احمد نگر دی ہر دل عزیز شخصیت سیٹھ احسان ولوں مدثر اقبال دے اعزاز وچ عشائیہ

احمد نگر چٹھہ دی منی پرمنی شخصیت سیٹھ احسان اللہ نے پچھلے دِناںچیئرمین پنجابی میڈیا گروپ مدثر اقبال بٹ دے اعزاز وچ عشائیہ دا پربندھ کیتا جہدے وچ احمد نگر دی منی پرمنی تے مقتدر شخصیات نے رلت کیتی۔ تقریب وچ چوہدری طارق رسول ڈھلوں’ ملک امتیاز احمد تے اعجاز حسین عاجز نے اُچیچی رلت کیتی۔تقریب وچ گل بات کردیاں سیٹھ احسان اللہ نے آکھیا کہ مدثر اقبال بٹ احمد نگر دا فخر نیں تے ایس علاقے لئی اوہناں دیاں سماجی’ سیاسی تے ثقافتی خدمات نوں کسے وی شکل نظرانداز نہیں کیتا جا سکدا۔
اعجاز حین عاجز نے آکھیا کہ مدثر اقبال بٹ نے ایس علاقے دے نوجواناں دی ذہنی نشوونما’ تربیت وچ سب توں وڈا کردار ادا کیتا اے۔ ایہو وجہ اے کہ اوہ ایس علاقے دے لوکاں لئی جرات تے استقامت دا استعارہ نیں۔
طارق رسول ڈھلوںنے مدثر بٹ نوں اک چنگا دوست تے سنگی قرار دتا تے آکھیا کہ ایس علاقے دے لوک مدثر بٹ لئی محبت تے پیار دے جذبے رکھدے نیں۔
ملک امتیاز احمد نے مدثراقبال بٹ تے چوہدری طارق رسول ڈھلوںدی سماجی خدمات تے محبت دے جذبے دی تعریف کردیاں ہوئیاں آکھیا کہ اوہناں نوں ایس علاقے نال لگائو تے تعلق رکھنا ہووے گا۔ ایس توں نوجوان نسل وچ خدمت’ جرات تے استقامت دا جذبہ پیدا ہووے گا۔
تقریب وچ جواد احمد بٹ’ ڈاکٹر رشید احمد’ ماسٹر امتیاز احمد’ فاروق احمد بٹ’ عارف ناز’ حکیم باری، حکیم حفیظ اللہ منہاس’ محمد اسلام جنجوعہ’ محمد عمران رانجھا’ رانا ارشاد اللہ’ سیٹھ وقاص’ محمد سہیل’ سیٹھ اورنگ زیب’ رانا توصیف تے شیخ عبداللطیف دے علاوہ سنگیاں دی وڈی گنتی نے رلت کیتی تے مدثر اقبال بٹ دی خدمات نوں خراج تحسین پیش کیتا۔
چیئرمین پنجابی میڈیا گروپ مدثر اقبال بٹ نے اپنے میزبان سیٹھ احسان اللہ دا شکریہ ادا کردے ہوئے آکھیا کہ ہن اہلیان احمد نگر سماجی خدمت دے حوالے نال سیٹھ احسان وَل ویکھ رہے نیں جو انتہائی محنت تے محبت نال علاقے دے لوکاں دی خدمت وچ مصروف عمل نیں۔ اوہناں نے آکھیا کہ سیٹھ احسان اللہ دا اہالیان احمد نگر لئی ایمبولینس سروس شروع کرنا اہالیان علاقہ اتے بہت وڈا احسان اے۔ خدا اوہناں نوں علاقے دی ہور خدمت دی توفیق تے ہمت دیوے۔ اوہناں نے آکھیا کہ سیٹھ احسان اللہ محبت تے پیار نال گُنھیا ہویا انسان اے جہدی خدمت دا اعتراف ہر بندا کردا اے تے اسیں ایہدی کامیابی لئی دعاگو آں۔