ساہیوال دی سنہری سرزمین تے تاریخ پاکپتن

کجھ دن پہلاں احمدخاور شہزاد تے عارف برلاس مینوں ملن آئے تے روحانی و تہذیبی اسرار دیاں گتھیاں سلجھاندی بڑی ای خوبصورت کتاب عنایت کردے ہوئے ایس حوالے نال ساہیوال وچ سجائی گئی محفل وچ شرکت دی دعوت دتی۔ پتہ نہیں کہڑا لمحہ سی میں بناں اپنا شیڈول ویکھے بے دھیانی وچ شرکت دا اقرار کر لیا۔ بعد وچ کئی دن سوچدی رہی پر سرا ہتھ اودوں آیا جدوں میں کتاب پڑھنی شروع کیتی۔ خاص کر صاحب کتاب دا تعارف نظر چوں گزریا۔ تاریخ پاکپتن اک ودھیا تحقیقی تصنیف اے۔ پاکپتن دے تعارف تے مقبولیت تے عظیم ولی تے صوفی شاعر بابا فرید دا ذکر تے دربار حاوی رہیا اے۔ پہلی واری دلکش تے موثر انداز وچ بابا فرید دے خصوصی ذکر دے نال میاں اللہ بخش طارق نے ایس دھرتی دے مذہبی’ روحانی’ معاشی’ معاشرتی تے سیاسی پہلو زیربحث لیا کے اجیہا جامع منظرنامہ پیش کیتا اے جو تاریخ تے تصوف دے طالب علم لئی گراں قدر حیثیت تے رہنمائی دا حامل اے۔
ایس کتاب دے مطالعے تں ایہ راز کھلیا کہ ایس قدیمی سرزمین دے متھے تے فخر و افتخار دے کئی بورڈ لگے نیں جہناں توں اکھ پھیرنا اہل علم نوں زیب نہیں دیندا۔ تاریخ پاکپتن دے پنج باب نیں جہناں وچ اسلام توں پہلاں ایتھوں دے حالات’ اہم تھاواں’ اسلامی دور دا آغاز’ عہد سلاطین وچ بابا فرید دی ولادت توں نویں شروعات’ سیاسی تے روحانی شخصیات دی پاکپتن حاضری’ منگولاں دے حملے’ مغلیہ تے فرنگی دور وچ پاکپتن دی حالت تے قیام پاکستان دے بعدوں ہن تک ہون والی ترقی تے تنزلی دی مکمل داستان موجود اے۔ پاکستان دے ایس قدیم ترین شہر تے تہذیب دے روشن تے مٹدے رنگ اجاگر کر کے فکر کرن والیاں دے دھیان نوں آواز ماری گئی اے۔ وکھو وکھ تہذیباں دے جنم لین’ اک دوجے وچ ضم ہون’ بنن سنورن تے مٹن دا احوال وی شامل اے۔ تحریر وچ ناول ورگا مزہ تے کہانی ورگا رنگ اے جو قاری دے اشتیاق نوں ودھاندا ہویا آخری صفحے تک لے جاندا اے۔ ایہدا حاصل اک سادہ جیہا پیغام اے کہ اجودھن نوں پاکپتن وچ ڈھلن لئی کسے روحانیت تے انسانیت دے علمبردار فرید دے مہربان لمس دی ضرورت ہوندی اے جہدے وجود وچ گنج شکر بھرے ہوندے نیں جو زمین تے ہوا وچ سرایت کرکے پوری فضا نوں خیر دی علامت بنا دیندا اے۔
اجہی کتاب اک اہل درد تے معرفت دی راہ دا پاندھی ای لکھ سکدا سی۔ اللہ بخش طارق کیوں جے آپ وی تصوف دے رنگ وچ رنگے ہوئے نیں ایس لئی اوہناں دے وجود نوں روحانیت دیاں جہڑیاں کرناں نے منور کر رکھیا اے اوہ اوہناں نوں رہنما کرکے وطن دی سربلندی دے امین پلیٹ فارم’ معماران پاکستان دے صوبائی کوآرڈی نیٹر دی حیثیت نال پاکستان دی مادری تے روحانی ترقی لئی کوشاں رہندے نیں۔ پاکستان دی سلامتی’ بقاء تے ترقی ہر لمحہ اوہناں دے دھیان وچ شامل رہندی اے۔ اوہ اپنی سطح تے دعا تے دوا دا پربندھ کردے رہندے نیں۔ ایہ تقریب کئی حوالیاں نال منفرد تے یادگار سی۔ ساہیوال آرٹس کونسل دے وڈے ہال وچ ایہدا پربندھ کیتا گیا سی۔ حاضرین وچ وکھووکھ شعبہ ہائے حیات دے معتبر بندے شامل سن۔ محفل تے اک عجیب جیہا تقدس دا رنگ غالب سی۔ تحریر و تقریر چوں پھٹدے روحانی سحر نے دن یاراں توں سہ پہر تن وجے تک لوکاں دی توجہ نوں حاضر رہن دا پابند کیتی رکھیا۔ پروفیسر ڈاکٹر محمد ضیالحق’ علامہ ضیا اللہ شاہ بخاری’ جاویدالحسن چشتی’ آفتاب احمد خان’ ڈاکٹر ریاض ہمدانی’ ملک شوکت فیروز’ پیراحمد شاہ کھگہ’ منیبہ خاور شہزاد تے راقم نے کتاب دے حوالے نال گل بات کیتی تے عقیدتاں نچھاور کیتیاں۔
خوشی تے اطمینان والی گل ایہہ سی کہ ہر بندے نے ملک نال گہری محبت دا اظہار کردے ہوئے مسئلیاں تے قابو پا کے ترقی ول ودھن دے نسخے وی دسے۔ اللہ بخش طارق تے سوہنے رب دیاں کئی مہربانیاں نیں۔ سب توں وڈا کرم صالح تے سعادت مند اولاد اے۔ ایس تقریب دے پربندھ لئی اوہناں دے بیٹے احمد شہزاد خاور نے جس اخلاص تے محبت دا اظہار کیتا اوہ مثالی سی۔ ساہیوال دی سنہری سرزمین تے کئی تاریخی تھاواں تے حاضری دی خواہش سی پر وقت دی رفتار نال اگے جانا ممکن نہیں سی ایس لئی ہڑپہ’ ملکہ ہانس تے نیلی بار دیاں دوجیاں تاریخی شادابیاں نوں چھیتی ملن دا عہد کرکے دامن وچ ہزاراں خوشیاں دے جگنو لے کے لہور لئی ٹُرے۔ موقع ملے تے ایہ کتاب ضرور پڑھیا جے۔٭٭