اسلام آباد کیپٹل اے کنٹینراں دا شہر نہیں؟

اسلام آباد پاکستان دے دوجے شہراں توں وکھرا ایس لئی اے کہ ایہ وفاقی دارالحکومت اے۔ ایس شہر وچ دنیا بھر دے سفارتخانے نیں۔ ایتھے قومی اسمبلی تے سینٹ’ سپریم کورٹ تے سٹیٹ بینک دیاں عمارتاں نیں۔ ایتھے ایئرفورس’ نیوی دا ہیڈ کوارٹر اے۔ سپریم کورٹ’ ہائی کورٹ’ شریعت کورٹ’ ڈسٹرکٹ کورٹ’ نیب کورٹ تے نیب دے صدر دفتر نیں۔ پی ٹی وی’ ریڈیو پاکستان دیاں عمارتاں نیں۔ ایتھے یونیورسٹی’ کالجز نیں’ ایتھے فارم ہائوس’ وڈے گھر’ فائیوسٹار ہوٹل تے وڈیاں وڈیاں اچیاں عمارتاں نیں۔ غرض ایہ خوبیاں پاکستان دے دوجے شہراں نوں نصیب نہیں۔ ایس شہر نوں بنے 62 ورھے ہو چکے نیں۔ پر اج وی مرمت تے کھدائی جاری اے۔ سڑکاں دی توسیع دا کم اجے تک مکمل نہیں ہویا ایس شہر وچ چوہاں صوبیاں دی ہیوی ٹریفک اسلام آباد ایکسپریس توں گزردی اے۔ پتہ نہیں کدوں تک گزردی رہوے گی۔ ایہ ٹریفک ایتھے رہائشیاں لئی اذیت بن چکیا ے۔ پولیس بے بس دکھائی دیندی اے۔ جد کہ اوہناں دے کول موٹرسائیکل تے کار سواراں دیاں سہولتاں نیں جے ایہ صبح شام روڈ تے ڈیوٹی ہتھ بنھ کے نہ دین تے مسئلے جے سارے حل نہیں ہو سکدے تے گھٹ ضرور ہو سکدے نیں۔ پولیس ایکسپریس وے تے موٹربائیک والیاں نوں پہلیاں تن لائناں وچ آن توں اوہناں نوں روکن’ ایہ بلائیک چلاندے ای نہیں کرتب وی وکھاندے نیں ایہناں تے پابندی لانا بڑا ضروری اے۔ ایسے طرح ٹرک آئل ٹینکر نوں صرف اک لائن تے چلن تے مجبور کیتا جاوے۔
اسلام آباد ایکسپریس وے تے جے کوئی ٹرک یاں بس خراب ہو جاوے تے ہر پنج کلومیٹر تے وڈی کرین دی سہولت ہونی چاہیدی اے جو فوراً روڈ کلیئر کرے۔ اجے تک ایس ماڈرن شہر وچ ایہ سہولت نہیں۔ بھاویں کجھ سیاسی جماعتاں نے ایتھوں دیاں سڑکاں تے جلوس دھرنیاں دی وجہ نال شہر دا حسن گہنا دتا۔ گڈیاں والے روڈ ٹیکس دیندے نیں روڈ تے چلنا اوہناں دا حق اے پر حکومت گران لئی لانگ مارچ تے دھرنا دے ناں تے ایس لیڈر روڈز تے قبضہ کر لیندے نیں لوکاں دی زندگی اجیرن بنا دیندے نیں۔ حکومت وقت روڈز بلاک کرن لئی کنٹینرز لا کے بلاک کر دیندے نیں۔ اسلام آباد دی ہر سڑک تے کنٹینر مستقل بنیاداں تے پئے رہندے نیں۔ انج دنیا دے کسے شہر وچ نہیں ویکھیا ہووے گا۔ ریڈ زون تے گیٹ لا رکھیا اے جو اکثر بند رہندا اے اوہناں دے کول لگدا اے’ سوائے اوہناں کنٹینراں دے کوئی حل نہیں۔ کوئی قنون نہیں’ جو ایہناں کنٹینراں دی تھاں لے سکے۔
ساریاں سیاسی جماعتاں نوں آئین تے قنون ایس لئی پسند اے کہ جلسے جلوس کرن دا حق اوہناںنوں دیندا اے ایس لئی جتھے چاہن جلسے کردے نیں’ دھرنے دیندے نیں۔ ایہناں توں شہری پچھدے نیں کہ قنون تے آئین وچ کتھے لکھیا اے کہ جے تسیں اقتدار وچ نہیں اپوزیشن وچ او تے تہانوں ایہ حق کنہے دتا اے کہ تسیں روڈ بلاک کرو؟ دھرنے دیو؟ جد کہ قنون تے آئین حکومت دی تبدیلی دا اک ای راہ دسدا اے کہ تبدیلی ایوان دے اندروں لیاندی جا سکدی اے۔ ترقی یافتہ ملکاں وچ انسان تے انسان جانور وی ڈسپلن نال حیاتی گزاردے نیں۔ انج تے کتے لڑائی دی وجہ نال مشہور نیں اسیں اکثر کہنے آں تسیں کتیاں وانگوں کیوں لڑدے او’ جو کتے آپس وچ لڑدے نیں ایہ اوہ نیں جہناں دی تربیت نہیں ہوندی نہیں تے قالتو کتے لڑدے کدی نہیں ویکھے۔ مالک اوہناں کتیاں نوں سکھاندا اے کہ میں تہاڈا کھانا تہاڈے سامنے رکھاں گا تے اوس ویلے تک اوہنوں نہیں کھانا جدوں میں کھانے دا اشارا نہ کراں۔ فیر ہر کتا مالک دا اشارا ملدیاں ای اپنے سامنے رکھے گئے کھانے نوں ای کھاندا اے۔ اوہناں دا انج کرنا ایہ سب تربیت دا اثر اے جد کہ انسان گل گل تے لڑدے نیں۔ ایہدی وجہ ایہہ وے کہ ساڈے ایتھے انساناں وچ تربیت دی کمی اے۔ انسان دی تربیت گاہ ماں دی گود ہوندی سی سکول’ فیر کالج’ یونیورسٹیاں توں تربیت دے پھُل ملدے نیں۔ بدقسمتی نال ہن ماں دی گود تربیت گاہ نہیں رہی۔ تعلیمی اداریاں وچ مثالی استاد نہیں رہے۔ تعلیمی اداریاں وچ کمرشل ازم آ چکیا اے۔ انج ہون نال سیاست دا معیار گھٹیا اے ایہدی وجہ ایہہ وے کہ کسے زمانے وچ کالجاں’ یونیورسٹیاں وچ طلبا یونین دے الیکشن ہوندے سن۔ لیبر یونین دے الیکشن ہوندے سن۔ ہن ایہ الیکشن کالجاں یونیورسٹیاں وچ نہیں ہوندے تے نہ ای لیبر یونین دے الیکشن ہوندے نیں۔ایہناں الیکشناں تے لمے عرصے توں پابندی لگی ہوئی اے ایہ سب کجھ اک سوچے سمجھے منصوبے دے تحت نویں سیاستداناں دا راہ روکن دی سازش اے۔ ایس پابندی دی وجہ نال ہن اجہے لوک سیاست وچ آ رہے نیں جہناں دے کول پیسہ اے جہالت اے۔ سیاسی مائنڈ نہیں رکھدے اوہناں وچ سیاسی سوجھ بوجھ نہیں جہناں دی کوئی ویلیو نہیں’ جہناں وچ تربیت دی کمی اے۔ گزارش اے کہ اسلام آباد ورگے شہر نوں بے مثال تے خوبصورت بنان’ کنٹینر ہٹان۔ اسلام آباد خوبصورت تے قدرتی شہر اے آئو سارے رَل کے ایہنوں خوبصورت بنائیے۔٭