لانگ مارچ اتے شش و پنج وچ پئی بیوروکریسی

22کروڑ توں ودھ عوام دا ملک پاکستان ایس ویلے قدرتی آفات دی شدید لپیٹ وچ اے۔ کدھرے سیلاب’ کدھرے ڈینگی’ کدھرے کورونا تے کدھرے بھک افلاس’ بیچارگی دا راج نظر آندا اے۔ ایہناں آفتاں نال نبڑن لئی حکومتاں اپنے سارے وسائل بروئے کار لیاندے ہوئے عوام دے جان و مال دا تحفظ یقینی بناندیاں نیں تے اوہناں دی کوششاں’ محنت دے بل تے مصائب وچ ڈبے عوام نوں چین دا ساہ نصیب ہوندا اے۔ ساڈی بدقسمتی ایہہ ہے کہ نومبر وچ ملک دی سب توں اہم تقرری دا مرحلہ آ گیا اے جو عوام لئی تے شاید اہمیت نہیں رکھدی مگر سیاستداناں نے ایس تعیناتی نوں اپنی زندگی موت دا مسئلہ بنا لیا اے۔ گوکہ نظر ایہہ آرہیا اے کہ موجودہ حکومت دے وزیراعظم میاں شہباز شریف ایہہ اہم تقرری کرن گے مگر عمران خان شہباز شریف ولوں کیتی گئی تقرری نوں رکوان لئی ایڑی چوٹی دا زور لا رہے نیں تے وارم اپ مشقاں وچ مشغول نیں۔ عمران خان ایہہ سمجھدے نیں کہ جے ایہہ تقرری مسلم لیگ (ن) دے ہتھوں ہو گئی تے اوہناں دا سیاسی مستقبل تریک ہو جاوے گا تے ن لیگ اک واری فیر پوری آب و تاب نال چمکے گی ایس لئی اوہ چاہندے نیں کہ نومبر توں پہلاں ایس حکومت دا خاتمہ ہو جاوے جہدے لئی خیبر پختوانخوا ‘ پنجاب تے آزادکشمیر دے سارے وسائل وفاقی حکومت دے خاتمے لئی استعمال کر رہے نیں۔عمران خان پنجاب ایوان وزیراعلیٰ وچ بیٹھ کے پی ٹی آئی دے عہدیداراں تے ارکان اسمبلی وزیراں کولوں سرعام حلف لیندے نظر آ رہے نیں کہ وفاقی حکومت دے خاتمے توں پہلاں اوہ عمران خان دا ساتھ نہیں چھڈن گے۔ انھیری طوفان مینہ دی پرواہ کیتے بغیر سیسہ پلائی دیوار بن کے اسلام آباد وچ چڑھائی کرن گے ایتھوں تک کہ ایوان وزیراعظم توں میاں شہباز شریف نوں کڈ کے باہر نہ کیتا جاوے۔ حالانکہ ماضی دے جھروکیاں وچ جے اسیں جھانکیے تے اک ریت ایسی نظر آندی اے کہ جہڑی تقرری لئی عمران خان سردھڑ دی بازی لان لئی تیار نیں اوہ تقرری جہڑے وی وزیراعظم نے کیتی اے اوہ وزیراعظم اوس تقرری توں فیضیاب نہیں ہو سکیا۔ ہمیشہ اوہ تقرری کرن والا خسارے وچ ای رہندا اے۔ وزیراعظم شہباز شریف دن رات اسحاق ڈار دی معاونت دے نال تباہ حال معیشت تے سیلاب نال متاثرہ عوام دی بحالی لئی محنت کر رہے نیں تے دُوجے پاسے عمران خان پی ٹی آئی دے زیر اثر حکومتاں دے ساے وسائل سیلاب زدگان ‘وبائی امراض تے قدرتی آفتاں نال نمٹن دے بجائے اپنے لانگ مارچ لئی استعمال کر رہے نیں تے ساڈے عوام ایس نازک ویلے وچ عمران خان دی وفاق اتے چڑھائی دی کال دا انتظار کر رہے نیں۔ دُوجے پاسے 2005دے زلزلے وچ گھرے عوام نوں چھڈ کے برطانیہ جان والے اوس ویلے دے وزیراعلیٰ چودھری پرویزالٰہی تے مجبوری وچ گئے سن کیوں جے وزیراعلیٰ پرویزالٰہی’ چودھری شجاعت حسین تے اوہناں دی فیملی دے اہم بندیاں نوں پرویز مشرف ولوں جبری طور تے جلاوطن کر کے زیادتی دا نشانہ بنایا گیا سی۔ ہن تے نہ پرویز مشرف نیں نہ ای کوئی ہور فوجی ڈکٹیٹر جہڑا موجودہ وزیراعلیٰ چودھری پرویزالٰہی نوں ایس گل تے مجبور کردا کہ تسیں سیلاب وچ ڈبے عوام نوں دھتکار کے پنجاب اسمبلی دے جاری اجلاس دی بیساکھیاں اتے کھڑی حکومت نوں طول دوان لئی تسیں برطانیہ چلے گئے او۔
شنید اے کہ جہڑے نیوٹرل نال ملن تسیں برطانیہ گئے او ‘ اوہ تہاڈے نال نہیں ملن گے کیوں جے ہن اوہ واقعی نیوٹرل ہو چکے نیں۔ پرویزالٰہی دی موجودگی وچ وی افسر شاہی کوئی فلاحی یا عوامی مفادات دے پراجیکٹس کرن لئی تیار نہیں سی۔ ہن تے وزیراعلیٰ پنجاب وی غائب نیں تے پی ٹی آئی دے چیئرمین عمران خان پنجاب دے وسائل سیلاب زدگان ول موڑن دے بجائے اپنے لانگ مارچ لئی استعمال کر رہے نیں۔ صوبہ وبائی امراض دے شکنجے وچ بری طرح پھس چکیا اے۔ روزانہ انتہائی قیمتی جاناں دا ضیاع ہو رہیا اے۔ ڈینگی جئی جان لیوا وبا دی عملی طور تے روک تھام دے بجائے تصویری تے اشتہاری مہم افسر شاہی چلان وچ مصروف اے۔ صوبہ انتظامی طور تے ایس ویلے لاوارث اے۔ چیف سیکرٹری پنجاب ڈاکٹر کامران افضل وفاق تے پنجاب دی لڑائی وچ شٹل کاک بنے ہوئے نیں تے انتہائی ضدی بچیاں وانگوں پنجاب دی چیف سیکرٹری شپ چھڈ کے وفاق رپورٹ کرنا چاہندے نیں۔اوہناں دا خیال اے کہ جے اوہ اجے کم جاری رکھن گے تے چودھری پرویزالٰہی تے عمران خان دے نال نال شہباز شریف نوں کسے طرحاں راضی رکھن گے۔
ڈاکٹرکامران افضل سمجھدے نیں کہ شہباز شریف تے وفاقی حکومت نوں ایس ویلے راضی رکھنا انتہائی ضروری اے۔ جے مستقبل وچ عمران خان برسراقتدار آ گئے تے اوہناں نال وی حال احوال کیتے جان دی گنجائش رکھنی چاہیدی اے ایس لئی اوہ چھٹی داغ رہے نیں۔ انتہائی پروفیشنل ایماندار سمجھے جان والے سینئر بیورو کریٹ عبداللہ سنبل بطور قائم مقام چیف سیکرٹری تے خدمات انجام دے رہے نیں مگر اوہناں دے کول مستقل چارج نہ ہون دی وجہ نال بیوروکریسی تذبذب دا شکار اے کہ اوہ عبداللہ سنبل دے احکامات اتے عملدرآمد یقینی بناوے یا کل نوں ڈاکٹر کامران افضل دی واپسی نوں مدنظر رکھے۔ حقیقت وچ عبداللہ سنبل غیر متنازعہ افسر سمجھے جاندے نیں۔ بیورو کریسی تے حکومتی حلقیاں وچ چنگی شہرت رکھدے نیں۔ بیوروکریسی اوہناں دے نال کم کرن وچ کمفرٹیبل تے ضرور اے مگر اک ابہام جئی کیفیت
دی وجہ نال عبداللہ سنبل ولوں بیوروکریسی تے صوبے لئی کیتی جان والی گراں قدر خدمات مکمل طور تے اوہناں نوں نہیں پہنچ رہیاں۔ممکنہ لانگ مارچ دی صورت وچ بیوروکریسی تے پلس دا کوئی پرسان حال نہیں ہووے گا کیوں جے ایہہ سارے افسران وفاق نال تعلق رکھدے نیں۔ جہڑے خدمات صوبہ پنجاب یا خیبر پختوانخوا یا آزادکشمیر وچ انجام دے رہے نیں۔ ویکھن دی گل ایہہ اے کہ اوہ افسران جہناں وچ آئی جی آزادکشمیر ڈاکٹر امیر شیخ جہڑے وفاقی افسر نیں تے پیپلز پارٹی نال اوہناں دا ساری نوکری وچ چولی دامن دا ساتھ رہیا اے۔ کیہ ڈاکٹر امیر شیخ لانگ مارچ نوں سرکاری تحفظ دینگے؟ پنجاب دے آئی جی فیصل شاہکار وی وفاقی افسر نیں اوہ وی وفاقی اسٹیبلشمنٹ دے موڈ دے خلاف پنجاب توں لانگ مارچ نوں تحفظ نہیں دین گے۔ ایسے طرحاں خیبر پختوانخوا دے آئی جی وی وفاق دی ناراضگی مول نہیں لے سکدے۔ ایہناں حالات اتے جے غور کیتا جاوے تے عمران خان جو سمجھ رہے نیں کہ اوہناں نوں ساریاں سرکاری مراعات تے پروٹوکول نال اسلام آباد پہنچایا جاوے گا’ اک واری فیر اوہناں دی ذہنی اختراع نکام ہون دے کول اے۔