پیرزادہ حامد شاہ بخاری

اللہ پاک نے انسان نوں دنیا تے اشرف المخلوقات بنا کے گھلیا اے یعنی کے ساری محلوقات وچوں سب توں افضل انسان اے تے انساناں وچوں کجھ انسان ایسے نیں جناں نوں اللہ پاک نے دوسرے انساناں نالوں زیادہ فضیلت والا بنایا ساڈے مسلماناں دے پیارے محبوب حضرت محمد صلی اللہ علیہ والہ وسلم نوں اللہ پاک نے ساری کائنات واسطے رحمت اللعالمین بنا کے گھلیا اوہناں دی شان مقام تے رتبہ ساری کائنات نالوں اعلی تے اُچا اے تے اوس توں بعد مسلماناں تے فرض اے او صحابہ اکرام اہل بیت صوفیا اکرام پیران اعظام تے ہر اوس انسان دی عزت تے احترام کرن جناں نے اپنی حیاتی حضور نبی اکرم صلی اللہ علیہ والہ وسلم دی شریعت دے مطابق گزاری اللہ پاک نے سادات دا مقام عام انساناں نالوں اچا رکھیا اے تے ساڈے تے سادات دا احترام فرض اے۔
اج میں جس شحصیت دا ذکر کرن جا ریا واں او نہ صرف سید نیں بلکہ ایک بہت وڈے صوفی گھرانے دے چشم و چراغ وی نیں اج میں اپنے والد محترم طاہر وزیرآبادی (مرحوم) دے بڑے ای پیارے شاعر بھرا تے پنجابی زبان نال بے حد پیار کرن والے پنجابی زبان دے مہان سیوک تے اعلی تعلیم یافتہ شخصیت جناب پیرزادہ سید حامد شاہ بخاری دا ذکرکرن جا رہیا واں۔
راولپنڈی دے رہائشی مشہور پنجابی شاعر پنجابی ماں بولی دے سیوک تے انگریزی زبان دے استاد پیرزادہ سید حامد شاہ بخاری دا اصل ناں سید حامد عزیز اے کیونکہ پیر سید عزیز بادشاہ آپ دے والد گرامی سن مگر آپ دا عام تعارفی ناں پیر زادہ سید حامد شاہ بخاری اے پیر زادہ صاحب دا تعلق میر پور آزاد کشمیر دے اک صوفی گھرانے کھنیارہ شریف نال اے جیہڑا منگلا ڈیم دے نیڑے موضع ہل بہگام دے متصل سی جتھے دیاں مشہور صوفی شحصیات حضرت میاں فیض بحش کھنیاروی رحمتہ اللہ تے دوجی مہان شخصیت مشہور پنجابی صوفی شاعر سلطان العارفین حضرت پیر سید محمد شاہ بخاری کھنیاروی رحمتہ اللہ گزرے نیں 1967وچ منگلا ڈیم دی تعمیر دے کارن سارہا پیر خانہ نزد مندرہ تحصیل گوجرخان ضلعی راولپنڈی منتقل ہو گیا تے آستانہ اجے وی مرجع خلائق اے۔
ایس حقیقت نوں وی بوہتے لوک جاندے نیں کہ پیرزادہ سید حامد شاہ بخاری صاحب دے گھرانے توں ہی میاں محمدبخش عارف کھڑی شریف دے والد محترم میاں شمس الدین رحمتہ اللہ علیہ نوں روحانی فیض ملیا سی جس دا ذکر تذکرہ مقیمی وچ موجود اے۔پیر زادہ سید حامد شاہ ہوراں دی جمن تھاں راولپنڈی اے آپ دی مڈھلی تعلیم گوجر خان دے ایک نگریزی میڈیم سکول وچ ہوئی تے پنجویں جماعت توں بعد آپ نوں راولپنڈی کمرشل مارکیٹ سیٹلائٹ ٹاون دے ایک انگریزی میڈیم سکول وچ پڑھن دا موقع ملیا تے ستویں جماعت توں بعد فیر گوجر خان آنا پے گیا تے فیر نویں دسویں جماعت ایم سی بوائز ہائی سکول وچ حاصل کیتی ایس توں بعد سرور شہید نشان حیدر کالج گوجر خان پڑھائی کیتی گریجویشن پنجاب یونیورسٹی توں کرن توں بعد ایم اے
انگریزی وی پنجاب یونیورسٹی توں کیتی تے پنجابی نال محبت دے کارن ایک ایم اے پنجابی وچ کرن دا ارادہ رکھدے نیں۔
آپ نے شاعری دے میدان وچ 2009 وچ قدم رکھیا تے اپنے جد امجد سلطان العارفین حضرت پیر سید محمد شاہ بخاری کھنیاروی رحمتہ اللہ دے فیض پاروں صرف پنجابی زبان دا انتحاب کیتا سب توں پیلاں اپنے جد امجد سید محمد شاہ بخاری سرکار دیاں سی حرفیاں توں چھپوایا جناں وچ
1 سوانح عمری پیر سید محمد شاہ بخاری
2 سسی پنوں سی حرفیاں تے مشتمل کتاب تے دو ہور چھوٹیاں کتاباں جیڑیاں سی حرفیاں تے ای مشتمل نیں دی پرنٹنگ کروائی
پیر زادہ صاحب دی آن والی کتاب
چن دے نال پریتاں اے جیڑی ایناں دی بے شمار ذاتی مصروفیات دی وجہ توں التوا دا شکار اے
پیر زادہ حامد شاہ بخاری سٹیج اتے دبنگ انداز وچ مشاعرہ پڑھن دی شہرت رکھدے نیں آپ دے کلام نوں جے پڑھیا جائے تے سو فیصد ایک ولی اللہ دے فیض دا اثر لگدا اے
میں دا بچھو مارن اوکھا لکھ چانواں نہ مردا
بھانویں ٹوٹے کر کر چھڈاں فیر اٹھ اٹھ ڈنگدا
کالے پیلے موذی من وچ آ کے ڈیرہ لاوندے
جو ڈنگیا او حامد شاہ جی گھٹ پانی نہ منگدا
ایک ہور شعر ویکھو
جت ول ویکھاں ات ول اوہو اوہدا ایڈ پسارہ اے
اس چندرے کلبوت دے اندر ساہ وی اوگن ہارا اے
دل دا پنچھی مول نہ ویکدا اے پاپی ونجارا اے
تھوڑا پند اے حامد شاہ جی جیون اک ہلارہ اے
حامد شاہ ہوراں دے بارے لکھن نوں بڑا کجھ اے جے لکھن بہ جائیے تے صحفے مک جان میں شاہ ہوراں دے متعلق آخر وچ ایہو کہنا چاہواں گا کہ حامد شاہ جی اک سوہنی صورت دے نال نال اک سوہنی تے چنگی سیرت دے وی مالک نیں او اہلیبیت نال پیار کرن والیاں نال چوکھا پیار کردے نیں تے منافق تے بے ایمان نال چوکھی نفرت رکھدے نیں جیڑی کہ اک مومن دے ایمان دا حصہ وی اے کہ منافق نال کدی وی ہمدردی نہ کرو کیونکہ منافق کدی وی انسانیت واسطے چنگا نہیں سوچ سکدا چونکہ ساڈے والد صاحب دا شاہ ہوراں نال چوکھا پیار سی تے اسیں وی اپنا فرض سمجھنے آں کہ اسیں وی شاہ ہوراں نال اوناں ای پیار کریے تے اسیں شاہ ہوراں کولوں راہنمائی لیندے رہواں گئے میں حامد شاہ ہوراں دا مشکور وی آں کہ شاہ ہوری میرے اک واری کہن تے والد صاحب دی برسی تے وزیرآباد تشریف لیائے۔
اللہ پاک شاہ ہوراں نوں صحت تندرستی والی لمبی حیاتی عطا فرمان تے اوہناں تے اپنا خاص کرم تے فضل فرمان آمین۔
تے آخر تے ابو جی دے شاہ ہوراں واسطے لکھے دو شعر
حامد شاہ بخاری مٹھڑا پیار اے سانجھا
قلم قبیلے دا من موہنا یار اے سانجھا
ماں بولی دا مان ودھائی جاوے حامد
ہر محفل وچ متراں دے وچکار اے سانجھا