یعقوب نور دی فلم کنڈی نہ کھڑکا دے پریمئراُتے شوبز دا جم غفیر

پچھلے جمعہ والے دیہاڑ شبستان سینما لہور وچ فلمساز’ اداکار تے ہدایتکار ملک یعقوب دی فلم ”کنڈی نہ کھڑکا” دا کارپٹ شو ہویا جہدے وچ بہت دیر مگروں فلم نگر دی کثیر تعداد نے رلت کیتی جہنوں ویکھ کے لگدا سی کہ ا یتھے کوئی فلمی میلہ لگیا ہویا اے۔کئی انٹرویوز ہو رہے نیں ‘کئی فوٹوسیشن۔ یعقوب نور ساریاںنال خوش دلی نال مل رہے سن جد کہ فلم فیڈریشن دے چیئرمین اچھی خاں حسب دستور اوہدے آرگنائزر دے فرائض انجام دے رہے سن۔ ایہہ سماں نو وجے دا بیان کیتا جا رہیا اے جد کہ شو دا آغاز دس وجے ہونا سی۔ جہناں شرکا نے ایس شور وچ رلت کیتی اوہناں وچ فلمساز چوھدری کامران، صفدر ملک، عامر بٹ، مصنف وہدایتکار سید نور، ناصر ادیب، حسن عسکری، نسیم حیدر، جرار رضوی، آغا قیصر عباس ندیم چیمہ، باسو چوھدری، طارق ساحلی، ادکار حیدر سلطان، راشد محمود، طارق کھچی، شمس رانا، تن نویں ہیروئناں تے مین وِلن اچھی خاں شامل سن۔ دُوجے شرکا وچ سید نوردے ایسوسی ایٹ ہدایتکار تے جرنلسٹ ساجد یزدانی تے سید نور دے پتر شازل نور شامل سن۔دس وجے شو شروع ہویا فلم وچ قنون دے سقم نوں موضوع بنایا گیا سی۔ فلم دا میوزک چنگا اے تے لیلیٰ دے آئٹم نمبر اتے بہت ہلہ گلہ ہویا۔ فلم وچ راشد محمود’ حیدر سلطان’ یعقوب نور تے مرکزی ہیروئن دے کردار نوں سراہیا گیا جد کہ اچھی خاں نے روٹین توں ہٹ کے مختلف گٹ اپ وچ اپنا کردار احسن طریقے نال نبھایا۔ مجموعی طور تے فلم درمیانہ درجہ دی قرار پائی۔ ایس موقعے تے فلمی سیانے حلقیاں دا کہنا سی کہ ملک یعقوب دی شکل وچ فلم انڈسٹری نوں اک چنگا فلمساز مل گیا اے۔ ایس تقریب وچ رلت لئی کراچی دے مشہور صحافی شاکر قریشی خصوصی طور تے لہور تشریف لیائے۔