وڈے لوک وڈیاں گلاں

کپتان دے قافلے توں اوہدے خیر خواہ گھٹدے جا رہے نیں۔ جتھے ماضی وچ جہانگیر ترین’ علیم خان’ عون چودھری’ فوزیہ قصوری’ عامر لیاقت مرحوم تے بہت سارے ایسے نام جو کسے تعارف دے محتاج نہیں۔ کپتان دے قافلے نوں خیرآباد کہہ گئے۔ کپتان نے مڑ کے اوہناں دی خدمات تے اوہناں دی وفاداری بارے ویکھنا وی پسند نہیں کیتا۔ ایسے بہت سارے نام جہڑے کپتان دی انقلابی فوج دے اولین دستے وچ ہون دے نال نال بے دریغ اپنی خون پسینے دی کمائی وی نچھاور کرن وچ پیش پیش سن اوہناں توں منہ موڑن مگروں اوہناں دا حال احوال وی نہیں پچھیا۔ بے اعتنائی ایس قدر کہ اپنے قریبی دوست دے جنازے وچ رلت تے دور دی گل اوہناں دے گھر افسوس کرن وی نہیں گئے۔ بہرحال وڈے لوک وڈیاں گلاں۔
ہن میں آنا واں کپتان تے صوبائی وزیر داخلہ دے درمیان ایسا کیہ ہویا کہ کرنل (ر) ہاشم ڈوگر پاکستان دے سب توں وڈے صوبے دی طاقتور ترین وزارت توں مستعفی ہو گئے۔ گلاں تے بہت ساریاں ہو رہیاں نیں مگر حقائق ایہہ نیں کہ 24مئی نوں تحریک انصاف وَلوں دِتی گئی لانگ مارچ دی کال نوں نکام بنان دی غرض نال لہور پلس نوں حکم ملد ااے کہ تحریک انصاف دے سارے متحرک افراد دی فہرستاں مرتب کرو تے اوہناں نوں فوری گرفتار کرو۔ ایسے طرح اک متحرک کارکن جہڑا فوج دے ریٹائرڈ میجر وی نیں’ دے گھر رات دو وجے پلس ریڈ کردی اے۔ میجر صاحب طیش وچ آ جاندے نیں تے فائرنگ کر دیندے نیںجہدے نتیجے وچ ریڈنگ پارٹی وچ شامل اک کانسٹیبل شہید ہو جاندا اے۔
عام روایات تے ایہہ نیں کہ ایسے کسے واقعے وچ پلس اپنے کسے ساتھی دا بدلہ موقع اتے ای چکتا کر دیندی اے مگر ایس واری پلس نے مکمل ہوش و حواس تے جذبات اتے قابو رکھدے ہویاں فیصلہ مختلف کیتا۔ پلس میجر صاحب تے اوہناں دے صاحبزادے نوں عزت و احترام نال تھانے لے آئی تے اوہناں اتے اک جعلی مقدمہ درج کیتا۔ جہدے وچ کانسٹیبل نوں فائرنگ کر کے شہید کرن دا قصوروار میجر صاحب دے بجائے اوہناں دے برخوردار نوں بنایا گیا تے لکھیا گیا کہ پلس رات دو وجے کرایہ داری ایکٹ بارے چھان بین کرن گئی سی تے ملزم نے فائرنگ کردتی۔ا یس مشکوک جئے پرچے وچ میجر صاحب دی تے فوری ضمانت ہو گئی مگر پتر اندر ای اے۔ ویسے تے جیویں دا مقدمہ درج کیتا گیا اے جے کیس ٹرائل ہویا تے پتر وی بری ہو ای جاوے گا۔
خیر’میجر صاحب معرکے مگروں باہر تشریف لیائے تے اوہناں دی ایس حرکت اتے خراج تحسین پیش کرن لئی صوبائی وزیر مراد راس جہڑے میجر صاحب دے قریبی تعلق والے نیں’ اپنے قریبی دوست صوبائی وزیر دی مدد نال کپتان دی عدالت وچ لے جایا گیا جتھے کپتان نے میجر صاحب دے ہتھ ای نہ چمے بلکہ اوہناں نوں انتہائی عزیت و احترام نال وی نوازیا۔ ایتھے وزیر داکلہ کرنل ہاشم ڈوگر دی بدقسمتی دا آغاز ہویا تے اوہناں نوں ایہہ ڈیوٹی سونپ دتی گئی کہ سی سی پی او لہور تے دُوجے پلس افسراں نوں ایس گل تے مجبور کرو کہ اوہ شہید کانسٹیبل دی بیوہ تے یتیم بچیاں نوں میجر صاحب نال صلح صفائی مگروں قتل دے مقدمے توں اوہناں نوں تے اوہناں دے صاحبزادے نوں باعزت بری کروا دین۔ اک تے کرنل صاحب ذہنی طور تے ایس ظلم و زیادتی تے تیار نہیں سن’ ویسے جے ہوندے وی تے پلس کیہڑا اوہناں دے کہن سنن وچ سی جو اوہ ایہہ کروا لیندے۔
اوہناں دی بطور وزیر داخلہ حیثیت ایہہ سی کہ اوہ اک دن وزیراعلیٰ دی کابینہ اجلاس وچ رلت لئی ایوان وزیراعلیٰ جان لئی جدوں کلپ چوک گیٹ تے پہنچے تے ڈیوٹی تے مامور تھانیدار بہادر نے اوہناں دے سکواڈ نوں اندر جان دی اجازت نہیں دتی۔ کرنل صاحب نے ایڑی چوٹی دا زورلایا مگر اوہ ایس گل دی اجازت نہیں لے سکے کہ اوہ اپنا سرکاری سکواڈ اندر لے کے جا سکن۔ اوہناں نوں کلب چوک گیٹ توں ای واپس لوٹنا پیا۔ ہن مراد راس چاہ رہے سن کہ فوری طور تے پلس میجر صاحب دے پتر نوں مقدمے توں بری کروان۔
ایسے اثنا وچ شہید کانسٹیبل دے لواحقین نے ملزمان کولوں قصاص دے دو کروڑ ڈیمانڈ کر لیتے۔ مراد راس تے میجر صاحب دے سپوٹرفری صلح چاہندے سن ۔ اوہناں ولوں 45لکھ روپے آفر کیتے گئے مگر اوہ نہیں منے’ جہدے تے اوہناں نے کرنل ہاشم نال گل کیتی کہ تسیں ایہہ ڈیل کروا دیو مگر اوہناں نے کانسٹیبل دے حق وچ بولیا تے آکھیا کہ دو کروڑ مناسب نیں۔ میجر صاحب دے خیر خواہاں نے کپتان نوں دسیا کہ کرنل صاحب خود پیسے کھانا چاہ رہے نیں تے اوہ پلس دی بولی بولدے نیں جہدے تے کپتان نے کرنل صاحب دی چنگی خبر لئی۔
دُوجے پاسے 25 مئی دے واقعے وچ ملوث پلس افسراں نوں نشان عبرت بنان دا ٹاسک وی کرنل صاحب پورا نہیں کر سکے کیوں جے اوہناں دی حیثیت اینی مستحکم نہیں سی تے پی ٹی آئی دے کجھ ارکان اسمبلی وی واقعے وچ ملوث پلس افسراں دی پشت تے سیسہ پلائی دیوار بن کے کھڑے سن۔ تیجا جرم کرنل صاحب داایہہ سی کہ خان صاحب لانگ مارچ دے حوالے نال 90 شاہراہ قائداعظم اتے عہدیداراں کولوں حلف لین آ رہے سن تے اوہناں دے خاص بندے کرنل ریٹائرڈ عاصم اپنے 8 مسلح ساتھیاں دے نال پہلے توں اوتھے پہنچ گئے۔ کرنل صاحب نے اوہناں نوں باہر کڈوایا جہدے تے کرنل عاصم تے کرنل ہاشم وچ ہارڈ ٹاک وی ہوئی۔ مختصر ایہہ کہنا چاہنا واں کہ کرنل ہاشم ڈسپلنڈ’ اخلاقیات تے خاندانی راویات توں لبریز شخصیت دے حامل انسان نیں۔ اوہ ویسے ای ایس قافلے وچ مِس فٹ سن۔ کرنل ہاشم دا قصور ایہہ سی کہ اوہ بے قصور سن۔
جے عمران خان موقعے دی نزاکت نوں بھانپدے ہوئے فیصلہ کرناچاہندے تے فواد چودھری نوں ایہہ قلمدان سونپ دیندے۔ فواد چودھری دی شخصیت دے حصار توں پی ٹی آئی نوں پنجاب وچ درپیش مسائل حل ہونا شروع ہو جاندے تے اوہ ایوان وزیراعلیٰ توں وی اپنا آپ منوان وچ کامیاب رہندے۔ اج کل میرے اک قریبی دوست صوبائی وزیر جہناں دا تعلق لہور توں اے’ کپتان دی گڈبک وچ شامل نیں۔ گڈبک وچ ہور رہن لئی اوہ اپنے پرانے دوستاں نال وی الجھن توں گریز نہیں کر رہے۔ میری اوہناں نوں درخواست اے کہ بھائی صاحب! ایہہ معاشرہ جہدا باسی کپتان وی اے’ بہت ظالم اے’ جدوں ایہہ منہ موڑن اتے آوے تے حال احوال وی نہیں پچھدا۔ تسیں ذرا ماضی وچ نظر پائو تے بہت ساری مثالاں تہاڈے سامنے آ جان گئِیاں۔