اکبر علی غازی…سو کاماں تے اک آہری

کجھ لوک پروفیسر بن کے پڑھنا لکھنا شروع کر دے نیں، پر اکبر علی غازی اوہ پروفیسر اے جیہڑا پروفیسر بنن توں پہلاں وی پڑھدا لکھ دا سی۔ اِنج کہہ لو کہ اوہ پڑھ لکھ کے پروفیسر بنیا اے۔ ملک وال توں لے کے راہوالی تے راہوالی توں گورنمنٹ کالج ڈسکہ دا پندھ راہواں وچ ادبی، علمی، تدریسی تے پیار پریت دے نشان چھڈ دا ہویا پندھ اے۔ ایہہ ادب دا اوہ غازی اے جیہڑا جتھے وی گیا اے اپنی ہوند دے نشان چھڈ کے آیا اے۔ اکبر علی غازی دیاں ہمتاں تے پنجابی ادب نال پیار توں واقف لوک پہلاں ای جان دے سن کہ ہن غازی دے سیالکوٹ ضلع وچ آن مگروں پنجابی ادب دے اوہناں پکھاں اتے کم ہووے گا جنھاں ول پچھلے کئیاں ورہیاں توں کسے مورخ دا دھیان نہیں گیا۔ یاں لوک ایس ضلعے دے پنجابی ادب نوں ایس قابل ای نہیں سمجھ دے رہے کہ ایس پاسے وَل وی کھوج کیتی جاوے۔دھن حوصلہ اے ادب دے ایس غازی دا جیہڑا ہر ویلے ایس کھوج وچ رہیا اے کہ سیالکوٹ ضلعے دے کیہڑے پنڈ وچ کیہڑا لکھاری کتھے تے کدوں ہویا اے۔ اوہدیاں کتاباں کدوں تے کتھوں چھپیاں نیں۔ غازی نے اپنی اجے تک دی سیالکوٹ وچ ملازمت دا اپنا کالج وچ پیریڈپڑھان توں بعد دا کوئی پل وی ضائع نہیں کیتا۔ اوہنے اپنی ہنڈا بائیک اتے پنڈاں دا سفر کیتا تے لوکاں نوں ملدا ملاندا شاعراں دے گھروالیاں تیکر اپڑیا اے۔اوہ امتحانی انسپکشن ڈیوٹی تے ہووے یا پھر دا پھراندا کسے پنڈ ول نکل جائے اوہنے اپنی کھوج دا مقصد کدے وی وِسرن نہیں دتا۔ اکبر علی غازی ہوراں ضلع سیالکوٹ دے پنجابی ادب دی تاریخ لکھ دیاں اوہدے نال ہور وی کئی موضوعاں تے کم کیتا اے جویں سیالکوٹ دے اوہ پنجابی لکھاری جنھاں فارسی وچ شاعری کیتی اے، اتے سیالکوٹ دیاں سوانیاں دی پنجابی شاعری۔ غازی ہوراں دا ایہہ کم پی ایچ ڈی دے مقالے جیڈا کم اے۔ایسراں دے کم یونیورسٹیاں دے پڑھیاراں نوں کرنے چاہی دے نیں۔ گواچے ہیرے لبھنے، بدلاں اوہلے لکے تاریاں دیاں ڈھلکاں نوں لوکائی سامنے لیانا، ویلے دی دھوڑ چوں موتیاں نوں کڈھ کے اوہناں دی لِشک نوں ادب دا حصہ بنانا، ادبی تاریخ دیاں گواچیاں کڑیاں نوں ملانا، نویں نسل نوں اپنی گواچی ادبی تاریخ دی دکھ وکھانا وڈا کم اے۔ ایس سارے کم وچ مرن والیاں دیاں کتاباں تے اوہناں دیاں اکھراں دی بھال کرنی سوکھا کم اے پر جیوندے شاعراں کولوں اوہناں بارے پچھ دس کرنی، اوہناں کولوں کتاباں یاں اوہناں دی کیتی شاعری دا حوالہ منگنا اک اوکھا کم اے۔ موئے تے نخرے نہیں کر دے پر جیوندیاں دے ویکھنا تے مڑ مڑ کے اوہناں دے بوہے تے جانا ڈھیر اوکھا کم اے۔ ایس کم دی اہمیت دا غازی ورگے جوان نوں ای پتہ سی ایس لئی اوہ اک واری نہیں کئی کئی واری اِکو کتاب لئی یاں اِکو حوالے لئی اِکو تھاں تے گیا۔ ہمت نہیں ہاری تے حوصلہ نہیں چھڈیا۔
ڈاکٹراکبر علی غازی پنجابی ادب دی تاریخ دے ایس پکھ تے کم کردیاں نہ تھکیا اے تے نہ اکیا اے اتے نہ ای اجے رجیا اے۔اوہنوں پتہ اے کہ کئی لوک رہ گئے ہون گے،اتے اوہ ایہہ گل وی جان دا اے کہ تاریخ دا سفر ہمیشہ جاری رہندا اے۔ایس لئی اوہنے کئی پہلو آن والی نسل لئی وی چھڈ دتے نیں۔ اوہنے کئی تاریخی تے ادبی بھلیکھے وی کڈھے نیں تے کئی گھنجلاں وی کھولیاں نیں۔ تحقیقی اداریاں تے کھوج پرکھ کرن کروان والیاں تنظیماں نوں چاہی دا اے کہ جس علاقے دی ادبی تاریخ تے کوئی کم نہیں کر دا اوہ کم اکبر علی غازی نوں دتا جاوے۔ مینوں پورا یقین اے کہ اوہ اک مِتھے ہوئے ویلے وچ اپنے کم مکمل کر دیوے گا۔اکبر علی غازی عسکری ادارے چوں محکمہ تعلیم ول آیا اے تے اج وی اوہدے اندر اک باہمت جوان موجود اے جیہڑا اوہنوں اپنی منزل ول ٹور دیندا اے تے فیر اوہ اودوں تک نہ تے پچھے مڑ کے ویکھ دا اے اتے نہ ای کسے دی گل سن دا اے جدوں تک اوہ اپنی منزل تے نہیں پج جاندا اے۔سگوں غازی تے اپنی منزل تے پج کے اپنے پیراں دے کنڈے وی نہیں کڈھ دا تے اگلی منزل وَل ٹر پیندا اے۔پنجابی ادب نوں ایسراں دے شیرجواناں دی لوڑ اے۔سیانے ٹھیک ای آکھ دے نیں کہ سو کامے تے اک آہری برابر اے۔ اج سانوں پنجابی ادب وچ تھاں تھاں تے ایس دے سیوک تے کامے مل دے نیں پر غازی ورگے آہری بڑے گھٹ نیں۔اکبر علی غازی نے سیالکوٹ دے پنجابی ادب دی تاریخ لکھ کے ایس دھرتی دے پتر ہوون دا ثبوت دے دتا اے۔ اوہنے مڈھ رکھ دتا اے، ایس نوں اگے ٹورنا اداریاں تے ادبی تنظیماں دا کم اے۔ اوہنے ہمت تے مسلسل محنت نال ایس کم نوں سِرے چاہڑیا اے۔اوہنے تحقیق تے کھوج پرکھ دے سارے اصولاں تے لوڑاں نوں پورا کیتا اے۔ اوہنے مکمل حوالیاں نال گل کیتی اے۔ مینوں پورا یقین اے کہ اوہناں دی ایس کتاب نوں ادبی تاریخ دیاں کتاباں وچ وڈیائی ملے گی تے سیالکوٹ وچ تحقیقی کم دے کئی نویں بوہے کھلن گے اتے کھوج پرکھ کرن والیاں نوں ہر بوہے اگے اکبر علی غازی کھلوتا ہویا وکھالی دیوے گا کیوں جے اوہ اک آہری انسان اے اتے آہری نویاں راہواں بناندا اے تے لوکاں نوں اوہناں راہواں تے اگے ودھن دی پریرنا دیندا اے۔