۔ تسیں بی بی سی دا پروگرام ہارڈٹاک وی ویکھیا ہووے گا جہدے وچ میزبان نے جدوں ڈار صاحب توں پچھیا کہ تسیں تے تہاڈے خاندان دی دنیا بھر وچ کنیاں جائیداداں تے ڈار صاحب بولے صرف اک گھر لہور وچ’ میزبان نے کہیا دبئی وچ کوئی جائیداد نہیں’ بولے’ ارے ہاں اک گھر میرے بچیاں دا دبئی وچ وی اے۔ ڈار صاحب نہ صرف پُتراں دے دبئی وچ مبینہ پلازے بھُل گئے سگوں نیب دے کھاتیاں وچ موجود اپنے الفلاح ہائوسنگ وچ تن پلاٹ’ اسلام آباد وچ چھ ایکڑ دا پلاٹ’ پارلیمنٹرین انکلیو وچ دو کنال دا پلاٹ’ سینٹ کوآپریٹو ہائوسنگ سوسائٹی وچ اک پلاٹ تے اک نجی ہائوسنگ سوسائٹی وچ اک پلاٹ وی بھُل گئے۔
تسیں اوہ کہانی وی سن رکھی ہووے گی کہ کیویں ڈار صاحب نے ڈالر نوں مصنوعی طریقے نال کنٹرول کرن لئی کروڑاں ڈالر مارکیٹ وچ سٹ دتے’ کیویں اوہناں نے مہنگے ترین قرضے لئے’ ایس توں علاوہ اوہ ڈالر ڈار لطیفے’ اوہ پنج سو ملین یورو سوا اٹھ فیصد سود تے تے اوہ اوس سعیداحمد نوں ڈپٹی گورنر سٹیٹ بینک لانا جہدے بارے اسحاق ڈار نے نیب نوں اپنے اعترافی بیان وچ دسیا کہ اوہ اوہناں دے منی لانڈرنگ فیلو ‘ اوہی اعترافی بیان جہدے توں ڈار صاحب مُکر چکے۔ تسیں سوچ رہے ہوو گے کہ ایہ کہانیاں جو پہلے کئی واری سنیاں’ سنائیاں جا چکیاں’ اج فیر توں کیوں یاد آ گئیاں ایہ ایس لئی یاد آ گئیاں کہ 2017 وچ احتساب عدالت دے آمدن توں ودھ اثاثے کیس وچ فرد جرم لاگو ہون دے کجھ دناں بعد لندن بذریعہ سعودی عرب جان والے ڈار صاحب ہن خیر نال واپس آ گئے نیں مزے دی گل اوہ بحیثیت وزیر خزانہ لندن گئے’ بیمار ہوئے’ شاہد خاقان عباسی حکومت نے اوہناں نوں تن مہینے دی چھٹی دتی اوتھے وزارت توں مستعفی ہو گئے۔ مزے دی گل لندن توں ای ڈار صاحب سینیٹر منتخب ہوئے’ مطلب اوہ لندن وچ بہہ کے تے اشتہاری ہو کے وی سینیٹر منتخب ہوئے۔ غریب بندہ بینک نہ جائے تے اوہدا اکائونٹ نہیں کھلدا’ پر اوہ لندن توں سینیٹر منتخب ہو گئے۔مزے دی گل سینٹ آف پاکستان نے کمال حوصلے’ صبر نال اوہناں دا انتظار کیتا کہ اوہ تسلی نال اپنے سارے کم نبیڑ کے آن تے حلف اٹھا لین’ مزے دی گل حالات بدلدے ای عدالت نے اوہناں دے وارنٹ گرفتاری معطل کر دتے تے ہن اوہ ملک و قوم دے درد وچ ڈبدی معیشت نوں بچان آ گئے۔ مزے دی گل اوہ سب جو 2018ء توں 2022ء دوران دسدے’ سمجھاندے رہے کہ معیشت دا سواستیاناس اسحاق ڈار کر گئے اج اوہو سب خوشی نال پھولے نہیں سما رہے کہ ڈار صاحب معیشت سنبھالن آ گئے۔٭