صوفی غلام محمد بٹؒ ہوراں دی برسی دا اکٹھ

گوجرانوالہ دی تحصیل وزیرآباد دے تریخی قصبے احمد نگر چٹھہ دے مہان سماجی تے سیاسی کارکن صوفی غلام محمد بٹ دی 26برسی دی مناسبت نال حفیظ تائب پریس کلب احمد نگر چٹھہ وچ خصوصی تقریب دا پربندھ کیتا گیا جہدے وچ مقامی صحافیاں دی کثیر تعداد دے علاوہ ہرشعبہ زندگی نال تعلق رکھن والی نمایاں شخصیات نے رلت کیتی۔ تقریب دے اُچیچے پروہنیاں وچ چودھری طارق ڈھلوں، سید احسان اللہ تے پنجابی زبان و ادب دا معتبر حوالہ تے بہت وڈے پیوصوفی صاحب دے اکلوتے پُتر مدثر اقبال بٹ شامل سن۔ ایس موقعے تے نعت خواں فیصل سلطانی، ملک طالب حسین تے امتیاز الحسن قریشی نے حضور نبی اکرمۖ دی خدمت وچ نعتیہ کلام ہدیتاََ پیش کیتا جد کہ تقریب دا آغاز تلاوتِ کلامِ پاک نال کیتاگیا۔
تقریب دے شرکا نے صوفی غلام محمد بٹ دی عوامی حقوق لئی جدوجہد تے کمزور تے پِسے ہوئے طبقات لئی اوہناں دی آواز بلند کرن اتے کھل کے گل کیتی تے عوامی حقاں دے تحفظ لئی اوہناں دی جدوجہد اتے گل کردے ہوئے آکھیا کہ اج ایہہ وراثت مدثراقبال بٹ تے اوہناں دے صاحبزادے بلال مدثر بٹ نوں منتقل ہو گئی اے جو عوام دے حقوق لئی ہر محاذ اتے سرگرم وکھائی دیندے نیں۔
منے پرمنے شاعر ڈاکٹر شبیر احمد نے تقریب نال خطاب کردیاں ہوئیاں آکھیا:صوفی غلام محمد بٹ صرف ساڈے ای نہیں بلکہ ساڈے بزرگاں دے وی بزرگ سن۔ ایہدے وچ کوئی شبہ نہیں کہ اوہ اک عہد ساز شخصیت سن تے اقبال دے شاہین وانگوں اک بے خوف تے نڈررہنما سن۔
مقامی صحافی ملک شاکر نے شرکا نال گل کردیاں آکھیا
صوفی غلام محمد بٹ دی 26ویں برسی دی ایس تقریب دے انعقاد توں ایہہ حقیقت عیاں ہو گئی اے کہ نیک تے صالح اولاد ہمیشہ اپنے والدین دا نام زندہ رکھدی اے تے مدثر اقبال بٹ نے اپنے ہر عمل توں ایہہ ثابت کیتا اے۔
مقامی شاعر سلیم دلاوری نے صوفی غلام محمد بٹ نوں منظوم خراج تحسین پیش کیتا۔
سوہدرہ پریس کلب دے صدر نجیب اللہ ملک نے کہیا
صوفی غلام محمد بٹ کسے تعارف دے محتاج نہیں۔ اوہناں نے غریب تے محکوم طبقیاں دے تحفظ لئی اپنی زندگی وقف کیتی تے طاقت وراں دے خلاف علم جہاد بلند کیتا تے محکوم طبقیاں نوں انصاف دوان لئی اوہناں دے شانہ بشانہ جدوجہد کیتی۔
مقامی صحافی حکیم حفیظ اللہ منہاس نے کہیا: اج اک درویش ‘ غریب پرور انسان صوفی غلام محمد بٹ دی 26ویں برسی دے موقعے تے اسیں نہ صرف اوہناں نوں یاد کرن لئی اکٹھے ہوئے آں بلکہ ایس تقریب دے انعقاد دا اک اہم مقصد اوہناں دے ایصال ثواب دا اہتمام کرنا وی سی۔ دعا گو آںکہ رب تبارک تعالیٰ اوہناں نوں جنت الفردوس وچ اعلیٰ مقام عطا فرماوے۔
پنجابی میڈیا گروپ دے صدر ندیم رضا نے آکھیا
صوفی صاحب دے نام دے نال صوفی نہ وی ہوندا تے اسیں آپ ای صوفی دا سابقہ لا دینا سی’ اوہ حقیقت وچ اک درویش صفت انسان سن۔
اوہناں نے ہور آکھیا کہ مدثر اقبال بٹ دے نال کجھ سال دا رشتہ اے مگر ایہہ کجھ سال انج نیں گویا کئی صدیاں اتے محیط ہون۔ اک صوفی دی سب توں وڈی علامت ای ایہہ اے کہ اوہ دوجیاں نوں عطا کردا اے تے ساریاں کولوں لکا کے عطا کردا اے۔ میں مدثر اقبال بٹ دی شخصیت بارے جدوں وی جانن دی کوشش کرنا واں تے ایہہ پتہ ہوندا اے کہ اوہناں دی شخصیت دی بہت ساری پرتاں ہن وی ایسیاں نیں جہناں نوں کھولیا ای نہیں گیا۔
منے پرمنے عالم دین قاری محمد یونس چشتی نے خطاب کردیاں آکھیا عاشق رسولۖ صوفی غلام محمددی کرامت ای ایہہ اے کہ میں گوجرانوالہ توں آیا تے دوستاں نے ایس تقریب بارے آگاہ کیتا۔اوہناں نے ہور آکھیا حدیث مبارک اے کہ رب اوہدے کولوں راضی ہوندا اے جہدا والد اوہدے توں راضی ہووے۔
خیال رہوے کہ مدثر اقبال بٹ دی اپنے والد تے تحریک پاکستان دے دلیر تے سرگرم رہنما صوفی غلام محمد بٹ دی خدمات نوں عوام دے روبرو پیش کرن لئی خدمات کسے کولوں لکیاں نہیں۔
اوہناں نے اپنے اک تاثراتی مضمون وچ اپنے جذبات دا کجھ انج اظہار کیتا سی:
صوفی صاحب واقعی بہادر انسان سن’ اوہناں دے مقابل حامد ناصر چٹھہ دے والد صلاح الدین چٹھہ سنے پوری مشینری سی لیکن ایہہ درویش تے صوفی منش تن تنہا میدان وچ رہیا تے تادم مرگ ایس طبقے لئی لڑدا رہیا جہنوں افسوس کہ ہن وی اپنے حقوق لئی آواز بلند کرنا نہیں آیا۔ میں جدوں عملی زندگی وَل آیا تے میری وراثت وچ ایہو سی کہ ایس طبقے دے حقوق لئی ڈٹ جاواں جہدے کول قوت گویائی وی نہیں۔ جو حرف شکایت توں وی محروم اے۔ جہدی اکھاں وچ سفنیاں دی جگہ مایوسیاں دے انھیرے نیں۔ اوہ جو غلام ابن غلام اے’ جہدی بنیاد وچ خوف تے محرومی اے۔ ایس محروم طبقے لئی لڑنا میں صوفی صاحب کولوں سکھیا تے ہن تک لڑ رہیا واں۔ اوہ آکھیا کردے سن کہ ہار منو گے تے مسلسل ہاردے چلے جائو گے’ ڈٹ جائو گے تے حسین ابن علی وانگوں کدی نہیں ہارو گے۔ میں خلوص نیت نال لڑدا رہیا تے ہمیشہ ناساز حالات وچ وی فتح یاب ہویا۔
مدثر اقبال بٹ دے ایہناں الفاظ توں
انکار ممکن نہیں کیوں جے صوفی غلام محمد بٹ نے اک ایسی زندگی بسر کیتی جہدے بیان نوں دفتر درکار ہون گے۔ اوہناں نے احمد نگر وچ تحریک آزادی دے حوالے نال شعور بیدار کرن لئی عوام وچ رہندے ہوئے نظام دی تبدیلی دا نعرہ بلند کیتا۔ صوفی غلام محمد بٹ نے بے شمار صعوبتاں دا سامنا وی کیتا۔ حقیقت مگر ایہہ اے کہ مسلماناں لئی اک آزاد وطن دا حصول اوہناں دی حیاتی دا مُڈھلا مقصد سی تے 14 اگست 1947 نوں پاکستان آزاد ملک دے طور تے عالمی نقشے اتے نمودار ہویا تے اوہ سجدہ شکر وچ ڈگ گئے۔ صوفی غلام محمد بٹ نوں اوہناں دی بے مثل جدوجہد دا ثمر مل گیا سی۔ اوہناں دی شناخت ہن پاکستانی شہری دے طور تے ہون لگی سی۔
ایہہ حقیقت وی روز روشن وانگوں عیاں اے کہ صوفی غلام محمد بٹ جیہے کارکن ای سن جہناں نے مسلماناں لئی علامہ اقبال دے ویکھے گئے آزاد وطن دے سفنے نوں تعبیر دتی۔ اوہ قافلہ سالار نہیں سن لیکن مرد مجاہد ضرور سن۔ اوہناں دی ایس جدوجہد نے احمد نگر دے نوجواناں وچ نویں وطن دی ترقی تے کامیابی لئی کم کرن دے جذبے نوں مہمیز دتی۔ اوہناں نے شعبہ طب دا رخ کیتا تے اوہ کمال حاصل کیتا کہ دوردراز دے لوک علاج کروان لئی احمد نگر دا رخ کرن لگے تے شفا پان لگے۔ ایہناں بے وسیلہ لوکاں دی دعاواں دا اثر سی یا کجھ ہور… صوفی غلام محمد بٹ نے ہمیشہ غریب تے محکوم طبقیاں لئی آواز بلند کیتی تے جدوں ایہہ ویکھیا کہ اوہناں لئی سیاست کرنا ضروری ہو چکیا اے تے اوہناں نے احمد نگر دے چٹھیاں دے خلاف انتخابی معرکے وچ اترن دا فیصلہ کیتا تے اوہناں دا غیر معمولی جذبہ مخالف امیدوار دی اخلاقی شکست اتے منتج ہویا۔
صوفی غلام محمد بٹ محض نام دے ای صوفی نہیں سن بلکہ اوہ تصوف اتے گہرا یقین رکھدے سن۔ آپ دی زندگی عشق رسولۖ نال عبارت سی۔ اوہناں دی زندگی دے دو بنیادی مقصد سن۔ عوامی خدمت تے خدا تبارک تعالیٰ دی رضا حاصل کرنا۔ ایہہ اوہ بنیادی وجوہ نیں جہناں کارن آپ دی احمد نگر وچ ہون والی برسی دی ایس تقریب وچ مختلف شعبہ ہائے زندگی نال تعلق رکھن والے شہریاں دی وڈی تعداد شریک ہوئی جہناں وچ صحافی’ شاعر تے دانشور سارے شامل سن۔ اوہناں نے اپنا مزاحمتی ورثہ اپنے اکلوتے صاحبزادے مدثر اقبال بٹ نوں منتقل کیتا تے ہن ایس ورثے نوں اوہناں دے پوتے بلال مدثر بٹ اگے ودھا رہے نیں جہناں نے صحافت دا پیشہ روپے پیسے دی چمک لئی نہیں بلکہ کلمہ حق بلند کرن لئی اختیار کیتا۔
ایہہ پروقار تقریب صوفی غلام محمد بٹ دی یادتازہ کرن تے اوہناں نوں خراج تحسین پیش کرن لئی سی جہدے نال خطاب کردے ہوئے مقررین نے صوفی غلام محمد بٹ دی سماجی تے سیاسی خدمات اتے مفصل چانن پایا تے آکھیا کہ صوفی غلام محمد بٹ نے ایس علاقے وچ پسے ہوئے طبقیاں لئی نہ صرف آواز بلند کیتی بلکہ اوہناں دے مسئلیاں دے حل لئی عملی جدوجہد وی کیتی۔
صوفی حکیم غلام محمد بٹ دے ہونہار صاحبزادے تے چیئرمین پنجابی میڈیا گروپ مدثر اقبال بٹ نے تقریب نال خطاب کردے ہوئے حفیظ تائب پریس کلب دے عہدیداراں تے تقریب دے شرکا دا شکریہ ادا کیتا جہناں نے ایس علاقے دی اک دلیر تے توانا آواز حکیم صوفی غلام محمد بٹ دی برسی دے موقعے تے ایس پروقار تے روحانی تقریب دا پربندھ کیتا۔
اوہناں نے تقریب نال خطاب کردے ہوئے آکھیا اپنے شہر تے مٹی دے نال عشق میرے لہو وچ رچیا بسیا اے۔ میں حفیظ تائب پریس کلب دا شکر گزار آں جہنے ایس پروقار تقریب دا پربندھ کیتا تے سانوں ایہدے وچ رلت دی دعوت دتی۔ میرے لئی ایس دھرتی اتے موجود ہونا یقینا باعث برکت اے۔ تقریب دے اختتام تے شرکا نے صوفی غلام محمد بٹ دے درجات دی بلندی لئی دعا تے فاتحہ خوانی وی کیتی۔