جرم ودھدے جا رہے نیں پر…!

موجودہ حکومت دی نکامیاںدی فہرست واہوا لمی اے۔ ایہ حکومت مہنگائی دے خاتمے لئی آئی پر ایہنے لوکاں نوں مہنگائی دی دلدل وچ پھسا دتا۔ ہر محاذ تے نکام ہوندی ہوئی حکومت وزیراں’ مشیراں دی گنتی وچ مسلسل وادھا کر رہی اے۔ ایہدااندازہ ایس گل توں لائو کہ کابینہ وچ شامل 74 بندیاں وچوں 23 مشیر اجہے نیں جہناں دے کول کوئی محکمہ ای نہیں۔ تسیں ایہناں نوں اصطلاح وچ معاونین خصوصی وی کہہ سکدے نیں۔ کجھ وزیر اجے وی انج دے نیں جو محکمے دے بناں کم کر رہے نیں ایہناں وچ شیخوپورہ دے جاویدلطیف وی شامل نیں۔ میاں شہبازشریف لاہور چیمبر آف کامرس دے عہدے تک تے ٹھیک سن وزارت اعلیٰ اوہناں نے بھائی دے زور تے چلائی تے ہن جدوں سو جتناں دے بعد بھائی دی تھاں تے آئے تے بالکل بے بس ہو گئے۔ انگریزی سوٹ پان نال مسئلے حل نہیں ہوندے کسے دوجے دا لباس پا کے یاں کسے دوجے دی زبان بول کے اپنے لوکاں دے مسائل حل نہیں ہو سکدے۔ سوٹاں دی خوش فہمی وچ مبتلا شہبازشریف نے لوکاں دیاں زندگیاں نوں مشکل بنا دتا اے۔
شہبازشریف توں پہلاں یوسف رضا گیلانی وی سوٹاں دی خوش فہمی وچ مبتلا ہوندے سن۔ اجہے لوکاں دا سارا دھیان اپنی ذات تے اپنے لباس تے ہوندا اے۔ اجہے لوکاں نوں عوام دے مسئلیاں نال کوئی غرض نہیں ہوندی۔ حالیہ لیکس نے اوہناں نوں ہور ننگا کیتا اے کہ کس طرح ایہ لوک عوام نال دھوکھا کردے نیں۔ شہبازشریف دی حکومت وچ نہ صرف غریب پریشان ہوئے نیں سگوں مڈل کلاس دے نال اپر کلاس وی ڈسٹرب ہو کے رہ گئی اے۔ زیادہ پریشان ہون والے طبقات وچ لوئر مڈل کلاس تے اپرمڈل کلاس شامل نیں ایہ سفید پوش لوک نہ جھولی پھیلا سکدے نیں تے نہ ای چوری تے ڈاکے ول راغب ہو سکدے نیں۔ جرائم عام طور تے اوہ طبقے کردے نیں امیر طبقہ یاں غریب طبقہ’ امیر طبقہ وڈے جرم کردا اے تے پھڑیا نہیں جاندا جد کہ غریب طبقہ چوری تے ڈکیتی کردے ہوئے پھڑیا وی جاسکدا اے۔ حالیہ کجھ مہینیاں وچ وڈے شہراں وچ چوری تے ڈکیتی دیاں وارداتاں زیادہ ہو گئیاں نیں۔ کراچی وچ روزانہ ہزاراں وارداتاں ہو رہیاں نیں۔
موبائل تے پرس کھوہن کے نسن والے ہن ڈاکیاں تے اتر آئے نیں۔ کراچی وچ راہیاں دا لٹ جانا عام جہی گل ہو گئی اے ہن تے لوک گھراں وچ وی محفوظ نہیں۔ موبائل تے پرس کھوہن دیاں وارداتاں نے لہور تے اسلام آباد دا راہ ویکھ لیا اے۔ رانا ثناء اللہ بڑھکاں تے بڑیاں ماردے نیں پر اسلام آباد وچ اج کل روزانہ ڈیڑھ توں دو سو وارداتاں روکن وچ نکام ثابت ہو رہے نیں۔ اسلام آباد پولیس تے مرضی دے افسران مسلط کرکے پوری نفری نوں برباد کرکے رکھ دتا گیا اے۔ کجھ دن پہلاں بڑھک باز نوں اسلام آباد وچ کساناں نے ننگا کر دتا سی۔ صرف ننگا ای نہیں’ بے بس وی کر دتا سی۔ ایس حکومت دے دور وچ مزدور’ کسان’ تاجر’ سرکاری تے غیرسرکاری ملازم’ ملا تے درویش سارے پریشان نیں۔ چھوٹے وڈے شہراں دے عام محلیاں وچ وکھووکھ گروہ وکھووکھ وارداتاں کر رہے نیں۔ ایہناں گروہاں وچ مرداں توں علاوہ عورتاں وی شامل نیں۔ ہن ایہناں گروہاں نے چھوٹے قصبیاں تے پنڈاں دا راہ وی ویکھ لیا اے۔ ایس لئی ہن پورا معاشرا ای جرائم دی آماجگاہ بن گیا اے۔ ہر پاسے چوراں دا راج اے۔ معاشرہ بے بس اے۔ مہنگائی دے ایس طوفان وچ لوک روٹی روزی پوری کرن یاں چوراں تے ڈاکوئواں دا پچھا کرن۔
ایس ویلے معاشرے وچ وکھووکھ گروہ جس طرح دیاں انوکھیاں وارداتاں کر رہے نیں اوہدے توں اندازہ لایا جا سکدا اے کہ ساڈا معاشرہ کناں پستی وچ ڈگ چکیا اے۔ پہلے معاشرے نوں کھ مافیاز دا سامنا سی پر ہن ہر گلی محلے وچ کوئی نہ کوئی مافیا اے۔ ہر قصبے تے پنڈ وچ مافیا اے’ انج لگدا اے جیویں ایہ پورا معاشرہ مافیاز دے ہتھوں یرغمال بن چکیا ہووے ایہدا علاج کون کرے۔ شاید ایہ موجودہ حکمراناں دے وَس دی گل نہیں جہڑے لوک ڈار دی آمد نوں مسئلیاں دا حل سمجھ رہے نیں اوہناں دی عقل تے ماتم کرن نوں دل کردا اے کہ ایسے ڈار پاروں ساڈی معیشت بیمار ہوئی نہیں تے 1990ء توں پہلاں اسیں بھارت تے بنگلہ دیش توں اگے سی۔ ایسے نے ستیاناس کیتا ایہدے توں آس لائی بیٹھے او ایسے نے تے منی لانڈرنگ ورگے گھنائونے کھیڈ کھیڈے سن۔ ملک دے پہلے ای برے حالات نیں کہ
مرشد وطن میں لوگوں کے حلیے بدل گئے
مرشد یہ زندگی بھی تو جاں کا وبال ہے