گل رولے لوکاں پائی اے

انج تے سارا سال ای بے بہا مشاعرے ہندے رہندے نیں جِتھے منتظمین اپنی اپنی پسند دے شاعر تے سجن بیلی کٹھے کرکے اپنا رانجھا راضی کردے رہندے نیں جہدے نال عام لوکائی نوں وی چنگا ادب سنن لئی لبھ جاندا اے پر جو چس صابر دے پِنڈ ہون والے ناٹک،مشاعرے تے موسیقی دی آندی او کِتے ہور گھٹ ای لبھدی اے۔ اک گل میں دَسدا جاواں اوس مشاعرے یاں پروگرام وچ کوئی مہمان یا مہمانِ خصوصی ٹائپ دے تکلفات نئیں ہندے ہاں مشاعرے دی صدارت واسطے اک شاعر دا انتخاب کیتا جاندا اے باقی اوتھے جان والا ہر شاعر مہمان نہیں بلکہ میزبان ہندا اے جہڑا اوتھے مہمان بن کے یاں اپنے ادبی قد کاٹھ دے لحاظ نال جاوے گا او رونق دا سواد لین دی بجائے سڑ پجھ کے واپس آجاوے گا ایس لئی صابر دے پِنڈ پانڈوکی دے جہدے اتے بابا بلھے شاہ ہوراں دے والدِ محترم سخی درویش ہوراں دا سایا اے اونہاں دے دن دی مناسبت نال ای صابر نے وی ایس دن نوں ہور رشنایا اے میں کافی دیر توں اوتھے جا رہیاں پر ایدکیں سب توں
بہتا سواد آیا اصغر بھٹی ہوراں دی سنگت عارف شاد دیاں گلاں تے بھائی محمد علی ہوراں دیاں تعریفاں وچ سفر دا پتا ای نہیں لگا جدوں صابر دے گھر پہنچے علی محسن دی جاندار جپھی نے تھوڑا بوہتا تھکیواں وی لاہ دِتا۔ مزمل بٹ تے اوہدے مِتراں نے بڑا سوہنا سواگت کیتا بیٹھک چ وحدت رمیض ہوری اپنے سنگیاں نال گپاں لا رئے سی مزمل بٹ نے بڑے چاواں نال لنگر کھوایا زاہد صدیقی ہوراں دے ہتھ دی چاہ بڑی سوادی سی لنگر چکدیاں ای کاشف جلال ہوراں دا جلالوی مکھڑا نظر آیا تے فیر اساں اک بڑا تگڑا کھڑاکا لایا فیر کٹھیاں چاہ پین دا سواد بڑا آیا چاہ پی کے باہر نکلدیاں ای وسیم جتالہ تے نظر پئی بڑا چاہ چڑھیا اگے نال ای کندھ نال کھری اقرا پریت نوں حال چال پچھیا اگے دھیان پیا تے وا وا ساریاں کڑیاں تے اک منڈا ایہ سارا گروپ طاہرہ سرا ہوراں دا سی سب نال سلام دعا تے بچیاں نوں پیار توں بعد اسیں پنڈال ول نوں ٹر پئے اوتھے چار چوفیرے خلقت ای خلقت کٹھی ویکھ کے ایس گل دا اندازا ہویا کہ لوک گل سننا چاہندے نیں ایسے لئی ہر سال ودھ توں ودھ رش ہو رہیا اے۔
مائک زاہد صدیقی ہوراں دے دست مبارک وچ سی او پروہنیاں نوں جی آیاں نوں آکھی جا رئے سی تے علی جوشا دبنگ انٹری پاکے جپھیاں کھڑکائی جا رئے سی پروگرام بابے بلھے دے شعراں توں صدیقی ہوراں شروع کیتا فیر موسیقی چ استاد سرور خاں ہوراں تے نال اوہناں دے اک میرے ورگا مسکین طبلہ نواز جہدے طبلے ول ویکھ کے میریاں اکھاں چوں اتھرو نکل آئے ایہ فنکار لوک محبتاں والے لوک ہندے نیں انہاں نوں ہر طریقے نال فسلیٹیٹ کرنا چاہیدا اے آرٹس کونسلاں نوں۔ پر آرٹس کونسلاں وی یونین کونسلاں بن دیاں جا رہیاں نیں خیر بہت سوہنا طبلہ وجایا خاں صاحب نے سانڈ نوں مولا لوے اونھے شروع دے رنگ چ بھنگ پایا فیر وسیم جتالہ دا مشورہ کم آیا پر فیر وی اینا سواد نہ آیا فیر میڈم طیبہ ہوراں وی کجھ سنایا زور وی بڑا لایا پر اک تے طبلے پڑا دوجا سانڈ وچاری غصے نال بھری ٹائم کافی ہو گیا سی میں کول بیٹھی طاہرہ سرا نوں آکھیا طیبہ توں بعد کوئی طیب تے نہیں رہ گیا۔
موسیقی دا پہلا سیشن مکن توں بعد ناٹک روٹی کھیڈیا گیا جہدے رائٹر تے ہدایتکار صابر علی صابر ہوری سن تے پیشکار ترنجن تھیٹر سی جہدی روح رواں طاہرہ سرا اے۔ ناٹک دے کھڈاریاں ناٹک وچ جان پاکے سب نوں روا دتا خاص طور تے مزمل بٹ نے کردار وچ کھب کے کم کیتا ایس توں بعد مشاعرہ زاہد صدیقی ہوراں شروع کیتا بعد وچ افضل ساحر نے سیٹ سانبھ لئی بلکہ سیٹ نوں گھٹ کے جپھا مار لئی۔ مرلی چوہان تے استاد نصیر ہوراں نال واہ واہ ہاسیاں کھیڈیاں ہوئیاں فیر یکدم بابا وارث گگوی،احمد اقبال بزمی تے اونہاں نال نوشی بٹ ہوری لہندے ولوں نمودار ہوئے مل کے بڑا چنگا لگا بابے گگوی تے بزمی نے مشاعرے دی رونق چ سوہنا وادھا کیتا علی جوشے دے جوش مشاعرے نوں جوشیلا بنایا ۔اشتیاق اثر دی درد بھری اواز نے دردیلا تے مستری مشتاق تے سلیم شہزاد ہوراں دے شعراں وی کمال کیت۔ا بھائی پھیرو توں ہی ملک ارشاد ہوراں دے شعراں نیں مشاعرے نوں چار چن لائے،بزمی جی دی گل بات بڑی سوادلی سی پر شعر اوس توں ودھ کے سوادلے سی قصور توں اسپیشل مشاعرے لئی نسدے ہوئے آئے علی حسن کھوکھر تے اونہاں دے بھانجے ہر شاعر نوں بھرپور انداز نال سن رئے سی تے دل کھول کے داد دے رئے سی ڈسکے توں آئے ایڈوکیٹ رحیل چیمہ ہوراں نے پنجاب تے پنجابی بارے بڑی سوہنی گل بات کیتی مشاعرہ چلدا رہیا تے افضل ساحر دیاں جگتاں چ وادھا ہندا رہیا انور فکر نے فکراں بھرے شعر کیہ پڑھے اقرا پریت نے کٹھا پنج سو پیش کر دتا۔ فیر اصغر بھٹی ہوراں دے شعراں تے بنداں نیں کمال کیتا وارث گگوی ہوراں ہر شعر دا بھرواں سواد لیا تے لوکاں وی رج کے داد دِتی ۔میں وی کوئی تِن چار نظماں سنا ای دِتیاں سی میرے توں بعد صابر تے صابر توں بعد میں چپ کرکے اصغر بھٹی ہوراں نوں اکھ مار کے نکلیا علی حسن کھوکھر ہوراں نال جپھی پائی کاشف جلال نوں کے بچدا بچاندا پنڈال چوں نکلن ای لگا سی کہ علی محسن نے ویکھ لیا فیر اوہدے نال ملاقات دا وعدہ کرکے واپس شکرگڑھ لئی نکل گیا۔راہ وچ زاہد صدیقی ہوراں دی کندھ تے تھوڑا تھوڑا لائیو پروگرام ویکھدے افسوس وی ہندا رہیا کہ مرلی چوہان،طاہرہ سرا،استاد نصیر احمد،بابا نجمی،صاحب صدر عابد حسین عابد تے وحدت رمیض نوں لاگے بہ سن سکدے پر اگلا دن شروع ہو چکیا سی جہدے بہت سارے تقاضے سی بچیاں دا سکول روٹی پانی دے چکراں چ پین لئی سارے ڈھگیاں اپنے اپنے کولھو تے پہنچ کے چکر وی لانے سی۔
صابر علی صابر،زاہد صدیقی ،انور فکر،مزمل بٹ، سلیم شہزاد تے اونہاں دے ہور سجن بیلی مِتر مبارکباد دے مستحق نیں جنہاں نیں بوہت تھوڑے وسائل دے باوجود اک بھرواں شاندار تے جاندار پروگرام کروا کے او گل جہڑی لوکاں نے رولے چ پائی سی اونہوں محفل دی زینت بنا کے ویہڑہ بلھے شاہ نوں سجایا تے سخی محمد درویش ہوراں دے میلے دی رونق نوں ودھایا۔