اقتدار لئی نفرت دا رستہ ای کیوں؟

ساڈے سیاسی لیڈراں نے اپنے اقتدار لئی عوام وچ ایس قدر نفرت دی فصل بو دتی اے

عتیق انور راجہ

آئو! امن دے بوٹے لائو ظلم دا کاروبار نہ کرو ساڈے سیاسی لیڈراں نے اپنے اقتدار لئی عوام وچ ایس قدر نفرت دی فصل بو دتی اے کہ ہن عوام وضع طور تے مختلف سوچ و فکر اپنائے ہوئے اے۔ عوام اپنے لیڈراں دی ہر بونگی دا دفاع کرن لگدی اے تے مخالف رہنما دی ہر گل دا مذاق بنان لگدی اے۔ مثبت ذہن پیدا کرن لئی منظم کم کرن دی لوڑ اے۔ ساڈی روایتاں تے اقدار دا تسلسل ٹٹ رہیا اے۔ ساڈا نظام تعلیم طلبا نوں نوکر بنن لئی تیار کر رہیا اے۔ ساڈی درسی کتاباں وچ دھرتی دے ہیروواں بارے نہیں پڑھایا جا رہیا اے۔ دھرتی دی زباناں نوں دبان دی کوشش کیتی جا رہی اے۔
انج کرن والے ایہہ نہیں سمجھدے کہ کسی وی زبان وچ ایس علاقے دی صدیاں دا لوک ورثہ ہوندا اے جہڑا اوتھے رہن والے لوکاں دی پہچان دا کارن بندا اے۔ نوجوان اگرچہ بہت پرامید نیں لیکن اوہ ایہہ سمجھی بیٹھے نیں کہ جے اوہناں دی جماعت دا لیڈر حکومت وچ آوے گا فیر ای ملک ترقی دی راہ اتے چلنا شروع ہو سکدا اے۔ وڈی عمر دے لوک بوہتے مایوس ہو چکے نیں۔ اوہناں دے خیال وچ عدلیہ‘ اسٹیبلشمنٹ تے بیوروکریسی نے نظام نوں جکڑیا ہویا اے۔ سیاست دان کجھ وی کر لین جدوں تک ریاستی ادارے تے محکمے اپنی حدود وچ نہیں رہندے اوہدوں تک کجھ بہتر نہیں ہو سکدا اے۔ سیاسی میدان وانگوں ادبی و ثقافتی میدان وچ اجارہ داری چل رہی اے۔ مشاعرہ اسلام آباد ہووے‘ کراچی ہووے‘لہور ہووے یا گلگت تہانوں سٹیج تے اوہوکجھ پرانے لوک بیٹھے نظر آن گے۔ ٹی وی والے تجزیاں لئی نویں لوکاں نوں موقع نہیں دیندے۔ اوہ انج دے سیاسی رہنماواں نوں مدعو کردے نیں جہناں دے کول معلومات بڑی گھٹ ہوندیاں نیں۔ اوہناں نوں گل کرنا وی نہیں آندا لیکن اوہناں نوں ٹی وی اتے بیٹھن دا شوق ہوندا اے۔ اسیں ایہہ نہیں کہہ سکدے کہ مسائل دا حل ممکن ای نہیں اے۔ ہاں سانوں ایہہ کہنا چاہیدا اے کہ مسائل بہت زیادہ نیں ایس لئی اوہناں دے جامع حل لئی بھرواں غوروخوض دے نال منصوبہ بندی نال کم کرن دی لوڑ اے۔ پاکستان دے سیاسی تے معاشی حالات جہڑے نہج تک آ پہنچے نیں اوہدے تے بظاہر ہر پاکستانی دکھی اے لیکن ایس صورتحال وچ سب توں ودھ فیدہ اوہ طبقہ چک رہیا اے جو حکومت وچ ہووے یا اپوزیشن وچ اوہناں دا کم عوامی دولت لٹنا‘ اپنے اثاثے ودھانا تے ملکی دولت بیرون ملک منتقل کرنا ای ہوندا اے۔ بدقسمتی نال ایہہ لوک اوس ویلے وی جی بھر کے ملکی دولت لٹ رہے نیں۔
بظاہر ایہہ عوام دے خادم ‘ رہنما تے مددگار بندے نظر آندے نیں لیکن پردے پچھے تے کدھرے تے کھلے عام اپنے رشتہ داراں‘ یاراںتے ملازماں دے ذریعے مال بٹور رہے نیں۔ پاکستان دا دوجا وڈا مسئلہ ایس ویلے عصبیت دا بندا نظر آ رہیا اے۔ ماضی وچ اسیں ایس ناسور دی بہت وڈی سزا بھگت چکے آں لیکن ساڈے حکمران‘ سیاستدان تے اعلیٰ عہدیاں اتے بیٹھے لوک ایس بیماری دا علاج کرن دی بالکل وی کوشش نہیں کر رہے۔ شیخ رشید جیا سیاستدان جہدی ساری حیاتی خود نوں گیٹ نمبر چار دا بندہ کہلواندے لنگ گئی اے اوہ برملا کہہ رہیا اے کہ اوہنوں پٹھاناں اتے بھروسہ اے۔ پنجابی اوہدی نظر وچ بے اعتبارے نیں تے ستم ظریفی ویکھو کہ کسی پنجابی رہنما ولوں ایس فقرے اتے کوئی جواب نہیں دتا گیا اے۔ شیخ صاحب جئے لوک عصبیت دی اگ بھڑکا تے سکدے نیں لیکن بھڑکی اگ نوں ٹھنڈا کرنا اوہناں دے وس دی گل نہیں ہوندی۔
عام لوک فکرمند نیں لوک پچھدے نیں کہ ہن کیہ ہووے گا۔ پاکستانی مسائل کیویں حل ہون گے۔ زرعی ملک دے عوام کدوں تک لائن وچ لگ کے آٹا خریددے رہن گے۔ حکمران مفت آٹا ونڈن دے بجائے ضروریات زندگی دی چیزاں سستے داموں عوام نوں کیوں مہیا نہیں کردے۔ اک نفسیاتی مسئلے نوں سمجھن دی بڑی لوڑ اے کہ غریب عوام دے نال نال سفید پوش طبقہ اپنی ضروریات لئی محنت کرن تے چھوٹا موٹا کم کرن دے بجائے گھر دی زنانیاں نوں کیوں لان وچ لان تے مجبور ہویا اے۔ اک حل تے ایہہ اے کہ دینی جماعتاں‘ سکالرز‘ دانشور تے سماجی شعبیاں وچ متحرک لوک اگے ان جہڑے پہلے عوام نوں آپسی نفرتاں گھٹ کرن لئی تیار کرن فیر عوام وچ سیاسی شعور بیدار کرن دی کوشش کرن۔ اختلاف رائے نوں برداشت کرن دی عادت عام کرن دی کوشش کرن۔ گل بات نال مکالمے نال مسائل حل کرن دی یا گھٹ کرن دی مختصر تے طویل مدتی منصوبہ بندی پیش کرن لیکن ایس عمل وچ سب توں وڈی رکاوٹ دینی جماعتاں ای بندی نظر آرہیاں نیں۔ اسلام دے نام تے بنن والے پاکستان وچ ایس ویلے متحرک دینی جماعتاں وچ صرف جماعت اسلامی ای واحد سیاسی جماعت اے جہڑی ملک وچ اسلام نافظ کرن دی گل کردی اے۔ باقی جماعتاں اپنے مسلک نوں اعلیٰ سمجھدے ہوئے ایہدے لئی کوشاں نظر آرہیاں نیں۔
دشمن ملکاں دی ایجنسیاں وی مختلف طریقیاں نال وطن عزیز وچ سرگرم عمل نیں۔ اوہناں دی کوشش ہمیشہ ایہہ رہندی اے کہ بدنظمی تے انتشار نوں ہوا دتی جاوے۔ا یہہ صورتحال بڑی تشویشناک اے۔ حکومت تے حکومتی محکمیاں نوںملک دشمن طاقتاں خلاف موثر حکمت عملی طے کرنی چاہیدی اے لیکن ویکھیا ایہو جا رہیا اے کہ ہر کوئی حکومت بنان‘ تڑوان تے مال بنان دے عمل وچ مصروف اے۔
سب توں ودھ افسوس ایس گل تے ہوندا اے کہ سنجیدہ تے مثبت سوچ رکھن والے دانشور سمجھے جان والے لوک یا تے حکمراناں تے طاقتور محکمیاں دے آلہ کار بن رہے نیں یا خموش بیٹھ کے اپنی دنیاوچ گواچ چکے نیں۔
لہور دے چاہ خانے‘ الحمرا دے سیڑھیاں اتے بیٹھے دانشوراں تے اعلیٰ عہدیاں اتے نوکری کرن والے ایسے بہت سارے لوکاں نال ملاقات ہوندی رہندی اے۔ اوہ سمجھدے نیں کہ ایہناں مثبت دی گلاں بالکل اثر نہیں کر رہیاں نیں۔ اکثریت روزی روٹی دے چکر وچ دانشوری نوں لت مار چکی اے تے بہت سارے اپنے چینل کامیاب کرن لئی رات دن شعبدے بازیاں کردے نظر آ رہے نیں۔ اخیر وچ اپنے کجھ پنجابی شعر پیش نیں
پیار دی محل اساری اوکھیبنیا گھر مسمار نہ کرئیے
اکو گل محبت والی ہور کوئی تکرار نہ کرئیے
نفرت نفرت جمے گی نفرت دا پرچار نہ کرئیے
ویہڑے دے وچ دیوار دی گل نہیں
دلاں اچ کھڑی دیوار نہ کرئیے
آو!امن دے بوٹے لائیے ظلم دا کاروبار نہ کرئیے
گھار عتیق سنبھالیے اپنا چور نوں چوکیدار نہ کرئیے