اک سوال

ارشاد بھٹی

سوال کل وی اک’ سوال اج وی اک’ پیسے کمائے کیویں’ پیسے لندن گھلے کیویں’ مطلب فلیٹس خریدے کیویں’ مطلب فلیٹس دی منی ٹریل دے دیو’ ست ورھے ہو گئے ہر کہانی سنا دتی گئی۔ اک سوال دا جواب دتا نہ دتا جا رہیا اے۔ حیران آں ایون فیلڈ فلیٹس موجود’ شریف خاندان اوہناں وچ رہ رہیا اے’ منی ٹریل وی نہ دتی’ عدالتاں مطمئن’ شریفاں دا رویہ’ چوری’ سینہ زوری’ سب کجھ کیتا’ سب کجھ توں مُکرے’ ہر جھوٹ بولیا’ ہر چتر چالاکی کیتی’ باعزت دے باعزت’ انج ایہ عجیب جھوٹ دی غضب کہانی’ مسلم لیگ دسدی رہی ہائوس آف شریفس نے ایون فیلڈ فلیٹس 1993ء توں 1995ء دوران خریدے بینکاں توں قرضہ لے کے’ ایہ وکھری گل مسلم لیگ دے کول بینکاں توں قرضہ لین دا کوئی کاغذی ثبوت نہیں حسن نواز بی بی سی دے پروگرام ہارڈ ٹاک وچ دسن’ میں تے ایہناں فلیٹاں وچ کرائے دار’ ایہناں فلیٹاں دا مالک کون’ مینوں نہیں پتہ۔ مینوں تے ایہ وی نہیں پتہ میرا کرایہ کون دے رہیا اے۔ ایہ وکھری گل اے حسن نواز دے کول ایون فیلڈ فلیٹس وچ بحیثیت کرائے دار رہن دا وی کوئی کاغذی ثبوت نہیں۔ اک دن مریم نواز بولیاں’ لندن جائیداداں دا کیہ قصہ لے کے بہہ گئے او’ بیرون ملک کیہ میری تے اندرون ملک وی کوئی جائیداد نہیں۔ ایہ وکھری گل کجھ عرصہ بعد مریم نواز نے اپنے انتخابی شوگواریاں وچ آپ لکھیا میری صرف اندرون ملک پونے ارب دیاں جائیداداں نیں۔
سلمان شہباز نے اک انٹرویو وچ کہیا کہڑیاں لندن جائیداداں۔ ساڈی لندن وچ کوئی جائیداد نہیں’ ایہ وکھری گل کجھ عرصہ بعد نہ صرف سلمان شہباز دے تایا نوازشریف نوں برطانوی اخبار ڈیلی میل نے لندن وچ 23 جائیداداں والا پینٹ ہائوس بحری قذاق دے دتا سگوں سلمان شہباز دے والد محترم شہبازشریف دی وی لندن وچ جائیداداں نکل آئیاں۔ پاناما لیکس ہون لگی تے حسین نواز بول پئے’ فرمایا ایون فیلڈ فلیٹس ساڈے’ میں ایہناں دا مالک 2005ء وچ سعودی عرب وچ اپنی فیکٹری ویچ کے ایہ فلیٹس خریدے’ ایہ وکھری گل سعودی عرب وچ فیکٹری ویچن توں لندن وچ فلیٹس خریدن تک حسین نواز دے کول وی کوئی بینک ریکارڈ نہ نکلیا۔ ایہو نہیں حسین نواز نے ایہ وی منیا کہ برٹس ورجن آئی لینڈ وچ میری دی آف شور کمپنیاں مطلب دو خفیہ کمپنیاں جہناں دے ناں نیلسن تے نیسکول’ ایہ کمپنیاں اک ٹرسٹ دے انڈر’ ایہ ٹرسٹ مریم نواز چلا رہیاں نیں۔
ہن کہانی کجھ ایس طرح’ مسلم لیگ کہوے ایون فیلڈ فلیٹس 1993ء توں 1995ء دوران بینک توں قرضہ لے کے خریدے گئے جد کہ حسین نواز کہن فلیٹس 2005ء وچ فیکٹری ویچ کے خریدے۔ حسن نواز’ مریم نواز’ سلمان شہباز کہن ساڈی تے لندن وچ کوئی جائیداد ای نہیں’ جد کہ نوازشریف’ حسین نواز منن کہ لندن فلیٹس ساڈے’ مزے دی گل کسے دے کول کوئی بینک ٹرانزیکشن ریکارڈ’ کوئی رسید نہ نکلے جو ایہ ثابت کرے کہ ہائوس آف شریفس ایون فیلڈ فلیٹس دے کرائے دار یاں ایون فیلڈ فلیٹس دے مالک’ اودوں تے سپریم کورٹ نے کہیا پیسہ لندن ہٹھاں تے گھلیا یاں فیصل آباد دے تاجراں وانگوں مال کچی رسیداں تے ویچیا’ خریدیا’ سپریم کورٹ’ احتساب عدالت’ جے آئی ٹی سب ثبوت منگ منگ کے تھک گئے پر کوئی ثبوت نہیں۔سپریم کورٹ نے تے تھک کے آخر وچ ایہ وی کہیا ایہ چھڈ دیو فلیٹس تسیں خریدے ہور کوئی ثبوت نہیں’ ایہ وی چھڈ دیو تسیں ایہناں فلیٹاں وچ بحیثیت کرائے دار ہور کوئی ثبوت نہیں’ ایہو ثبوت دے دیو کہ ایہ فلیٹس قطریاں دے فیر وی کوئی جواب نہ آیا۔ ایتھے ایہ وی یاد رہوے کہ ایسے ایون فیلڈ فلیٹس کیس وچ قومی اسمبلی وچ جناب سپیکر ایہ نیں اوہ ذرائع والی تقریر توں علاوہ نوازشریف نے الف لیلیٰ کہانیاں بھری تن ٹی وی تقریراں وی کیتیاں۔ سپریم کورٹ وچ جعل سازی وی ہوئی’ جھوٹھا قطری خط وی پیش کیتا گیا جھوٹی ٹرسٹ ڈیڈ’ جعلی کیلبری فونٹ ورگیاں کہانیاں وی گھڑیاں گئیاں تے ایسے ایون فیلڈ کیس دے اہم کردار حسن نواز’ حسین نواز جو ملزم وی گواہ وی’ عین موقعے تے اسیں پاکستانی نہیں غیرملکی آں کہہ کے پتلی گلی چوں انج نکلے کہ اجے تک واپس نہیں پرتے۔
ایسے کیس وچ جدوں کہیا جاوے کہ ثابت کرو کہ نوازشریف نے کرپشن کیتی تے پنج اپریل 2016ء نوں نوازشریف ای ایہدا ایس طرح جواب دین کرپٹ بندے اپنے ناں تے کمپنیاں بنان نہ اثاثے رکھن ایسے کیس وچ نوازشریف دے کئی روپ ویکھن نوں ملے صرف دو روپ ملاحظہ کرو۔ اک نوازشریف فرما رہے میرے تے کیہ میرے بچیاں تے وی الزام لگا تے میں گھر چلا جاواں گا۔ دوجا نوازشریف فرما رہے میرے اثاثے ذرائع آمدن توں ودھ نیں تے تہانوں کیہ’ نوازشریف کیہ ویژنری سیاستدان پنج چھ ورھے پہلاں کہیا میرے اثاثے ذرائع آمدن توں ودھ تے تہانوں کیہ تے اپنے نظام انصاف نوں پنج چھ ورھے لگے ایس نکتے تے اپڑدے اپڑدے کہ جے نوازشریف دے اثاثے ذرائع آمدن توں ودھ تے سانوں کیہ’ مینوں ایہدے نال کوئی غرض نہیں کہ ایون فیلڈ کیس وی حدیبیہ وانگوں بند ہون والا’ مینوں ایہدے نال وی کوئی غرض نہیں کہ مریم نواز دے بعد اک اک کرکے سارے شریف باعزت بری ہون والے’ مینوں ایہدے نال غرض کہ سوال کل وی اک’ سوال اج وی اک اے پیسے کیویں کمائے۔ ٭