پاکستان دے مستقبل دا نقشہ

مظہر برلاس

ہفتے تے اتوار دی وچکارلی رات مینار پاکستان تے لکھاں لوک اکٹھے سن۔ جنے لوک مینار پاکستان دے اندر سن اوہدے توں تن گنا زیادہ لوک جلسہ گاہ توں باہر سن۔ ایہو نہیں ایہدا دائرہ دور دور تک کھلریا ہویا سی۔ لہور دا جلسہ ویکھن لئی کراچی وچ جہڑے لوک اکٹھے سن اوہ اک وکھرے جلسے دا سماں سی۔ کراچی وچ ایناں وڈا جلسہ پی ڈی ایم دی کوئی جماعت کرن دی سکت نہیں رکھدی۔ اک اجتماع جلسے دی صورت وچ پشاور وچ سی تے ایہو صورتحال اسلام آباد دے ایف نائن پارک وچ سی۔ پورے ملک دے ڈھائی توں تن درجن شہراں وچ جلسیاں دی صورت وچ لوک سکریناں تے لہور دا جلسہ ویکھ رہے سن۔ کہیا جاندا اے کہ پورے برصغیر وچ ایناں وڈا سیاسی جلسہ ایس توں پہلاں نہیں ہویا۔ ایس جلسے نوں سوشل میڈیا تے 90 لکھ بندے لائیو ویکھ رہے سن۔ ایہدی ریکارڈنگ پتہ نہیں کنے لوک ویکھن گے۔ بہرحال ایہ جلسہ یادگار وی سی تے ریکارڈ ساز وی‘ دنیا بھر دے ٹی وی چینلاں نے ایس عوامی سمندر نوں کدھرے نہ کدھرے تھاں دتی سگوں عرب دنیا دے اینکرز تے عمران خان تے فریفتہ نظر آئے۔
اتوار دے دن پیرومرشد بودی سرکار تشریف لیائے۔ ہن کدی کدی دل کردا اے کہ بودی سرکار نوں بودی بادشاہ کہیا کراں کیوں جے حضور اکثر و بیشتر غصے دی حالت وچ رہندے نیں جیویں اوہناں دی آمد نال جلالی ماحول بن جاندا اے۔ میری کجھ مصروفیات سن پر جدوں بودی سرکار آ جان تے فیر کہڑی مصروفیات۔ اوہ تے کہندے نیں بس بہہ جائو‘ سارے کم ختم۔ افطاری توں پہلاں تے کجھ چپ رہے پر افطاری دے بعد اوہناں نے اپنا جلال وکھانا شروع کیتا۔ کدی کسے ملازم نوں کہندے کہ چائے اجے نہیں آئی تے کدی کسے ملازم دی حقہ تیار نہ کرن تے شامت آ جاندی۔ خیر چائے وی آ گئی تے حقہ وی آ گیا۔ بس دو کش لین دے بعد کہن لگے تسیں ناشکرے لوک او۔ بڑے ناشکرے لوک میں ڈردے ڈردے عرض کیتا کہ سرکار اسیں کہڑی ناشکری کر دتی؟ بودی سرکار دیاں اکھاں غصے نال سرخ ہو گئیاں تے فیر اوہ بولے اللہ نے تہانوں لوکاں نوں اک چنگا حکمران دتا سی۔ تسیں ناشکرے لوکاں نے اوہنوں ساڑھے تن ورھے بعد ای گھر گھل دتا۔ تہاڈے سارے مافیاز اوہدے خلاف اکٹھے ہو گئے۔ تہانوں تے اللہ دا شکر ادا کرنا چاہیدا سی‘ پر تسیں ناشکرے لوک او۔ ہن تہاڈیاں گلیاں وچ بھکھ ہچکیاں لیندی اے۔ ہن تہاڈے شہراں وچ پرس کھوہے جاندے نیں۔ ہن تہاڈے راہواں تے چوریاں ہوندیاں نیں۔ ہن تہاڈے سارے لوک بھکھ نال بلکدے نیں۔ آٹے دی تلاش وچ لوک مدھے جاندے نیں۔ موت پھر رہی اے ہن ہر پاسے پورے ملک وچ‘ بربادیاں دے ڈیرے نیں‘ آبادیاں بکھر گئیاں۔ معیشتاں دی بیڑی دے سامنے گرداب نیں۔ اک بھنور اے ملک وچ‘ اک بھچال جیہا اے جیویں‘ بودی سرکار دم بھر لئی چپ ہوئے تے اک ملتانی نوجوان بولیا کہ سرکار ساڈے نوجواناں دا کیہ مستقبل اے؟ بودی سرکار نے نوجوان ول غور نال تکیا تے فیر بولے تہاڈے مستقبل دا نقشہ ایس دیس دے مقبول ترین لیڈر عمران خان نے پیش کر دتا اے۔ اوہو اوہنوں سنوارے گا۔ باطنی قوتاں ایہدا فیصلہ کر چکیاں نیں۔ ایہدے راہ وچ آن والی ہر رکاوٹ نوں پاش پاش کر دتا جاوے گا۔ ایہدی مخالفت وچ آن والے ریزہ ریزہ ہو جان گے۔ اوہ پاکستان دا ای نہیں عالم اسلام دا عظیم رہنما اے۔ لوک اوہدے دیوانے نیں ایہدا فیصلہ ہو چکیا اے۔ اوہدے دس نکات تے ذرا غور تے کرو۔
-1 اوورسیز پاکستانیاں نوں ملک دے اندر سرمایہ کاری لئی سازگار ماحول دینا۔
-2 لمیری مدت دی برآمدات وچ ہولی ہولی وادھا کرنا۔
-3 پورے ملک وچ سیاحت نوں فروغ دے کے نہ صرف ڈالر کمانا سگوں لوکاں نوں روزگار دینا۔
-4 ملک وچ وسیع پیمانے تے معدنیات دے راہیں ملکی آمدنی وچ وادھا کرنا۔
-5 ملک وچ چھوٹی تے درمیانی صنعت نوں فروغ دینا تے کاروبار دے وسیع مواقعے پیدا کرنا۔ ایکسپورٹ دے راہیں مبادلہ وچ وادھا کرنا۔
-6 زراعت نوں جدید خطوط تے استوار کرنا۔ زرعی پیداوار وچ وادھے دے نال خودکفالت تے زرعی برآمدات دے راہیں ملکی آمدنی وچ وادھا کرنا۔
-7 ملک دے خسارے دا شکار وڈے سرکاری اداریاں دی ری اسٹرکچرنگ کر کے نفع بخش بنانا۔
-8 نادرا دے نال مل کے ٹیکس نیٹ دے دائرے نوں وسیع کرے ملکی آمدنی نوں ودھانا۔
-9 منی لانڈرنگ روک کے سرمائے نوں محفوظ بنانا‘ کرپشن نوں روکنا۔
-10 غریب تے ماڑے بندیاں لئی وسیع پیمانے تے فلاحی پروگرام جہدے وچ ہیلتھ کارڈ‘ نوجواناں لئی بلاسود قرضے‘ چھوٹے کاروباری بندیاں لئی جدید ترین سٹال‘ گھریلو ملازماں لئی کنٹریکٹ بیسڈ ملازمتاں‘ احساس پروگرام دی توسیع‘ غریب گھرانیاں لئی راشن پروگرام‘ گھر بنان لئی بلاسود قرضے‘ کچی آبادیاں لئی جدید سہولتاں نال آراستہ مستقل گھر تے ایس توں علاوہ ان گنت فلاحی منصوبے شامل نیں۔
کیہ تسیں ویکھیا نہیں کہ عمران خان نے پاکستان دا وکھووکھ ملکاں نال موازنہ کیویں کیتا۔ تیزی نال ترقی کرن والے ملکاں دا نقشہ کیویں پیش کیتا تے ملک نوں مسئلیاں چوں کڈھن لئی کس طرح پرعزم انداز وچ دس نکاتی پروگرام پیش کیتا۔ ایہو تہاڈی ترقی دا راہ اے۔ ایہو تہاڈے نوجواناں دے خشگوار مستقبل دی تصویر اے۔ تہانوں فیر دس رہیا واں باطنی قوتاں عمران خان دے حق وچ فیصلہ کر چکیاں نیں۔ پاکستان نال محبت اے تے اوہدے جھنڈے نوں مضبوطی نال پھڑ لوو۔ ایہ تے سن بودی سرکار دے خیالات‘ اوہناں دی گل بات دے بعد مینوں سرور امان دے شعر ٹھہر ٹھہر کے یاد آ رہے نیں:
زندگی خشک ہے ویران ہے افسردہ ہے
ایک مزدور کے بکھرے ہوئے بالوں کی طرح
زخم پہنے ہوئے معصوم بھکاری بچے
صفحہ دہر پہ بکھرے ہیں سوالوں کی طرح
٭٭٭