عید دے فوراً بعد ات گرداں خلاف اپریشن

زرداری نے ن لیگ توں آزاد کشمیر وچ حکومت بنان لئی مدد منگ لئی

قومی سلامتی اجلاس وچ فنانس ڈویژن کولوں فنڈز وی طلب کر لِتے گئے

فیصل ادریس بٹ

بلوچستان وچ سر چکدی ات گردی دی لہر نے ساڈی سکیورٹی فورسز نوں اک واری فیر ایس گل اتے مجبور کر دتا اے کہ اوہ ملک تے عوام دی حفاظت نوں یقینی بنان لئی ات گرداں دے خلاف اک گرینڈ اپریشن پلان کرن جہدے وچ ات گرداں نوں جہنم واصل کر کے ملک و قوم دی حفاظت نوں یقینی بنان۔ وزیراعلیٰ بلوچستان عبدالقدوس بزنجو اپنے سارے وسائل بروئے کار لیاندے ہوئے ات گردی دی لہر نوں روکن وچ مصروف عمل نیں۔ جیویں کہ دو دن پہلے کوئٹہ وچ پلس دی گدیاں دے کول 2دھماکیاں دے نتیجے وچ 2پلس اہلکاراں زنانیاں سنے 4افراد شہید جد کہ 19پھٹڑ ہو گئے۔ ملکی سلامتی دی حفاظت اتے مامور ایہہ شہیداں تے اوہناں دے اہلخانہ لئی قیامت صغریٰ برپا اے۔ پاک فوج دی حال ای وچ کمان سنبھالن والے سپہ سالار سید عاصم منیر نوں ملک وچ ودھدی ات گردی دے علاوہ ملک وچ عدم استحکام ڈگدی معیشت سیاسی بحران تے مشرق وسطیٰ وچ رونما ہون والی تبدیلیاں دا وی سامنا اے۔ کجھ دناں پہلاں حکومت پاکستان نے سلامتی کونسل دا اجلاس طلب کر رکھیا سی جہدے وچ مسلح افواج دے سارے چیفس نے رلت کیتی۔ اجلاس وچ ملکی صورتحال پرامیق نظر پائی گئی جہدے مگروں حتمی طور تے ایہہ فیصلہ ہویا کہ ملک نوں ایس ویلے ٹی ٹی پی ولوں ات گردی دی وارداتاں کولوں چھٹکارا پانا ضروری اے۔
قومی سلامتی اجلاس وچ ملک بھر وچ ات گردی دے خلاف اک نویں آپریشن دی لوڑ اتے زور دتا گیا اے۔ ایس اپریشن لئی فنانس ڈویژن توں فنڈز وی طلب کر لیتے گئے نیں۔ امید اے کہ عہد دے فوراً مگروں ات گرداں دے خلاف ایہہ اپریشن شروع کردتا جاوے گا۔ دوجے پاسے سپریم کورٹ ولوں وزارت خزانہ نوں 21ارب الیکشن کمیشن نوں فراہم کیتے جان دے احکامات اتے تاحال عملدرامد نہیں ہو سکیا بلکہ پارلیمنٹ وچ متفقہ رائے نال قرارداد منظور کیتی گئی اے کہ ملکی معاشی تے دفاعی صورتحال نوں مدنظر رکھدے فی الحال الیکشن دا انعقاد ممکن نہیں اے۔ جے سپریم کورٹ دے حکم دے مطابق 14 مئی نوں پنجاب وچ عام انتخابات نہیں کروائے جاندے تے موجودہ نگران پنجاب حکومت لئی مسائل کھڑے ہو سکدے نیں کیوں جے نگران حکومت آئینی طور تے 90دناں لئی قائم کیتی جاندی اے جو کہ (22اپریل ہو سکدا) اے اوس دن عیدالفطر ہووے گی۔ آئینہ طور تے 22اپریل پنجاب حکومت دے خاتمے دے ڈیڈ لائن لئی مقرر کیتی گئی تریخ اے جے الیکشن نہیں کروائے جاندے تے قنونی آئینی ماہرین پریشان نیں کہ پنجاب حکومت نوں کہڑی بنیاداں اتے اگے ودھایا جا سکدا اے۔ قنونی ماہرین دے مطابق جے کوئی حل نہ کڈیا تے عدالت وچ درخواست دائر ہون دی صورت وچ پی ٹی آئی دی حکوتم نوں بحال کیتا اجان دے احکامات وی واضح نیں۔
دوجے پاسوں اطلاعات آ رہیاں نیں کہ سیاسی پارٹیاں وچ موجودہ بحران حل کرن لئی رابطے کیتے جا رہے نیں۔ پی ڈی ایم تے پی تی آئی وچ ڈیڈ لاک ختم کرن لئی آصف علی زرادری اپنا کردار ادا کر رہے نیں۔ لوڑ ایس گل دی اے کہ پی ڈی ایم تے پی ٹی آئی اپنے اپنے گارنٹر میدان وچ اتارے جے اوہناں اتے اظہار اطمینان کردتا جاوے تے آپس دے مذاکرات اک دو دناں وچ حل ہو سکدے نیں۔ رمضان المبارک دے تقدس نوں مدنظر رکھدے ہوئے پنجاب تے وفاق حکومت نے زمان پارک اتے چڑھائی نوں وی پس پشت پا دتا اے۔ امید اے کہ برف کجھ پگھل رہی اے۔ وزیراعظم آزاد کشمیر سردار تنویر الیاس نوں ہائیکورٹ ولوں نااہل کردتا گیا اے۔ سپریم کورٹ وچ نااہلی دے خلاف درخواست زیر سماعت اے تاحال اوہدا کوئی فیصلہ نہیں ہو سکیا۔ جے سردار تنویر الیاس نوں سپریم کورٹ آزاد کشمیر ولوں ریلیف نہیں دتا جاندا تے سوال اٹھنا شروع ہو گئے نیں کہ کیہ پی ٹی آئی آزاد کشمیر وچ دوبارہ حکومت بنا سکے گی؟ میری اطلاعات دے مطابق آزاد کشمیر وچ جے دوبارہ حکومت بنان دی لوڑ پئی تے پی ٹی آئی دی جگہ پیپلز پارٹی حکومت بنان وچ کامیاب ہو جاوے گی۔
آصف علی زرداری نے ن لیگ کولوں آزاد کشمیر وچ حکومت بنان لئی مدد منگ لیتی اے۔ ذرائع دے مطابق پی ٹی آئی دے چار ایم ایل اے پچھلے دناں توں اسلام آباد وچ آصف علی زرداری دی مہمان نوازی توں لطف اندوز ہو رہے نیں۔ پنجاب وچ پی ٹی آئی دی حکومت جان مگروں سب توں ودھ تکلیفاں خواتین نوں درپیش نیں جہناں وچ آئے دن ڈاکٹر یاسمین راشد دے خلاف مقدمات قائم کیتے جا رہے نیں۔ حیرت دی گل ایہہ اے کہ یاسمین راشد پبلک آفس ہولڈ کردی رہیاں نیں۔ اوہناں دے خلاف انکوائریز مقدمات روٹین دی کارروائی اے۔ پی ٹی آئی لئی قربانیاں دین والے جمشید چیمہ اج کل اپنی ساری مصروفیات ترک کر کے اپنے لیڈر عمران خان ولوں دتی گئی ذمہ داریاں احسن طریقے نال نبھا رہے نیں۔ اوہناں دی اہلیہ مسرت چیمہ جہناں نے پی ٹی آئی وچ کارکن دی حیثیت نال انتھک محنت کیتی اے۔ ماہ صیام وچ صبح توں شام تک مختلف اداریاں وچ انکوائریاں بھگتنے‘ مقدمات وچ عبوری ضمانتاں لین‘ اپنی بے گناہی ثابت کرن وچ لنگھا دیندیاں نیں۔
مسرت چیمہ دن بھر ایہہ مشقت کردیاں نیں جد کہ رات پوری زمان پارک دے باہر عمران خان دی گرفتاری روکن والے کارکناں دے گروپ دے نال سحری دا انعقاد کردیاں نیں۔ مسرت چیمہ نے اپنی محنت تے وفاداری دے بل بوتے تے تحریک انصاف تے عمران خان دی نظر وچ اپنا لوہا منوایا اے۔اوہناں دا ایہہ کہنا اے کہ ایس ویلے میرے لیڈر عمران خان نوں ساڈی لوڑ اے۔ اسیں تندہی نال اوہدی ڈیوٹی انجام دے رہے نیں تے ایہہ سب کجھ کسی حصول لئی نہیں صرف اپنے لیڈر دی وفاداری لئی اے۔ چیتا رہوے کہ لہور نال تعلق رکھن والے بڑے اہم رہنما صرف چہرہ وکھائی لئی تے ضرور زمان پارک آندے نیں۔ عملی طور تے اجے اوہناں دا اپنے لیڈر تے تحریک انصاف نے کوئی انٹرسٹ نہیں اے۔