چیئرمین فلم رائٹرز ایسوی ایشن ناصر ادیب نے اشفاق کاظمی نوں جنرل سیکرٹری مقرر کر دِتا
پچھلے دناں چیئرمین فلم رائٹرز ایسوسی ایشن ناصر ادیب نے سینئر فلم مصنف اشفاق کاظمی نوں فلم رائٹرز ایسوسی ایشن دا جنرل سیکرٹری مقرر کردتا جہدے تے شوبز حلقیاں نے خوشی دا اظہار کیتا اے تے ناصر ادیب دے فیصلے نوں سراہیا اے۔ ایس فیصلہ نوں خوشگوار قرار دین والیاں وچ فلمساز چوھدری کامران، سید نور لیجینڈ شاھد حمید، ہر دل عزیز سینئر فنکار اچھی خاں، نامور مصنفین محمد کمال پاشا ،محمد پرویز کلیم دے نام سر فہرست نیں۔ ایس موقعے تے چیئرمین پنجابی میڈیا گروپ مدثر اقبال بٹ نے اشفاق کاظمی نوں خصوصی طور تے مبارکباد دتی اے کیوں جے جتھے اشفاق کاظمی دا شمار اوہناں دے دوستاں وچ ہوندا اے اوتھے ای اوہ پچھلے 40 سالاں توں پنجابی میڈیا گروپ نال وی جڑے نیں۔ چیتا رہوے کہ ایہہ سیٹ معروف مصنف رشید ساجد دے انتقال دی وجہ نال عرصہ دراز توں خالی سی۔ ایس موقعے تے اشفاق کاظمی نے کہیا کہ اوہ اپنے دوستاں دے اعتماد اتے پورا اترن دی کوشش کرن گے تے فلم رائٹراں دی فلاح و بہبود لئی سر توڑ کوشش کرن گے۔