گول گتارے

میمونہ بتول

پہلے گول گتارے سن . ہر شئے ہک گول گتارے اندر سی. ہسدے وسدے گول گتارے سن.. ہک دوجے دے اندر . جیویں کسے میلے توں لیاندیا ں ہوئیاں ساویاں ونگاں . اوہ ٹڈیاں سی تے اونہاں دا کو کلا بن جاندا سی .. دونہاں پاسوں بند ولا . سب توں وڈا گول گتارا اللہ دا سی ۔سورج دا گولگتارا . فیر زمین تیدن رات دا گول گتارا .. سب توں پہلاں سورج اپنے گل و چ چکر ا ں دا جنجیر پیندا سی ۔ سارے گولگتاریاں دے جنجیر ایندے گل وچ سن . ایہ سورج کسے دیو ہیکل جثے آلے بندے طراں گلو ننگا اکھاڑے دے وچلے سن کھلو کے آپ دا سرکھبے موڈھے تے رکھ کہ زور نال سجے موڈھے ول گھماندا سی ۔ تے جنجیراں دے کڑکار نال پوری کائنات جاگ جاندی سی … تے ایہہ فیر ہو لی ہو لی کسے مستے ہوئے دربار دے ملنگ وانگوں سارے گولگتاریاں دیاں جنجیریاں ڈھول دے پٹے وانگوں منہ اچ پاکے گھومدا د ا سی . ایہ سا ئیں دا پہلا ملنگ سی .. ایندی گھومر عشق دا پہلا حال سی . گھومر دے دوران جدوں ایند ا پب زمین تے آندا سی تے رات بن جاندی سی جدوں اڈی چکدا سی تے دن ہو جاندا سی .. زمین تے ہر شئے نوں ایندے نال ای حال پے جاندا سی … پر بہت مٹھا مٹھا . ہر شے ایندے طراح اپنے گولگتارے اندرے ( anti clockwise) کھیے توں سجے ول گھومنا شروع کردیندی سی . ایدروں سورج اپنے گل گول گتاریاں دیاں جنجیر اں پیندا سی .. ادر زمین تے بھاگاں بھریاں مدہانی دے گل رسایاں پیندیاں سی . ادر. زمین تے سورج نتر کے آندا سی تے اودر بھاگ بھری دی کنی وچ مکھن دا پیٹرا ترن لگ پیندا سی … اس طراں سارے گول گتارے ہک دوجے دے اندر سن .. سب توں وڈا رونی آلی بھوئیں و چ دانداں نال واہے ہوئے ہلاں دا گول گتارا .فیر ویلنے تے گادھی دا گول گتارا .ا وس توں نکا کھوں دے لوٹایاں دا گول گتارا .اوس توں نکا چرخے دا گول گتارا . فیر سا نک دا .فیر چاچے دی روٹی دا .. فیر مونگر دا . فیر میری نکی گلو داگو ل گتارا . فیر سب توں نکا کا واں دی چوری دے ٹکر دا گول گتارا .. تے انہاں ساریاں گولگتاریاں دے وچ رسیاں پاکہ سورج نے اپنے چک و چ پایا ہویا سی . سب دا مکھ سورج ول سی تے سو ر ج د ی با نھہ رب دے ہتھی ..ایس گولگتاریاں دے نظام دا ایس دے اندر وسن آلیاں دے ذہن تے ایہہ اثر ہو یا کہ بندے دی سوچ ، اوندی بھج نس ، تے تخلیق گو لگتاریاں یا دائرہ کار دے سانچے تے ڈھلنی شروع ہوگئی تے پور ا وسیب رل مل کے دائرہ کار دے اندر آگیا .مثال دے طور تے زمینداردی بھج نس موسما ں تے رتاں دے اندر آگئی . اوندا ہر فیصلہ تے ہر خواہش ر تاں دے گولگتارے نال جڑ گئی … اوندا ہر کم دائرہ کار دے اندر آگیا . اوندے ہل، اوند ی فصلاں دی گول ڈھیری . اوندی حقے دے چوفیر یاراں دی گول بیٹھک . وغیرہ . زمیندار دے نال اوندے کمی دی سوچ تے تخلیق دائرے کار دے اندر ہائی تائیں پر بہا نڈا تے ہتھیار گول بنیا .مثال دے طور تے کبھار دی سوچ دائرہ کار اندر ہون دی وجہ توں گھڑا ، دورا ، چا ٹی، چکی ، کنی، پرات ، منگر ، وغیرہ سب گول بنے . ایسے طراں لو ہار دا ہر ہتھیار بھاویں اوہ گول نہیں ہا پر بنیا گول پہیہ دی حرکت تے . یعنی و جہ تخلیق دائرہ کارتوں باہر نہ گئی . مزید ترکھان دے تمام ا آلات ڈوئی مدھانی، کھوکنا، مدہنا ، سب گول ہائن ۔ پرائیں دے گرد بھاویں سارے نچدے ہائن پر جھومر، چینا تے سمی وچ سارے دائرہ کار اندر رہندے ہائن . میراثی ہک لاڈا کمی ہا او س بھاویں کوئی شے ایجاد نہ کیتی پر اوندے رو سے تے چھا گھ دے ڈر نے زمیندار تے ہر وڈ وڈیرے توں لے کہ کمی تک ہراک نوں آپ دی اکڑ دیکھبڑ وچ بنھ کہ بڑیاں بھاں بلیاں دتا یاں . ہور کی دساں . بالاں دے ہاسے تے کھیڈاں دی گولگتاریاں اندر ہائن . لا ٹو ، پھلی ، گلی ڈنڈے دی گلی ، بھاں بلیاں ، بھج و ے ککڑ بلی آیائی . پگ پگائی ، ککلی ، آج جمعرات آئی ہے کہ کوئی نہ ، بندر کلا . کھڑ باجیاں . بیٹیاں ، گھوم گھوم چاٹی ایہ سب کھیڈاں گولگتاریاں اچ ہائن . ہو ر .چھوریں گول فریم اندر کڑھائی کردیاں ہائن تے گوں چرخہ گھما ندیاں ہائن تے ہر سوانٹری داہر کم دائریوچ ہوندا ہا مثلا چکی دی حرکت ، روٹی ، بھاجی پکاون لگیاں ڈوی دی حرکت مکھن دا پیڑا ، پنیاں ، سوا نڑی داچلن ، چولہے دا گول گھر ، سب ہک گول گتارا ہا . وسیب دے اندر گول گتاریاں داوسیب ہا . ایس دائرہ کاری سوچ داثر ایہ ہاکہ بندہ آپدا دائرہ وڈا کر سکد اپر کتھوں وی اونوں فرار دی راہ کوئی نائی . حتی کہ فرار ہون آلے نوں ہکل دا ڈر کھا جاند ہا . انہاں گولگتاریاں دی قدرت دے اصولاں دی موافقت دی وجہ توں پرشے وچ برکت ہائی . کیونکہ سب آلات دی حرکت دا اصول ایہ ہا کہ ہرشے اللہ ا لے ویکھ کے گھمدی ہائی .. فورس دا رکھ اللہ الے ہا . مڑ ہک دن ایسا آیا زمین دار بھوئیں وچ گول دی بجائے لمے ہل چاواہے تے . سوکھیا ئی تے حرص نے رزق اچوں برکت نکلن نوں چاروں پاسیوں بنے چا دتے . رتی ٹرالی تیٹریکٹر واہی نوں وڑیا تے کمی تے زمیندار دا گول گتاریا ترٹ گیا۔ کمی دائرہ کار تو باہر آیا تے اوند ی تخلیق وی فرار دے نظریے تے مبنی ہوگئی . فیر بالاں نے دائرہ کار اندر رہ کہ کھیڈنا چھڈ دتا چھوری دیاں آکھیں فریم توں باہر ویکھن لگ پئیاں . ز میندارنی دے چرخے بل گئے تے چلناں آتے دیو ن نوں ہن کھارے لبدے نیں .کتے چلن چٹی جاندے ہن . تے سورج دے گل اپنے وسیب دی جنیجیری دا گول گتارہ ترٹ کے کھلر گیا اے وسیب دیاں جنجیریاں ہک دوے آتے پئیاں وجدیاں ہین ۔ تے ہک دن اناں دا کڑکا ر کائنات دے باقی گوں گتاریاں جنجیریاں نوں تروڑ کہ سورج دے گلوں کڈھ دسین