حسین خان والا اٹھ ورھے بعد

اکتوبر 2014ئ’ ارسان نامی اک منڈے نے تھانہ گنڈاسنگھ والا دے دو جونیئر پولیس اہلکاراں نوں اک موبائل فون ویڈیو کلپ دتا جہدے وچ حسین خان والا پنڈ دے دو نوجوان ارسلان نال بدفعلی کر رہے نیں۔ پولیس والیاں نے اوس ویڈیو دی بنیاد تے دو نوجواناں حسیم عامر تے وسیم سندھی نوں پھڑ کے تھانے وچ بٹھا لیا پر پرچہ نہیں کٹیا۔ دو دن بعد حسیم دا باپ تے بھائی اک بااثر مقامی زمیندار ماسٹر ظفر دے نال تھانے آئے اوہناں دے نال متاثرہ منڈے ارسلان دی ماں بشیراں وی سی جو ملزم حسیم دے گھر کم کاج کردی سی۔ دوویں پولیس اہلکاراں نوں بشیراں نے اپنے ولوں اک خط دتا۔ اوہدے وچ لکھیا سی کہ کوئی غلط فہمی ہوئی سی جہڑی ہن رفع ہون دے بعد صلح ہو گئی اے ایس لئی دوہاں منڈیاں نوں چھڈ دتا جاوے۔ پولیس والیاں نے پندراں ہزار روپیے لے کے اوہناں منڈیاں نوں جان دتا۔
مارچ 2015′ پہلی ویڈیو پولیس اہلکاراں دے نوٹس وچ آن دے بعد حسیم عامر دے اک ہمزاد نے حسین خان والا دے اک ہور بااثر بندے مبین غزنوی نوں بہت ساریاں ویڈیو پھڑا دتیاں۔ مبین غزنوی دی ماسٹر ظفر نال چشمک چل رہی سی ایہ ویڈیوز ڈھائی مہینے تک مبین غزنوی دے کول پئیاں رہیاں۔ مئی 2015ء وچ اوہنے ایہ ویڈیوز ڈی پی او قصور نوں وکھائیاں۔ اوہدی بھنک حسیم عامر نوں پئی تے اوہنے اپنے دو بھراواں دے نال پنڈ دے چوک وچ مبین غزنوی تے تشدد کردے ہوئے سنگین نتائج دیاں دھمکیاں دتیاں۔ مبین غزنوی نے ایس واقعے دی کوئی ایف آئی آر نہیں کٹوائی پر اک چینل دے اک مقامی رپورٹر دے حوالے کر دتیاں۔ ایس طرح پاکستان دی تریخ دا سب توں وڈا ویڈیو سیکس سکینڈل سامنے آیا ایہدے اک مہینے بعد جدوں علاقے وچ احتجاجی جلوس نکلن لگ پئے تے پنجاب اسمبلی دے سامنے دھرنا دتا گیا تے باقی چینلاں نے وی کوریج شروع کر دتی۔ کسے نے کہیا کہ 280 توں ودھ بالاں نوں جنسی زیادتی دا نشانہ بنایا گیا۔
بہرحال پنجاب دے اوس ویلے دے وزیر قنون رانا ثناء اللہ نے شروع وچ تے ایس سکینڈل نوں اک قطعہ اراضی دی ملکیت دے دوطرفہ جھگڑے وچ اک فریق ولوں دوجے فریق نوں نیواں وکھان دی کوشش قرار دتا جدوں امن و امان دے معاملات ہتھ چوں نکلن لگے تے وزیراعلیٰ شہبازشریف نے مسلم لیگ ن دے ایس سیاسی گڑھ وچ پارٹی دی ساکھ بچان لئی اک پنج رکنی جوائنٹ انوسٹی گیشن ٹیم تشکیل دتی جے آئی ٹی نے بالاں دے ریپ’ بلیک میلنگ دے راہیں رقم وٹن تے ویڈیوز بنان دے الزامات دی تن مہینے تک چھان بین کیتی۔ ساڑھے چار سو بیانات قلمبند ہوئے کل اکتی ایف آئی آرز درج ہوئیاں اوہناں وچوں 21 اک ای گروہ دے خلاف سن۔ ویڈیوزتے دوجے ثبوتاں دی بنیا دتے مجموعی طورتے ویہہ ملزم نامزد ہوئے نورکنی گینگ دا سرغنہ اوہو پنجی سالہ نوجوان حسیم عامر سی تے ایس گینگ دے باقی ارکان دیاں عمراں وی پندراں توں پنجی ورھے دے درمیان سن۔ حسیم دا اک بھائی علیم آصف وی شریک جرم سی۔
جے آئی ٹی دے سامنے سنتالی ویڈیوز سامنے آئیاں اکثر ویڈیوز تن توں چار ورھے پرانیاں سن انسداد دہشت گردی دی عدالت وچ تن ورھے تک مقدمہ چلیا۔ تن دے توں علاوہ باقی نوں نکافی یاں ناقص ثبوتاں دی بنیاد تے بری کر دتا گیا۔ حسیم عامر’ علیم آصف تے وسیم سندھی نوں عمرقید تے پنج پنج لکھ روپیے جرمانے دی سزا سنائی گئی۔ جے آئی ٹی نے دو ارکان قومی اسمبلی تے اک رکن صوبائی اسمبلی دا بیان قلمبند کر کے نتیجہ کڈھیا کہ ملزماں دے حق وچ سیاسی اثرورسوخ استعمال نہیں ہویا پر انسانی حقوق کمیشن دی اک حقائق جو ٹیم دی رائے اوہدے الٹ سی۔ میڈیا کوریج پاروں حسین خان والا کیس دے متاثرین نوں وزیراعلیٰ شہباز شریف دی حکومت نے معاوضے’ روزگار تے قنونی مدد دی یقین دہانی کروائی پر وعدہ وعدہ ای رہیا پر مارچ 2016ء وچ سینٹ نے ریپ تے جنسی تشدد دے نال نال بچیاں تے مجرمانہ جنسی حملیاں’ چائلڈ پورنوگرافی تے بچیاں دی ٹریفکنگ نوں وی سنگین جرماں دی فہرست وچ شامل کر لیا۔
جنوری 2018ء وچ قصور شہر وچ زینب ریپ قتل کیس نے اک واری فیر ملک نوں ہلا کے رکھ دتا۔ زینب دے قاتل عمران علی نے 9 دوجے گھٹ عمر دے بالاں دے ریپ تے قتل دا وی اعتراف کیتا۔ پارلیمنٹ ولوں زینب الرٹ بل دی منظوری مگروں قصور دے علاقے پتوکی وچ تن نکے بالاں دیاں لاشاں پئیاں ملیاں۔ عملی صورت حال ایہہ وے کہ حسین خان والا کیس وچ جو ملزم بری ہو گئے۔ اوہناں دے تعلقات تے اثر دے ڈر توں ویڈیو کیس وچ سامنے آن والے ستاراں متاثرہ بچے تے کجھ دے خاندان وی نقل مکانی کر گئے۔ ایہناں بچیاں وچوں صرف اک ایف اے تے اک میٹرک کر پایا باقی بچے اپنی پچھان چھپا کے یاں بدل بدل کے وکھووکھ تھاواں تے معمولی نوکریاں یاں دیہاڑیاں کر رہے نیں۔
حسین خان والا کیس وچ ستاراں متاثرین نوجوان منڈے سن۔ اٹھارویں متاثرہ جہدا ایس کیس نال براہ راست تعلق نہیں پر جے آئی ٹی دی تفتیش دوران ایس کڑی دا واقعہ علم وچ آیا اوہدی وکھری توں ایف آئی آر درج ہوئی۔ جے آئی ٹی رپورٹ دے مطابق ایہ کڑی حسین خان والا وچ کسے ارشد بھٹی دے گھر کم کردی سی۔ جدوں اوس کڑی نے کم چھڈیا تے اوہدیاں 38 ننگیاں فوٹواں ملزم نے مقامی آئس فیکٹری دے مالک اشفاق تے اوہدے ساتھی ابراہیم عرف ڈبو دے حوالے کر دتیاں۔ دوہاں نے اوس کڑی دے مفلوک الحال والدین توں مجموعی طور تے اوہناں فوٹواں دے بدلے تقریباً چار لکھ روپیے وٹے۔ تنے ملزماں نوں حراست وچ لین مگروں ایف آئی آر وی کٹی۔ کڑی دا خاندان پنڈ چھڈ کے شہر وچ منتقل ہو گیا تے اوہناں دی شناخت بھیڑ وچ گواچ گئی۔ بہرحال ایہناں واقعات دے بعد قصور یاں آل دوالے دے سماج وچ کنی بیداری ودھی ایہدا ثبوت ایہہ وے کہ حسین خان والا ویڈیو سکینڈل سامنے آن دے بعد 2016′ ضلع قصور وچ بچیاں تے جنسی تشدد دے اک سو بتالی’ 2017ء وچ 92′ 2018ء وچ اک سو دو’ 2019 وچ اک بتی’ 2020ء وچ اک سو بانوے تے 2021 وچ 298 واقعات سامنے آئے۔٭٭