صدربائیڈن دی پاکستان بارے ہرزہ سرائی

تازہ ترین اک بیان وچ امریکہ بہادر سرکار نے پاکستان نوں دنیا دی خطرناک ریاست قرار دتا اے۔ ایہہ اوہو مظلوم ریاست اے جہدے اتے امریکہ نے تقریباً چار سو اسی ڈرون حملے تے اپنی اَت گردی دی جنگ وچ ہیل میزائل تک فائر کیتے تاں جے ساڈے قبائلی بھراواں دی لاشاں مسخ ہو جان تے مرن مگروں اوہناں دے مسخ شدہ لاشاں دنیا نوں نظر نہ آن تاں جے میڈیا دی نظر وچ ایس غیر انسانی سلوک نوں دنیا کدھرے اپنی اکھاں نال ویکھ نہ سکے تے ایس بنیادی حقوق دے علمبردار نوں کدھرے خفت دا سامنا نہ کرنا پووے۔ ویسے ایسے امریکی ریاست دے بربریت دے مناظر دوجی اسلامی ریاست عراق دے شہر فلوجہ وچ کئی مہینے معصوم شہریاں نوں محصور تے محبوس رکھ کے اوہناں اتے غیر انسانی پرتشدد طریقہ استعمال کر کے اوہناں نوں شہید کیتا گیا تے ساری دنیا اوہدے اتے خموشی دا مظاہرہ کردی رہی۔ شام جیا ملک تار تار کر چکیا۔ سارے کھنڈر بنا چکیا۔ فیر وی امریکہ اپنے تئیں سب توں وڈی جمہوریت دا راگ الاپدا رہیا۔ ایران دنیا دا واحد اسلامی جمہوری ملک ہون دے باوجود امریکی اقتصادی پابندیاں دا 20سالاں توں ٹارگٹ بنیا ہویا اے۔ ایہہ سارے کارنامے صدر اوباما دے دور وچ عروج تے رہے۔ شاید ایس صدر نوں ایہناں ہولناک کارنامیاں دے عوض صدارت دتی گئی سی کہ ہزاراں سال مگروں مصر وچ جمہوریت تے مرسی نوں ہمیشہ لئی ختم کردتا جاوے۔ ایسے امریکہ دے صدر ٹرمپ نے افغانستان وچ سب توں وڈا بم مارن دا تجربہ وی کر دتا تے فیر امریکی سرکار اپنے ایس قبیح عمل اتے اتراندی وی رہی۔ گروزنی وچ روس نے زیرزمین ٹنلز تک وچ وڑ کے ٹینک چلائے تے امریکہ بہادر چپ چاپ ویکھدا رہیا۔ مسلماناں نوں کیڑے مکوڑیاں وانگوں مسل دتا گیا جد کہ امریکہ اسرائیل دی پشت پناہی وچ فلسطینیاں نوں روزانہ دی بنیاد اتے نسل کشی کر رہیا اے۔
ایہو نہیں بلکہ ہر ریاست دے اندر اوہدے سی آئی اے دے ہرکارے’ کدی کنٹرکٹرز’ کدی سیاسی روپ وچ اوہناں ملکاں وچ تخریب کاری کرواندے رہے۔ کدی سوئیکارنو دا تختہ الٹایا’ کدی سوہار توں نوں اقتدار وچ لیائے’ کدی انور سادات نوں اقتدار وچ لیان وچ کامیاب ہوئے۔ کدی انڈیا دے نال رل کے بنگلہ دیش بنان وچ کارفرمار ہے’ مگروں اپنے ایجنٹ شاہ ایران اتے مسلط کرن وچ کامیاب تے مصدیق نوں انقلاب دے ذریعے اتارن وچ کامیاب ہوئے۔ کدی اسلام دے نام تے بھٹو دی حکومت سٹ کے اوہنوں ایٹم بم بنان دی سزا وچ پھانسی تک دوائی۔ جنرل ضیا بینظیر’ لیاقت علی خان تریک راہواں وچ مار دتے گئے تے کدی امن دے نام تے جاپان اتے ایٹمی حملے کر کے لکھاں انساناں نوں زندہ درگور کردتا گیا تے اج ایہہ ساڈے جئے سیلاب وچ گھرے ملک اتے ایف اے ٹی ایف دی پابندی لا کے وی اوہناں نوں چین نہیں آ رہیا۔ ایہہ امن دا عالمی ٹھیکیدار کہڑی زبان نال سانوں دنیا دا خطرناک ترین ملک قرار دے رہیا اے تے کیہڑا کم انجام دین نوں بے قرار نظر آ رہیا اے۔ ایہنوں انڈیا’ اسرائیل دی چیرہ دستیاں کدی ایس طرحاں نظر نہیں آئیاں’ یورپ دے نوآبادیاتی’ دوجے ملکاں دے وسائل اتے قابو’ علاقیاں اتے قبضہ کدی نظر نہیں آندا۔
کدی اوپیک نوں دھمکی’ کدی روس نوں صرف یورپ تک محدود کرن دی دنیا دے چیس بورڈ اتے سازشاں تے یوکرائن نوں سٹپنی دے طور تے روس دی طاقت نوں زائل کرن دی سازش’ ایہہ سارے حربے اپنی قوت نوں ودھان دُوجیاں خصوصی طور تے کمزور مسلم ریاستاں نوں نیست و نابود کرن تے اپنے رستے وچ حائل رکاوٹاں نوں حرف غلط وانگوں مٹان وچ کوئی جھجک نہ محسوس کرن والے امریکہ حیران کن انداز وچ اک چھوٹے غریب ملک پاکستان دے پچھے ہتھ دھو کے ستر سالاں توں پیا ہویا اے۔ ایہہ واحد مسلم ملک جہڑا اک محدود ایٹمی طاقت حاصل کر گیا اے تے اوہنوں خطرناک قرار دے کے اوہدے حصے بخرے کرن دی ریشہ دوانایاں جاری رکھی ہوئے اے۔ ساڈے جئے تیجی دنیا دے ملکاں نوں سزا دے کے’ دنیا نوں ڈران تے خوفزدہ کرن دی پرانی روش نوں فیر توں جاری وساری رکھے ہوئے اے۔