سیاسی بیان

اقتدار جاوید

وزیراعلیٰ سندھ مرادعلی شاہ نے کہیا اے کہ سوچیا جا رہیا اے کہ پانی گھما کے واپس تربیلا تے بھاشاڈیم کیویں اپڑائیے۔ آقا زرداری دی ہدایت تے سندھ دے لوکاں نوں تے اسیں پچھلے چالھی ورھیاں توں گھمایا ہویا اے تے گھمان دا ساڈا تجربہ وی بڑا اے۔ آقا زرداری ساڈے سیاسی ڈیل کارنیگی نیں اوہ اکثر اجہے نسخے دیندے رہندے نیں تے اوہناں دے ملفوظات دی روشنی وچ اسیں لوکاں نوں اینے چکر دتے نیں کہ ہن اوہ سانوں ویکھدے ای چکرا جاندے نیں۔ ایسے گھمن گھمان وچ دوہاں پاسے دا کم چل رہیا اے۔ لوک گھمدے گھمدے بڑے دور نکل گئے نیں۔ پانی نوں واپس گھمان دا اک طریقہ تے ایہہ وے کہ جی ڈی اے دے لوکاں دیاں زمیناں ول ایہدا منہ موڑ دتا جاوے۔ جدوں تک اوہناں دا منہ بند نہ ہو جاوے اپنی دا ایسے طرح گھمانا جاری رکھیا جاوے۔ تھوڑا بہت پانی حلیم شیخ تے نصرت سحر عباسی ول وی موڑیا جاوے۔ ایہناں دوہاں نے وی بڑا نک وچ دم کیتا ہویا اے۔ محکمہ مال نوں ہدایت جاری کر دتی گئی اے کہ ایہناں دی زرعی زمیناں تک ایس پانی نوں گھمایا جاوے تے اوس ویلے تک ایہدا گھمانا جاری رکھیا جاوے جدوں تک باقی سندھی ہاریاں وانگوں ایہ آپ چکرا کے ڈگ نہیں جاندے۔ تربیلا ڈیم وچ واپس پانی گھمان دا اک مقصد ایہ وی اے کہ عین ممکن اے مسلم لیگ ن صوبہ پختونخوا انجینئر امیرمقام کجھ بالٹیاں پانی دی بنی گالا تے سٹ سکن۔ اوہ وی ساڈے وانگوں درد دل رکھن والی شخصیت نیں۔ امیرمقام سندھ وچ ہوندے تے بڑی ترقی کردے۔ خیر اوہ ایدھر وی خوش نیں۔ اوہناں دا وی ساڈے وانگوں اقبال دے ایس شعر تے پکا یقین اے۔
یہ مال و دولت ِ دنیا یہ رشتہ و پیوند
بتان وہم و گماں لا الہ الا اللہ
مصطفی نواز کھوکھر ترجمان پیپلزپارٹی نے کہیا اے کہ طالبان پاکستان وچ بھتے سنے ویہہ کروڑ ڈالر سالانہ کماندے نیں۔ سچی گل اے اینی رقم دا سن کے ای منہ وچ پانی آ جاندا اے۔ حساب لا کے ویکھو تے ایہ رقم تقریباً پنجاہ ارب توں وی ودھ بن دی اے۔ ویکھو تے طالبان کردے کیہ نیں جو اوہ اینی رقم کما لیندے نیں۔ اسیں پیپلزپارٹی والے تے چلو حکومت کرنے آں وزارتاں لینے آں اٹھارویں ترمیم پاس کروانے آں۔ میثاق جمہوریت کرنے آں ایہ طالبان کیہ کردے نیں؟۔ ایہناں وزارتاں تے ترمیماں توں حاصل حصول نوں آقا زرداری دال دلیا ای سمجھدے نیں۔ ایہناں طالبان نوں ایس کارخیر ورگا کجھ کم اوہناں نو ںاپنے پیرومرشد ملک افغانستان وچ وی کرنا چاہیدا اے۔ اوتھے وی وڈیاں وڈیاں اسامیاں نیں۔ آخر اشرف غنی اوتھوں کما کے گئے نیں اوہ کہڑے متحدہ عرب امارات وچ ٹیکسی چلاندے رہے نیں۔ کیہ زمانہ سی جدوں ایتھے وی ڈالراں دے بورے آندے سن تے ایہناں افغان مجاہدں دے حضور پیش کیتے جاندے سن۔ ادھے توں ودھ ایتھے تقسیم کار رکھ لیندے سن۔ ہن اوہ لوک کھرباں وچ کھیڈ رہے نیں۔ پر اوس ویلے ساڈے دشمن دی ایتھے نجائز حکومت سی۔ اوہو نجائز حکومت ایہناں ڈالراں نوں اللے تللے اڑاندے سن۔ فیر ساڈی پارٹی دی ڈور آقا زرداری دے ہتھ آ گئی۔ ایہ ڈور اوہناں دے ہتھ وچ آن دی دیر سی کہ عشریاں دے دل درد دھل گئے۔ اجیہا طریقہ لاگو کرن دا سہرا آقا دے ای سر سجدا اے اسیں وی اپنے طور تے دال روٹی چلا ای رہے سی پر تریخ دا سنہری دور اوہناں دی سیادت وچ پھیل رہیا اے۔ امیر جماعت اسلامی نے کہیا کہ پی ڈی ایم تے تحریک انصاف دی لڑائی اسٹیبلشمنٹ توں ددھ دی بوتل لین لئی اے۔ جن توں بوتل کھس جاوے رونا شروع کر دیندے نیں۔
سانوں پتہ اے کہ اسٹیبلشمنٹ دا اپنا فارم ہائوس اے جتھے ساہی وال نسل دیاں مجھاں ڈھیر گنتی وچ موجود نیں۔ جس مجھ نوں اوہ چاہندے نیں چو لیندے نیں ایہ مجھاں اجیہاں ناہنجار نیں کہ اوتھے ددھ وی زیادہ دیندیاں نیں تے گوہا وی نہیں پھیلاندیاں۔ اپنی اپنی تھاں نوں اپنے پوشل نوں جھاڑو بنا کے صفائی کرن وچ ماہر نیں۔ اوہناں دے ٹناں دے حساب نال ددھ وچوں اک بوتل تے ایہو دو جماعتاں ای ٹرخائیاں جا سکدیاں نیں۔ جتھوں تک ساڈی جماعت دا تعلق اے سانوں ایس ددھ نال غرض ای نہیں۔ ایہ فارم ہائوس جدوں سانوں ددھ دا کٹورا دیندا اے تے اوہدے وچ میگناں پا دیندا اے۔ پہلے کہیا جاندا سی آم کے آم گٹھلیوں کے دام ہن اسیں نہیں کہہ سکدے ددھ دا ددھ میگناں دیاں مینگناں۔ اسیں اپنے فارم ہائوس دے خالص ددھ تے یقین رکھنے آں جے ایہ دوویں پارٹی ایس ددھ دی بوتل تے لڑائی نہ کرن تے اسٹیبلشمنٹ دے فارم ہائوس چوں ملک پاکستان دے ہر گھر تک خالص ددھ اپڑ جاوے۔ آزمائش شرط اے۔ اطلاع اے کہ اک شہری شہزاد نے پرویزالٰہی دے تریہہ توں ودھ مشیراں دی تعیناتی ہائیکورٹ وچ چیلنج کر دتی۔ پرویزالٰہی نے کہیا اے کہ خوئے بدرابہانہ بسیار۔ ساڈی ق لیگ جو ہن وڈے بھائی لے اڑے نیں دے کسے کارکن نے شہبازشریف دی ستر رکنی کابینہ دے بارے کوئی رٹ دائر نہیں کیتی۔ جتھے شہبازشریف دی حکومت اے اوتھے صرف ستائی تھانے نیں۔ اوہناں نے اینے مشیر رکھے ہوئے نیں ایس توں ودھ تھانے تے ساڈے ضلع گجرات دے نیں۔ پہلے اوہناں دے ستر وزیر مشیر سن ہن نعمان لنگڑیال تے سردار یوسف دے پُتر نوں وی مشیر بنا لیا اے۔ اسیں تے کسے نوں مشیر نہیں لایا۔ انج سانوں مشیر دی لوڑ وی نہیں۔ سانوں ایہو کافی نیں جو اوہناں دے سارے مشیراں تے بھاری نیں۔ بے شک ڈنڈا سوٹا کر کے ویکھ لوو۔ ایسے لئی ایہ سانوں جان توں وی پیارے نیں۔٭