شبیر بٹ،شیرانوالہ باغ تے گوشہء ادب

انتظامی امور دی انجام دہی لئی حکومتاں ہر دور وچ شہر وچ افسر تعینات کردیاں رہندیاں نیں۔ اسیں سمجھنے آں کہ سارے انتظامی افسر باصلاحیت تے باشعور ہوندے نیں۔ عوام دی بہتری لئی اوہناں دے دِلاں وچ درد وی ہوندا اے۔ ایہناں افسراں وچوں اکثریت اک مخصوص انداز وچ اپنے فرائض ادا کردے نیں تے فیر کسے نویں شہر نویں پوسٹنگ نوں روانہ ہو جاندے نیں لیکن بہت تھوڑے افسر اجیہے ہوندے نیں جو انتظامی امور دی ادائیگی دے نال نال شہر وچ کجھ ایسے کم کرن دی کوشش کردے نیں کہ اوہ لوکاں وچ مقبول ہو جاندے نیں۔ ایسے ای اک افسر ساڈے محترم دوست ایڈیشنل ڈپٹی کمشنر شبیر بٹ صاحب نیں۔ تہاڈے نال پہلی ملاقات دا ذکر کرنا ضروری اے۔ ایہدے توں قارئین نوں بٹ صاحب دی ذوق وشوق تے ملنساری دا اندازہ بخوبی ہو جاوے گا۔ پچھلی گرمیاں اسیں شیخ دین محمد پبلک لائبریری وچ اک بیٹھک داپربندھ کیتا۔ دوستاں نے دسیا کہ اے سی ہیڈ کوارٹر شبیر بٹ صاحب نہ صرف اک ادب دوست انسان نیں بلکہ اعلیٰ پائے دی شاعری وی کردے نیں۔ ایس لئی اوہناں نوں تقریب وچ ضرور بلایا جاوے۔ فون کیتا تے جناب نے ساڈی دعوت نوں فوری قبول کر لیا۔ تقریب وچ وقت تے تشریف لیائے۔ ساڈی کوششاں نوں سراہیا تے شہر وچ ادبی تے ثقافتی تقریباں لئی ضلعی انتظامیہ ولوں ہر ممکن تعاون دا یقین دوایا۔اسیں سائبان دے پلیٹ فارم توں پچھلے کئی ورھیاں توں شہر وچ ادبی تے ثقافتی تقریباں شروع کیتے ہوئے نیں۔ پچھلے کئی سالاں توں شہر دے ادیباں تے شاعراں تے دانشوراں دے نال بیٹھک دا سلسلہ شروع اے۔ ساڈی شدید خواہش سی کہ ہفتہ وار یا گھٹ توں گھٹ مہینے وچ اک ادبی تے ثقافتی بیٹھک شیرانوالہ باغ دی بارہ دری وچ رکھی جاوے جہدے وچ ہر صاحب علم بآسانی رلت کر سکے۔ اسیں انتظامیہ نال گل بات وی کیتی لیکن سکیورٹی یا دوجی کجھ وجوہات دی بنا تے ایس بارہ دری وچ مشاعرے’ موسیقی’ داستان گوئی تے صوفیانہ کلام دی محفل بسان دی اجازت نہیں دتی گئی۔ فیر شبیر بٹ صاحب خزاں وچ بہار دے خوشگوار جھونکے وانگوں محسوس ہوئے۔ ایہہ حقیقت اے کہ شبیر بٹ صاحب نے ساڈے نال کھڑے ہو کے ساڈے بہت سارے معاملات آسان بنانے شروع کر دتے۔ جیویں کہ جناب شبیر بٹ صاحب نال سلام و دعا ہوئی تے اوہدے اگلے چند ہفتیاں مگروں اسیں بارہ دری مہاراجہ رنجیت سنگھ وچ اک قوالی تقریب دا اہتمام کرن وچ کامیاب ہو گئے۔ کھلے اسمان تھلے گوجرانوالہ دے شہریاں نے اک مدت مگروں ایسا سماں ویکھیا سی۔ رات دیر تک شیرانوالہ باغ مہکدا رہیا۔ لوک خوش گپیاں لاندے رہے۔ قوال حمدوثنا دے ترانے بلند کردے رہے تے کجھ مست طبیعت لوک وجد جئی کیفیت دا شکار ہوندے نظر آے۔ ایہدے مگروں ملاقاتاں دا اک سلسلہ ٹر پیا۔ ایہناں ملاقاتاں دا مقصد شہر وچ ادب و ثقافت دے احیا لئی رل کے کوششاں کرنا ای رہندااے۔ فیر پچھلے سال جدوں پنجاب حکومت نے 14 مارچ پنجاب کلچر ڈے منان دا اعلان کیتا تے بٹ صاحب دی فون کال آئی۔ راجہ صاحب! فوراً دفتر تشریف لے آئو۔ فیر چہرے اتے مسکراہٹ سجائے دسیا کہ ضلعی انتظامیہ چاہندی اے کہ شیرانوالہ باغ وچ اک ایسا مشاعرہ ترتیب دتا جاوے جہدے وچ مقامی دے نال نال ملکی سطح اتے نام بنان والے شاعراں نوں وی مدعو کیتا جاوے۔ بٹ صاحب دی محبت تے مشاورت نال اوس رات اک ایسی تقریب منعقد ہوئی جہدے وچ پنجابی زبان وثقافت لئی کم کرن والے وڈے نام تے نامور شاعر سٹیج دی زینت سن۔ جدوں شاعر نوں کلام پڑھن ڈائس اتے بلایا جاندا تے ڈھول وجن لگدا تے کجھ منچلے بھنگڑا پان لگدے۔ پنڈال وچ زنانیاں تے مرداں دی اک کثیر تعداد بیٹھی رات گئے تک شاعری دا لطف لیندی رہی۔ لوکاں دے جوش و جذبے نوں ویکھدے ہوئے کجھ دن پہلاں اک ملاقات وچ شبیر بٹ صاحب نے دسیا کہ کمشنر صاحب بہادر دی خواہش اے کہ شیرانوالہ باغ وچ اک گوشہ ادب تعمیر کیتا جاوے جتھے بنا روک ٹوک شہری آن۔ اپنی مرضی دی کتاباں دا مطالعہ کرن۔ گل بات دے سلسلے شروع ہون۔ گپ شپ ہووے’ ادبی تے سیاسی مسائل اتے بحث و مباحثہ ہووے تے ادیباں’ شاعراں تے دانشوراں دی باہمی ملاقاتاں ہون۔ ادیب تے شاعر ہفتہ وار ادبی محفلاں وچ جمع ہون ۔ کسے نویں کتاب اتے گل بات کیتی جاوے۔ مقالے تے غزلاں پڑھی جان تے اوہناں اتے تنقیدی نشستاں دا پربندھ کیتا جاوے۔ شیخ دین محمد بارے تفصیل نال تحریر لکھ چکیا واں۔ مختصر ایہہ کہ او قائداعظم محمد علی جناح دے قریبی تے قابل اعتماد ساتھیاں وچوں سن۔ تحریک پاکستان وچ اوہناں دی کوششاں قابل تعریف نیں لیکن میں پہلاں وی کئی واری عرض کیتا اے کہ اسیں غریب قوم آں کہ اپنے محسناں دی یادگاراں وی اپنے پلے توں نہیں بنا سکدے ۔ ایہو وجہ اے کہ جسٹس دین محمد نوں خراج عقیدت پیش کرن لئی اوہناں دے نام تے لائبریری دی نویں عمارت کدھرے ہور بنان دے بجائے اوہنوں شیرانوالہ باغ وچ ای تعمیر کردتا گیا۔ کدی شہریاں دی اک کثیر تعداد ایہدے توں استفادہ کردی سی۔ فیر حکمراناں دی عدم توجہی دے کارن لائبریری دی عمارت بھوت بنگلے دا نمونہ پیش کرن لگی۔ نتیجہ ایہہ ہویا کہ علم دے متلاشیاں نے ایدھر دا رخ کرنا چھڈ دتا۔ ہن جے انتظامیہ بارہ دری دے کسی ملٹی نیشنل کمپنی دے تعاون نال اک ٹی ہائوس بنا دیوے۔ باغ دی صفائی ستھرائی اتے خاص دھیان دتا جاوے ۔ چانن دا بہتر پربندھ کیتا جاوے تے شہر دی ادبی تنظیماں نوں ہفتہ وار محفلاں سجھان دی اجازت دتی جاوے تے شہر وچ اک واری فیر توں ادبی بیٹھکاں دا دور لوٹ سکدا اے۔