انوکھا حلف

رابعہ رحمان

پچھلے دناں 4اکتوبر 2022 نوں پاکستان تحریک انصاف دے چیئرمین تے پچھلے وزیراعظم عمران خان نے پشور دے وزیراعلیٰ ہائوس وچ اپنے حامیاں دے اک اجتماع وچ اوہناں کولوں اک حلف لیتا۔ ایہہ حلف اج کل ہر پاسے زیر بحث اے تے بہت سارے لوکی ایہنوں نازی جرمنی دے اوس حلف نال تشبیہ دے رہے نیں جہڑا جرمن ڈکٹیٹر ہٹلر لیا کردا سی۔ ایتھوں تک کہ ایس حلف دے دوران عمران خان تے اوہناں دے ساتھیاں دا ہتھ چکن دا انداز وی نازی جرمنی دے حلف دے دوران ہتھ چکن دے انداز نال ملدا جلدا سی۔ ایس حلف وچ عمران خان اپنے ساتھیاں کولوں ایس گل دا وعدہ لے رہے نیں کہ اوہ موجودہ حکومت نوں اقتدار توں علیحدہ کرن لئی شروع کیتی جان والی تحریک جہدا مقصد اسلام آباد ول مارچ ہووے گا’ وچ اوہناں دا ہر طرحاں ساتھ دین گے تے کسے وی قسم دی قربانی توں دریغ نہیں کیتا جاوے گا ایتھوں تک کہ ایس جدوجہد نوں جہاد دا نام دتا گیا اے۔ ایہہ کوئی نارمل پیش رفت نہیں اے بلکہ اک انتہائی خطرناک رجحان تے صورتحال دی عکاسی کردی اے جہدا سامنا پاکستان نوں آئندہ کجھ دناں وچ کیتا جا سکدا اے۔ ایس تقریب لئی وزیراعلیٰ ہائوس دا انتخاب کرن تے وی بہت تنقید ہو رہی اے کیوں جے ایہہ صوبے دے چیف ایگزیکٹو دی سرکاری رہائشگاہ اے جہنوں ایس طرحاں دی متنازعہ تقریباں لئی کسے صورت استعمال نہیں کرنا چاہیدا اے۔ ساڈی سیاسی تریخ وچ ایس طرحاں دی مثال پہلاں کدی نہیں ملدی۔ ایہہ اک ایسے رجحان تے ذہنی سوچ نوں ہور پروان چڑھان دی دانستہ کوشش اے جہنے پہلاں ای ساڈے ملک تے معاشرے دا بہت نقصان کیتا اے۔ کسے شخص دی جدوجہد وچ ایس طرحاں اک باقاعدہ حلف دے ذریعے شامل ہونا فاشزم دی حقیقی مثال اے۔ سیاست داناں دی جمہوری تے سیاسی جدوجہد وچ ایس طرحاں دے حلف دی لوڑ نہیں پیندی کیوں جے اوتھے ایجنڈا ذاتی نہیں ہوندا۔
ایس سوچ تے طرزعمل نال ملک وچ ہور انارکی تے وگاڑ پیدا ہون دا خطرہ اے جہدا پاکستان کسے صورت متحمل نہیں ہو سکدا۔ عمران خان دے بقول اوہ ایہہ تحریک ملک وچ فروری وچ عام انتخابات دے انعقاد تے موجودہ حکومت نوں اقتدار توں وکھ کرن لئی شروع کر رہے نیں۔ انج دی حرکت اوہ مئی وچ وی کر چکے نیں مگر اوس ویلے موثر حکومتی اقدامات دی وجہ نال اوہ کامیاب نہیں ہو سکے۔ ہن حالات وچ تبدیلی آ چکی اے تے خیبر پختوانخوا دے علاوہ پنجاب وچ وی تحریک انصاف دی حکومت اے۔ ایہناں دو صوبیاں دی سرحداں وفاقی دارالحکومت اسلام آباد نال ملدیاں نیں لہٰذا کوئی وی عوامی مارچ یا جلوس بغیر کسے روک ٹوک دے اسلام آباد تک بآسانی پہنچ سکدا اے جہنوں فیر دارالحکومت وچ داخل ہون توں روکنا ناممکن ہووے گا۔ ایس ویلے ملک دے مجموعی اندرونی حالات کسے وی قسم دی ہنگامہ آرائی یا تصادم دے قطعی طور تے متحمل نہیں ہو سکدے۔ملک دا اک تہائی حصہ سیلاب نال بری طرح متاثر ہویا اے جہدے توں تقریباً تن کروڑ توں ودھ آبادی بہت اوکھے حالات وچ زندگی گزار رہی اے اج ساڈی سیاسی جماعتاں تے سیاستداناں نوں سیلاب توں گھرے ہوئے لوکاں دی مدد لئی ہر ویلے اوہناں دے نال ہونا چاہیدا اے نہ کہ سڑکاں تے گلیاں وچ تماشا لان۔
جے عمران خان صاحب الیکشن کروان وچ اینے سنجیدہ نیں تے فوری طور تے پنجاب تے خیبر پختوانخوا دی اسمبلیاں توڑ ن جہدے مگروں عام انتخابات کروانا کافی حد تک ممکن ہو جاوے گا۔ انج نہ کر کے اوہ ایس خدشے نوں سچ ثابت کر رہے نیں کہ اوہناں دا مقصد صرف ملک وچ انتشار’ انارکی تے وگاڑ پیدا کرنا اے نہ کہ فوری تے منصفانہ عام انتخابات۔ موجودہ حکومت دی آئینی مدت اگست 2022تک اے جہدے توں پہلاں ایہنوں اقتدار توں وکھ کرنا اک سیاسی تے جمہوری سوچ نہیں۔ ہنگامیاں’ جلوساں’ دھمکیاں تے ہر کسے نوں گالی دے کے جے حکومت نوں اقتدار توں وکھ ہون تے مجبور کیتا جاندا اے تے ایہہ اک خطرناک روایت نوں جنم دیوے گا۔ آئندہ فیر کسے لئی وی حکومت کرنا ممکن نہیں رہوے گا۔ عمران خان پچھلے 10ورھیاں توں وی ودھ عرصہ توں ایہو کم کردے چلے آ رہے نیں۔ اوہناں نے اپوزیشن وچ رہ کے افراتفری پیدا کرن دی کوشش کیتی اے جد کہ حکومت وچ رہ کے اپنی بدترین کارکردگی نال لوکاں نوں مایوس کیتا اے۔ ہن فیر نویں نعرے جہڑے صرف جھوٹ اتے مبنی نیں دے ذریعے لوکاں نوں ورغلان تے بیوقوف بنان دی اک منظم کوشش کیتی جا رہی اے’ معیشت پہلاں ای ہچکولے لے رہی اے جہدا ہور بیڑا غرق سیلاب نے کردِتا اے تے فیر اتوں سیاسی عدم استحکام جہدے ذمہ دار صرف عمران خان نیں’ جے اوہ ایہہ سمجھدے نیں کہ انج کر کے اوہ حالات ٹھیک کر لین گے تے فیرایہہ اوہناں دی خام خیالی اے۔ انج دے حالات تے رویے غیر جمہوری قوتاں نوں شہ دیندے نیں جہدا خمیازہ فیرسیاستدان ای بھگتدے نیں۔ اوہ اج تک سیلاب متاثرین دی دادرسی لئی نہیں گئے بلکہ ایس دوران وی اپنے سیاسی جلسے ملتوی نہیں کیتے۔ہر روز اپنی تقریراں نال عوام دے جذبات نوں ودھاندے نیں تے اداریاں دے خلاف نفرت پھیلاندے نیں لہٰذا ایس افراتفری دے حلف نوں سمجھنا تے لوکاں نوں متنبہ کرنا ہر کسے دا فرض اے۔ جمہوریت نام ای گل بات تے رویاں وچ لچک دا اے جہدے اتے بدقسمتی نال عمران خان یقین نہیں رکھدے۔