لوک کیہ چاہندے نیں

سعد اللہ شاہ

خواب دیکھن تے دکھان تے کوئی پابندی نہیں پر کیہ کریئے بھکھے نوں تے چن وی روٹی طرح لگدا اے تے امیر دے کول تے چن ویکھن دا وقت ای نہیں کہ اوہی خواجگاہ شام و سحر دا کجھ پتہ نہیں چلدا۔ اایہ تے وچارا مزدور اے جو بھٹھیاں وچ اگ بن کے سڑدا اے تے دھوں بن کے پریشان ہو جاندا اے۔ دوجے اوہ بیروزگار کہ کجھ کرن دے قابل وی نہیں تے اپنی صلاحیت نوں بروئے کار لیان دا موقع نہیں۔
گل سدھی تے صاف اے کہ عام بندے نوں سیاست دیاں بھول بھلیاں تے اقتدار دیاں غلام گردشاں نال کیہ لینا دینا کہ ایہ تے سب رجھ کھان دیاں مستیاں نیں۔وچارا غریب چلہا جلانا چاہندا اے اوہدے توں کوئی اُتے اٹھے تے بچیاں نوں تھوڑی بہت تعلیم دینا چاہوے گا اک ہور اہم پہلو صحت تے بیماری دا اے ایس توں ودھ دل خراش گل کیہ ہووے گی کہ ماں دی دوائی دے پیسے وی کسے کول نہ ہون۔ بچے ددھ لئی بلکدے ہون۔ ویکھیا جاوے تے اسحاق ڈار دا آندے ای پہلے ڈالر نوں کجھ تھلے لیانا تے ہن پٹرول وچ ساڑھے باراں روپیے دی کمی تے تقریباً اونا ای مٹی دے تیل وچ کمی سجری ہوا وانگوں ای اے ایہ گل وی ٹھیک کہ مہنگائی دے وڈے وڈے جمپ وی چھوٹے میاں صاحب نے لائے سن پر ڈار صاحب نے اپنے آن دا جواز دے دتا۔ انج میں تے ایس خدشے دا اظہار پہلاں ای کر دتا سی کہ نوازشریف دے آن تک ریلیف نوں ودھایا جاوے گا ایہ اک وکھری بحث اے کہ بقول پرویزالٰہی دے نواز نہیں آن گے تے اوہ یعنی پرویزالٰہی اوہو کرن گے جو عمران خان کہن گے۔ ایہدے وچ کیہ شک اے کہ خان صاحب نوں لوکاں نے پذیرائی بخشی جہدی وجہ نال اوہ انتخاب دا مطالبہ تواتر نال کر رہے نیں پر حکومت وقت لے رہی اے کہ کجھ پرفارم کر سکے تے لگدا اے کہ اوہ الٹی سدھی ہو کے جھ نہ کجھ تے کر وکھاوے گی۔ محسوس انج ہوندا اے کہ پچ تیار ہووے گی تے نوازشریف آن گے تے ایس حقیقت توں کوئی انکار نہیں کر سکدا کہ ووٹ اوہناں دے نال جڑیا اے بھٹو’ نوازشریف تے عمران خان تنے کرزمیٹک نیں۔ ویکھو حرف دی تقدیس دا تقاضا اے کہ تسیں جو سچ سمجھدے او اوہ لکھو ہن ویکھو کہ خان صاحب کہندے نیں جو سیاست وچ نیوٹرل اے اوہ جانور اے ایہ فقرہ اپنی تھاں خوبصورت اے:
مصحفی ہم تو یہ سمجھے تھے کہ ہو گا کوئی زخم
تیرے دل میں تو بڑا کام رفو کا نکلا
تہانوں یاد ہووے گا کہ جدوں اک سوال دے جواب وچ بقول عمران خان، شہبازشریف باہر پیسے منگن جاندے نیں شہبازصاحب نے کہیا تے کیہ خان صاحب باہر پیسے ونڈن جاندے سن میں اودو ںای کہیا سی کہ ایہ کمال دی سینس آف ہیومر ای نہیں بڑا تلخ وزڈم اے مینوں خوشی ہوئی کہ حسن نثار نے وی کہیا کہ ایہ سال دا بہترین جملہ اے میں سمجھنا واں کہ ستر سالہ تریخ دا مرکزی نکتہ اے خیر ایہ گل تے برسبیل تذکرہ آ گئی اک ہور گل یاد آئی کہ ساڈے دوست ندیم خان صاحب 75 روپیے دا نواں نوٹ وکھا رہے سن جہدے وچ سرسید تے علامہ اقبال دیاں فوٹواں وی نیں میں ایویں ای ہسدے ہوئے کہیا کہ کسے نوٹ تے غلطی نال جوبائیڈن دی فوٹو ای نہ چھپ جاوے ایہدے تے سارے قہقہہ بار ہو گئے کجھ گلاں پر ہاسے والیاں نہیں ہوندیاں ایویں ای اک بزرگ دوست انورشعور دا شعر یاد آ گیا:
اچھا خاصہ بیٹھے بیٹھے گم ہو جاتا ہوں
اب میں اکثر میں نہیں رہتا تم ہو جاتا ہوں
سجرا انکشاف ایہ ہویا اے کہ وزیراعظم ہائوس توں سائفر دی کاپی غایب ہو گئی اے۔ ہن اک نویں فلم چلے گی اپنا اپنا سکرپٹ ہووے گا۔ اسدعمر نے خوب اک فقرہ کہیا اے کہ شکر اے وزیراعظم ہائوس نوں ساڑ نہیں دتا۔ ایہدا وی لطف اٹھانا چاہیدا اے کہ ن لیگ دے دور وچ کئی تھاں اگ د ے راہیں متعلقہ ریکارڈ ساڑ دتا جاندا اے کوئی اک تھاں نہیں سگوں اگ لگن دی اک سیریز اے نہ رہے بانس نہ بجے بانسری۔ پچھلے دور وچ دو ای گلاں مشہور سن اک مٹی پائو تے دوجی اگ لا دیو۔ مریم اورنگزیب نے کہیا اے کہ اصل سائفر موجود اے یعنی سائفر اوہ غایب ہویا اے دیکھو کیہ سامنے آندا اے کہ تحقیقات دا حکم دے دتا گیا اے ایتھے غایب نوں حاضر کرنا ایناں سوکھا نہیں۔ وزیراعظم دی ویڈیوز بہرحال اک چنتاجوگ گل اے جہنوں خان صاحب سکیورٹی رسک کہہ رہے نیں کہ سمجھو ڈیٹا دشمن دے کول اپڑ گیا۔ فواد چوہدری دی گل وی سنو کہ باجوہ صاحب اوہناں نوں کئی واری دس چکے سن کہ وزیراعظم ہائوس ایس حوالے نال محفوظ نہیں کئی قسم دی ڈیوائسز آ گئیاں نیں سکیورٹی پروٹیکٹرز وی ہونے چاہیدے نیں۔ آخری گل ایہ کہ تجھے پٹرول سستا کیتا گیا اے بجلی دے حوالے نال زیادہ چنتا اے بجلی دا بل اک سپ دی صورت اے یاں جن دی صورت بجلی دے یونٹ اک پاسے ایہدے تے ٹیکس سراسر جگا ٹیکس اے جو اصلی بل توں ڈبل ہوندا اے آخر وچ آصف شفیع دا لازوال شعر:
اے مجھے میر کے اشعار سنانے والے
جاگ اٹھے ہیں کئی درد پرانے والے