گھابری ہوئی اشرافیہ

اشرافیہ گھابری ہوئی’ سکتے وچ’ کجھ چھپائے چھپ نہیں رہیا’ اک اک کرکے پردے ہٹ رہے’ اک اک کرکے سارے ننگے ہو رہے نیں۔ ننگا پن اجیہا’ گھن آ رہی’ ٹیکنالوجی’ میڈیا نے ہر دھونس’ ہر دھاندلی’ ہر خوف’ ہر رازداری دا سواستیاناس کر دتا۔ ہزاراں میل دور روسی صدر دے نال براجمان’ مائیک نال کھیڈدے شہبازشریف اجے پیوٹن دے کول ای بیٹھے سن کہ پوری دنیا وچ ایہناں دا شاہکار آڈیوکلپ کرونا وانگوں پھیل گیا۔ شہبازشریف بحیثیت وزیراعظم اپنے عدالتی مفرور بھائی نوں لندن وچ ملن’ اوہ شور مچے کہ سارے غلاماں نوں سب کجھ چھڈ چھڈا کے بھونڈیاں بھونڈیاں تاویلاں گھڑنیاں پے گئیاں۔ شہبازشریف’ بلاول بھٹو’ وزیراں سنے امریکہ وچ مہنگے ہوٹلاں وچ ٹھہرن۔ اوہ شور مچے کہ شہبازشریف’ بلاول بھٹو’ وزیراں ساریاں نوں ہوٹل خرچے اپنی جیباں چوں دینے پین۔ حالاں کہ کل تک اوہناں دی برتھ ڈے پارٹیاں’ کتیاں دیاں خوراکاں’ نوکراں’ چاکرا ںدے خرچے وی سرکاری خزانہ اٹھا رہیا سی تے کسے نوں کنوں کن خبر نہیں سی ہو رہی۔ کدی آئینی ترمیم ہو جاندی سی تے پتا ای نہیں سی چلدا کہ ایس ترمیم دے پچھے کہدے کہڑے مفادات چھپے ہوئے۔ اج حالت ایہ فل سٹاپ کامہ بدلے’ ہر کوئی تہہ تک اپڑ جاوے۔ کدی جہدا دل کردا سی بڑی خاموشی نال ملک’ قوم’ جمہوریت دے ناں تے جناں وڈا یوٹرن مار لیندا’ اج کوئی چھوٹی جہی یوٹرنی وی مارے’ میڈیا اوہدے پچھلے بیانات’ فرمودات سنا سنا’ وکھا وکھا کے نیم پاگل کر دیوے۔ ایہ نہیں کہ ٹیکنالوجی’ میڈیا دے ڈر توں اشرافیہ گھراں وچ بہہ گئی’ توبہ تائب ہو گئی’ نہیں بالکل نہیں’ اوہ مسلسل اپنی کاروائیاں وچ لگی ہوئی’ اجے وی بھٹو’ ضیا دی رہند کھوہند اک ہو کے اقتدار دے مزے ملک’ قوم’ جمہوریت دی چھتری تھلے چھپان وچ لگی ہوئی۔ اجے دن دیہاڑے بے شرمی نال مجرماں’ ملزماں تے اوہناں دے وکیلاں نے اپنے کیساں نوں سامنے رکھ کے نیب ترمیماں کر لئیاں۔
اشرافیہ گھابری ہوئی’ سکتے وچ’ کجھ چھپائے چھپ نہیں رہیا’ اک اک کرکے پردے ہٹ رہے’ اک اک کرکے سارے ننگے ہو رہے’ ننگا پن اجیہا’ گھن آ رہی گزرے پنج مہینیاں نوں لے لوو’ ایناں کجھ لوک ہویا کہ ملک لیکولیک ہو گیا۔ سجری سجری آڈیو عمران خان’ اوہناں دے پرنسپل سیکرٹری اعظم خان دا’ اعظم خان دی سفارتی مراسلے نوں سازش وچ ڈھالن دی منصوبہ بندی’ شرمناک’ عمران خان دا کہنا ایہدے تے کھیڈنے آں’ شرمناک’ اوہ میرجعفر’ میرصادق’ اوہ سازشی بیانیہ’ اوہ غداری دے فتوے’ شرمناک’ اک آڈیو سابق خاتون اول لئی ہیرے دی انگوٹھی ارینج ہو رہی’ اک آڈیو’ اک بزنس ٹائیکون زرداری صاحب نوں کہہ رہے نیں عمران خان بڑا اصرار کر رہیا اے تہاڈے نال صلح لئی’ اک آڈیو’ سابق خاتون اول اپنے سوشل میڈیا ہیڈ نوں کہہ رہیاں’ جو الزام لائے’ جو مخالف’ اوہنوں غدار بنا دیو’ اک آڈیو’ شوکت ترین پنجاب’ کے پی دے وزرائے خزانہ نوں اجیہا خط لکھن دا کہہ رہے کہ آئی ایم ایف دا معاہدہ ٹٹ جاوے۔ مطلب ملک جائے بھاڑ وچ’ اک ثاقب نثار دی آڈیو تے اوہ رانا شمیم دا حلف نامہ’ ایہ اج دی ٹیکنالوجی’ میڈیا دا ای دبائو کہ مسلم لیگ سندھ لائرزونگ دے نائب صدر جہناں نوں نوازشریف نے جج بنوایا جو نوازشریف دے وکیل رہے جہناں دی حلف نامے توں پہلاں مبینہ طور تے لندن وچ دو ملاقاتاں حسین نواز تے اک ملاقات نوازشریف نال ہوئی جہناں نے جدوں دس نومبر 2021ء نوں لندن وچ حلف نامہ لکھیا تے اوہناں نوں مبینہ طورتے مسلم لیگ (ن) دے لوک آپ نوٹری پبلک دفتر لے گئے تے اوہ جہناں دا سواتن ورھے دی خراٹے ماردی گہری نیند دے بعد اچانک ضمیر جاگیا اوہ رانا شمیم اپنے حلف نامے توں مُکر چکے۔
اشرافیہ گھابری ہوئی’ سکتے وچ’ کجھ چھپائے چھپ نہیں رہیا’ اک اک کرکے پردے ہٹ رہے’ اک اک کرکے سارے ننگے ہو رہے’ ننگا پن اجیہا’ گھن آ رہی۔ وزیراعظم شہبازشریف’ وزیراعظم ہائوس’ مریم نواز دیاں تن آڈیوز آ چکیاں’ جتھے ایہ دکھ کہ ہن وزیراعظم دا ٹیلی فون محفوظ نہیں’ وزیراعظم ہائوس محفوظ نہیں’ جتھے ایہ دکھ ڈارک ویب سائٹ تے ساڈا دو سو گھنٹیاں دا ریکارڈ پیا ہویا’ جتھے ایہ دکھ ڈارک ویب سائٹ تے ایس ریکارڈ دیاں بولیاں لگ رہیاں’ جتھے ایہ دکھ کہ پتہ نہیں اجے اگے کیہ کیہ آن والا’ کہڑی جگ ہنسائی ساڈی منتظر’ پاکستان ہور کناں تماشا بنے گا اوتھے دکھ ایہ وی کہ ساڈے وڈے اصل وچ کنے چھوٹے’ مریم نواز اپنے جوائی لئی بھارت توں مشینری’ جوائی دی ہائوسنگ سوسائٹی وچ پاور پلانٹ دیاں ڈیوٹیاں وزیراعظم ہائوس وچ لگا رہیاں’ شرم دی گل ایہہ انج محسوس ہو رہیا اے جیویں پورا وزیراعظم ہائوس جاتی امرا دا ملازم’ شرم دی گل ایہ وی گل جوائیاں تک اپڑ چکی’ ایہ کلاسیکی مثال دولت بذریعہ سیاست دی’ اک آڈیو وچ مریم نواز شہبازشریف نوں کہہ رہیاں نیں انکل تسیں پٹرول دیاں قیمتاں ودھائو’ ایہ اوہو مریم جو پٹرول دیاں قیمتاں ودھن تے فرمان ایہ ظلم’ مینوں بڑا دکھ’ نوازشریف تے راتاں نوں سوں نہیں سکدے اک ہور آڈیو وچ مریم شہبازشریف نوں کہہ رہیاں تسیں عمران خان دا ہیلتھ کارڈ بند کر دیو۔ اگے توں شہبازشریف فرما رہے ہاں میں فنڈز دی کمی دا بہانہ کر کے بند کر دیواں گا۔ تسیں سوچو کیہ ایہ سب 90ء دی دہائی وچ نہیں ہو رہیا ہووے گا پر اودوں ایہ ڈیجیٹل دور نہیںسی’ اودوں ایہ ٹیکنالوجی’ ایہ میڈیا نہیں سی اودوں سب کجھ ہوندا تے پردیاں وچ ای رہ جاندا سی۔ ٭٭