امریکہ دا سفر

پاکستان توں امریکہ لئی عازم سفر ہوئے تے ملک وچ مہنگائی’ بیروزگاری’ سیلاب دے بعد دی تباہی’ سیاسی محاذ ارائی تے کرکٹ دی ٹی ٹونٹی سیریز دے میچ عروج تے سن تے لگ رہیا سی کہ مرکز تے صوبیاں وچ قائم حکومتاں ساریاں اوکڑاں دے باوجود ہور کجھ مہینے قائم رہن گئیاں۔ لہور دے علامہ اقبال ایئرپورٹ تے حسب معمول مسافر زیادہ تے سہولتاں گھٹ سن۔ غیرملکی فضائی کمپنی دے نویں جہاز تے دبئی ول پرواز دوران گوادر دے ساحلی شہر دے اُتوں گزرے تے اوہدے محل وقوع توں اندازہ ہویا کہ ایہ شہر نصہ رف گہرے پانی دی بندرگاہ سگوں بین الاقوامی ایئرٹریفک لئی بہترین ٹرانزٹ ایئرپورٹ وی بن سکدا اے۔ گوادر توں گھنٹے دی دوری تے دبئی دا انٹرنیشنل ایئرپورٹ واقع اے جتھوں مقامی ایئرلائن دے سینکڑوں جہاز دنیا بھر دے ملکاں لئی اڑان بھردے نیں۔ دبئی دے کھلے ڈلھے تے جدید ایئرپورٹ دے ٹرانزیٹ لائونج وچ ہر رنگ و نسل تے قومیت دے لوک اپنی اپنی منزل تے اپڑن لئی فلائٹاں دے انتظار وچ بیٹھے سن۔
دبئی توں نیویارک دا تیراں گھنٹے دا لماں سفر کشادہ تے آرام دہ جہاز وچ مسافراں نے زیادہ سوندے ہوئے طے کیتا۔ ایس فلائٹ وچ وڈی گنتی وچ بھارتی باشندے خاص کر نوجوان منڈے کڑیاں امریکہ جا رہے سن۔ بھارت توں ایس ورھے ہزار طالب علم سٹوڈنٹ ویزے تے امریکہ اپڑے نیں جہناں دی اکثریت اعلیٰ تعلیم حاصل کرن دے بعد امریکہ وچ مستقل سکونت اختیار کر لیندی اے جد کہ پاکستان توں بڑی معمولی گنتی وچ طالب علم امریکہ جا پاندے نیں۔ امریکی حکومت ہر ورھے سٹھ ہزا رتوںودھ ملازمتی H-1 ویزے جاری کردی اے جہدے وچوں تقریباً ستر فیصد کوٹہ بھارتی اعلیٰ تعلیم یافتہ بندے استعمال وچ لے آندے نیں۔ بھارت توں آن والیاں دی اکثریت کمپیوٹر انجینئرنگ’ آئی ٹی تے میڈیکل فیلڈ نال وابستہ ہوندی اے۔ بھارت وچ کمپیوٹر تے آئی ٹی دی تعلیم و تربیت دین والے کالج تے یونیورسٹیاں دا معیار بڑا چنگا اے ایہو وجہ اے کہ حال تے مستقبل دی ایس اہم ترین فیلڈ وچ بھارتی دنیا وچ اپنی اجارہ داری قائم کر چکے نیں۔ امریکہ دیاں کجھ وڈیاں کمپنیاں گوگل’ مائیکروسافٹ’ ایڈوبی’ فیڈایکس تے ڈپلوئٹ دے سربراہ بھارتی امریکن نیں۔
پاکستان دے اکثر تعلیمی اداریاں وچ تعلیم دا معیار خاص کر آئی ٹی دے شعبے وچ بڑا ماٹھا اے تے نوجوان طالب علم وی اپنا دھیان تے ٹائم پڑھائی تے ٹریننگ تے گھٹ تے دوجے کماں تے زیادہ دیندے نیں۔ پیشہ ورانہ صلاحیتاں وچ کمی تے محنت نہ کرن دی وجہ نال ساڈی سافٹ ویئر ایکسپورٹ صرف کجھ سو ملین ڈالر اے جد کہ بھارت دی ایس شعبے وچ ورھے وار ایکسپورٹ تقریباً دو سو بلین ڈالر اے۔ پاکستان وچ میڈیکل دی تعلیم دا معیار نسبتاً بہتر اے جہدی وجہ نال بیرون ملک خاص کر برطانیہ تے امریکہ وچ پاکستانی نژاد ڈاکٹراں نوں قدر دی نگاہ نال ویکھیا جاندا اے۔ امریکہ وچ رہندے پاکستانی ڈاکٹر اپنی تنظیم اپنا تے دوجے پلیٹ فارماں توں نہ صرف پاکستان تے امریکہ وچ اپنی کمیونٹی لئی دل کھول کے چندہ دیندے نیں سگوں اپنے آبائی ملک لئی لابنگ دے فرائض وی نبھاندے نیں۔
امریکہ وچ مستقل رہائش پذیر پاکستانیاں دی اکثریت اسی تے نوے دی دہائی وچ امریکی حکومت دی لبرل امیگریشن پالیسیاں پاروں ایس ملک وچ سیٹل ہوئی۔ محنت تے جانفشانی نال کم کرکے اوہناں نے ایس معاشرے وچ اپنا مقام بنایا پر بدقسمتی نال اوہ اک مضبوط کمیونٹی بنن دی تھاں پاکستان دی سیاست تے آپس دی لڑائیاں وچ الجھ گئے۔ اودھر پاکستان دے سیاستداناں نے وی اوورسیز پاکستانیاں نوں اپنے مقصد لئی استعمال کیتا پر ہن چنگی گل ایہہ وے کہ بیرون ملک پیدا ہون والی نویں نسل جو پڑھی لکھی اے بلاامتیاز چنگیاں نوکریاں تے فائز اے اوہناں نوں اپنے آبائی وطن دی مٹی’ روایات تے مذہبی اقدار دا پاس تے ہے پر سیاسی محاذ ارائی دا حصہ بنن نوں اوہ تیار نہیں۔
پاکستان وچ سیاسی تے ذاتی مفاد لئی مذہب کارڈ’ قومیت کارڈ تے غلامی دا طوق ورگے نعرے بلند کرن والیاں نوں احساس نہیں کہ دنیا کنی تیزی نال ترقی کر رہی اے تے اسیں جھوٹھیاں اناواں تے جعلی تفاخر توں سربلند کیتے دنیا نوں تسخیر کرن دے دعوے کررہے نیں۔ دنیا اک گلوبل ویلج وچ بدل چکی اے سانوں بدلدے ہوئے حالات وچ اپنے رویے تے حرکات تے نظرثانی کرنی ہووے گی تے ساریاں نوں لے کے اک مہذب’ روادار تے برداشت دا مادہ رکھن والے معاشرے نوں تشکیل دینا ہووے گا تے ایہ کم کوئی زیادہ اوکھا نہیں۔