خلیق احمد دا الحمرا وچ42واں کامیاب بولان ایوارڈزشو

خلیق احمد ایوارڈز دی دنیا دا مستند تے پرانا نام اے۔ اوہناں دے بولان ایوارڈ دے چرچے ہر دور وچ رہے نیں۔ اوہناں نے فلم دے عروج و زوال وچ ایوارڈز نوں جاری تے ساری رکھیا۔ پاکستان فلم انڈسٹری دی تن نسلاں نوں اوہ ایوارڈز نال نواز چکے نیں۔ اوہناں دے ہم عصر اقبال رضوی وی انٹرنیشنل ایواڑدز کران دے ماہر منے جاندے نیں۔ مگر عرصہ دراز توں علالت دی وجہ نال ایس سلسلے نوں جاری نہیں رکھ پائے۔ پچھلے دناں الحمرا ہال دی مال اتے 42ویں بولان ایوارڈز دی رنگارنگ تقریب منعقد کیتی گئی جہدے وچ شوبز دے علاوہ دُوجے شعبہ جات دی کثیر تعداد نے رلت کیتی۔
شروع تے منے پرمنے صحافی قاری انجم شہزاد جہڑے کہ منے پرمنے قاری اجمل صاحب دے شاگرد نیں’ نے اپنی پرسوز آواز وچ تلاوت قرآن پاک کیتی جہنے ہال وچ موجود لوکاں دے دلاں نوں گرما دتا۔ اوہدے مگروں کمپیئرنگ دے فرائض منے پرمنے کمپیئر اسلم سیماب نے سنبھال لئے جو کہ کمپیئرنگ دے علاوہ ٹیلی فلماں دے مصنف تے ہدایتکار دی حیثیت توں وی جانے جاندے نیں۔ میرے خیال دے مطابق اوہ عصر حاضر دے کامیاب ترین کمپیئر نیں جو اپنی دن رات محنت نال دنیائے کمپیئرنگ دے امام طارق عزیز دے نقش قدم اتے اوہدی بلندیاں نوں چھون دی کوشش کر رہے نیں تے عنقریب اوہ اک مقامی چینل تے اک منفرد بگ انعامی مقابلہ دے شو دا آغاز کرن جا رہے نیں۔
ایوارڈ حاصل کرن والیاں وچ دنیائے فلم دی سپر فنکارہ مدیحہ شاہ، نشو بیگم، شیر میاں داد، برکھاٹی وی دی سی ای او غزل شاہ، کنگ پرفارمر غلام محی الدین تے دوجے بہت سارے لوک شامل سن۔ ایس موقعے تے مختلف فنکاراں نے اپنی بہترین پرفارمنس نال پروہنیاں نوں تفریح مہیا کیتی جہدے وچ عینی طاہرہ سرفہرست سن۔ ایس فقید المثال پروگرام وچ سب توں ودھ فلماں بنان والے ہدایتکار الطاف حسین’ ہدایتکار جاوید رضا ملک دی منی ہوئی کوریو گرافر میڈیم زریں پنا تے ٹی وی دے منے پرمنے پروڈیوسر آغا قیصر عباس نے اچیچی رلت کیتی جد کہ صحافی برادری دی وی کثیر تعداد موجو د سی جہناں وچ طاہر بخاری’ ٹھاکر لاہوری’ سید حسن عباس تے اشفاق حسین دے نام سرفہرست نیں۔